「地區歧視」你聽過未?新界西居民的職場待遇

撰文:
最後更新日期:

最近一篇潮文令新界西居民廣受網民關注(主要都係新界西網民關注返),令我諗起曾經同朋友傾過,住新西,有時會喺職場上受到「歧視」。

作為新西「原居民」,出世到而家,我公屋、居屋、村屋、私樓咩都住過,租樓住到買樓,買樓住到賣樓,賣完再買返,在新西多年,一直以來面對的點止交通問題,還要承受市區人種種歧視。

地區歧視,由見工一刻開始。(iStock)

  比人問「屋企附近有無牛」呢啲只係基本嘢 

見工,application form要填地址,我由畢業第一份工到今時今日,都仍然會遇到:

「嘩,你住屯門/元朗/天水圍呀?我哋office喺銅鑼灣喎,你肯定你返到?」

大佬,我都坐喺你面前啦,當然知道你office喺銅鑼灣,我而家就喺銅鑼灣同你傾緊偈 OK?我唔出市區搵工,你喺屯門/元朗/天水圍搵份好少少嘅工比我吖,唔係無,少囉。

有一期,天水圍有個朵叫「悲情城市」,因為成日有人跳樓/家庭慘劇,而每次,傳媒都大肆報導,其實已有不少學者/傳媒人出嚟講話有可能係維特效應(Werther effect/contagious effect),意思係傳媒愈高調報道得多自殺新聞,本身有自殺傾向嘅人愈會學習,加促自殺事件發生,所以處理呢類新聞要好小心,甚至盡量唔好放頭版、唔好仔細形容自殺過程。所以唔一定係天水圍嘅人特別悲情,而係傳媒、社會將個情緒推高,令本身解不了心結的人,覺得咁多人都同自己一樣,不如自己又同佢地一樣了結生命啦……

Any肥,嗰期咁啱我就住天水圍,有個同事每次睇到呢啲新聞都會問我:

「喂你有無唔開心?你會唔會跳樓㗎?你有咩講出嚟,跳樓死好邪㗎……」

又有時會有人問我:

「係唔係所有住天水圍嘅人都好窮?」

低能……呢種低能,就好似問:「係唔係所有黑人都污糟?」即係你覺得佢皮膚黑色係由老泥形成?

香港又唔係大,偏偏香港、九龍、新界嘅人互相對大家有好多刻版印象(stereotype),即係對某種人、事、物有先入為主的既定諗法,然後覺得所有屬於呢種類型嘅人事物都係咁。例如覺得住港島一定有錢,港島無公屋?住新界一定會新年放煙花,新界無人住高樓大廈?全部圍村人?

如果覺得新界就係好多牛,咁同外國人問你係咪個個中國人都識功夫一樣。(資料圖片)

  公司唔想你claim車錢

曾經返過一份8號風球都要返嘅工。打風的話,公司要畀車錢同事搭的士返去開工,HR埋嚟同我講:

「如果聽日真係打風,你唔返得唔得?你問吓有無同事頂你返。」

8號風球要我叫個同事頂我?佢真係會頂我囉!咁同迫我得罪人無分別。而點解會唔想我返?佢唔係驚我8號風球下有咩危險,係公司唔想claim足300幾蚊的士錢畀我,叫個住紅磡嘅同事返,只需要claim 60蚊的士。 

做event,完活動等嘉賓記者走哂,拆埋台、執埋物資再返公司,過12am放工好正常,過12am又係要claim的士錢,阿經理為咗慳budget,11:45am左右就會叫我去搭巴士。住港島的同事?12:30am上的士,12:40am返到屋企。12:40am我喺邊?好彩嘅話剛剛入西隧,預計1:30am落車。如果公司肯畀我搭的士返新西,30分鐘就到了。

隨住香港樓價係咁升,近年有大量「新移民」由市區湧入新西,所以上述情況已有改善,各公司上下對新西接受能力高咗,當年曾經有人懶好笑話:

「你出嚟食飯記得帶回鄉證,否則我驚你返唔到屋企。」

今日佢(被逼)搬咗入元朗,佢話:

「元朗大把好嘢食,使乜約出旺角同人逼呀。你地入嚟啦。」

最後,新西原居民表示,當我話「我住屯門」,請你唔好再:「吓?嘩!搭車使唔使一個鐘?夠我去一轉台灣。哈哈哈。」呢個「笑話」我哋真係聽過好多次,完全唔好笑。

(本文純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。