【來稿】新世代好工準則

撰文:
最後更新日期:

仲有唔夠1個月就過年,過年代表咩呀?就係過咗年又到一年一度打工仔轉工嘅旺季!由2月到7月都會上演你打我份工,我打你份工嘅無聊黑色喜劇。

大家除咗因為而家份工受氣,轉咗工之後想人工高D之外,到底有D乜嘢因素令你比個Like自己份工?

HR評打工仔就睇得多,今次要由打工仔評下2017年嘅今日,點先叫做一份好工!

今時今日,對打工仔而言點先算一份好工?(iStock)

文:窮一生

 好工不能困身 

今時今日好多人份工都係無償OT,有返工冇放工。人一日就得24小時,訓咗6-7個鐘,份工如果食咗你成10-12個鐘,你真正做自己野嘅時間有幾多?而且比起要時間黎做自己想做嘅野,香港後生仔更需要多D時間去諗自己想做D咩野!衰D講我而家窮,我都要時間諗下點樣可以改善生活啦係咪?
 
 返工反而與社會脫節?

窮生之前都講過,份工人工可以underpaid,但如果份工唔可以上網/同人溝通,就高一倍人工都唔會考慮。因為以前D人話唔做野會同社會脫節,而家如果返工返到與社會脫節,長遠黎講削弱咗自己嘅競爭力,而家係資訊嘅年代,掌握資訊就有可能性,你日日做做做,社會進咗步你都唔知,到時臨老俾人淘汰就喊都無謂。
 
 出唔起高人工,請讓我在外發展 

而家已經唔係1970-1980年代一份工打一世嘅年代,人力市場明買明賣。打工仔同公司嘅關係只係錢同技術/人力嘅交易。公司覺得冇責任養你一世,打工仔亦無必要只忠於一主。生意難做,我理解公司有難處,但如果你俾唔起高人工,容許我出去搵外快,增加收入,對你同我都好,你多個人用,我多個避風港,win-win!
 
 讓員工了解自己做緊乜,唔做啤膠工人 

呢個係好多港資公司/大公司嘅通病,亦都係員工冇心機做野嘅原因。就係自己日日返工都唔知到底自己係做咗D乜野實際嘅野出黎。如果員工可以了解多D自己嘅工作成果,成功感自然會大D,對公司歸屬感又高D。係工作過程中因為了解咗成個工序又可以同多D唔同部門嘅人溝通合作,可以宏觀地學習企係經營者角度出發。可以有機會企係管理者角度睇公司,係一個好好嘅學習機會,日後創業就靠呢D野嫁喇!
 
 彈性上班減少等待 

某D工種如果唔係一定要係預定時間出現係工作崗位的話,好多時一早返到office都係等人交野先可以開工,根本冇必要日日返九放六,有時未必日日返嚟9個鐘都有野做。如果公司可以定到每周返工的時數,再以工作的成效黎評估返員工表現。可以更有效運用勞動力得黎又令員工有更大自由度控制自己的作息時間,自然可以留得住人才。因為其實你出得月薪,就唔好覺得我坐得係Office就係做緊公司野,稍為有打過工嘅人都唔會咁諗啦,只要我可以完成公司交俾我嘅task,我係中間處理緊D咩,只要唔犯法,你又做咩要管住我呢?
 
所以窮生認為,2017年再講好工,應該係講自由度,發展空間都唔需要局限係公司之內。公司應該鼓勵員工有多方面發展,培養員工更宏觀去處理公司同自己嘅問題。聰明嘅員工係會明白果3幾千蚊人工嘅多少,同自己日後嘅發展邊樣重要D,想公司走得到去下一個新世代,唔一定係諗放下生日假,搞下speed dating嘅!仲有好多人性化,生活化嘅方法可以用。只要你多D企係員工角度諗,呢個世界就唔需要咁多周綺萍。

(本文為投稿,稿件可電郵至iwanttovoice@hk01.com;文章純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。