沒有男人答到妳佢點解鍾意睇波

更沒有男人答到妳佢點解鍾意一隊球隊。

26歲，睇咗15年阿仙奴，男校朋友一半以上都有睇英超，同學唔睇波都識講，搭唔到嘴就唔夠frd。講波，係男校嘅common tongue。黃金時期阿曼大戰旗鼓相當，贏波嘅時候，我最鍾意粒聲唔出。因為唔使講，班曼迷自然覺得好冇面，可能學都唔想返。曼聯唔知點解就硬係多啲擁躉，作為小眾，rub it in your face is not a very good sport. 粒聲唔出，轉堂傾偈嘅時候人哋總會忍唔住：

「X，尋晚真係訓唔着。」

自己心裏「唧」一聲，暗爽，面上緊緊控制住肌肉，

「係咩？我瞓得OK喎。」

爽過搭飛機。

妳可能不明白——ops, sorry，若你是同路人，不算「妳」。

「妳」在這篇文章是不碰足球的局外人，不會明白我們的痴戀。不是妳看不穿，只是我們太瘋癲。妳可能最不明白男人睇波點解咁鬼emotional。我最記得同我阿爸阿哥星期六日同埋有時禮拜三睇波，「三條黃」夜晚大聲盡訴心中情，用最精簡的詞彙質問螢幕上三千里外的Adebayor點解咁那鍾意越位、丹尼臣點解係都要橫傳、希比幾時先肯射波、雲加幾時先肯買人……然之後，例牌，嫲嫲行出嚟，怒睥我哋：「HeyYa…..」三條黃，控制唔到肌肉，嘴邊暗笑，粒聲唔出，遲吓再X過。（HeyYa為嫲嫲發嬲的馬來式中文字句。）

雲加幾時買人係一個不解難題。條友係一個經濟學家，當年不敗兵團亨利栢金皮里斯龍格堡韋拉退役之後，其實真的沒有一隊Gunners擁有同一level嘅技術同決心。起新球場負債要變賣球星還錢，士氣低落，球迷傷心。雖然每年力保前四，但受盡旁人閒笑。每當車路士曼城千金萬馬的買下自己當打的球員，心總會沉一沉，難過，只希望傷心有天總過去。當雲佩斯出走曼聯時，我在美國大學宿舍裏痛哭，分手都冇咁傷心。條契哥好去唔去走去咗曼聯，就好似你男朋友分手之後溝咗你個Best Friend咁。再當皇馬球迷不斷踩低你作為阿迷的價值，跨海分享雲加的無能，用來突出作為銀河戰艦的球迷何等崇高的地位以提高自己時……對，你要粒聲唔出。

當一個阿迷是需要勇氣的，作為一個有風骨的球迷是需要有風骨的。到頭來，支持一隊球隊沒有原因。不會是因為他曾經風光、現在風雲，更不是因為他終身美麗。喜歡一隊球隊到一段時候，男人會當他是一個身份，給予他一個「名份」。阿仙奴，可能就是我的「弟弟」，或是我的終身摯友。

兄弟沒有說不和的，沒有解不開的誤會的。今天的兄弟，十年後，一百年後，一萬年後，也是真兄弟。15年前愛上了阿仙奴，至今仍喜愛，他是我擁有過 最長情的關係。一個好兄弟好朋友，不會因為你昨天是一個小公子今天是一個雙失青年而把你遺棄。一個好球迷，會陪你走過最艱難的時候，就算你十年無冠。就算我們情感上失望，理性上不解，我倆的誤會再多，but family is family。

足球，像人生一樣，有高低起落。不是人人一定高過，不用高不用低，兄弟就是兄弟，好友就是好友，不分高下。

我支持阿仙奴，每天也給他慰問，15年來每一天也會看他的新聞，悄問朋友他的近況。我們不用談話，但我每天也會想着他。我未必場場波都觀看，未必可以一直在身旁陪着他，但我總會希望他成功，在背後支持他，有時候買一兩件波衫。我希望他高飛，希望他振作，希望他超越我對他的盼想。我不知道他會不會有一天再飛，但我知道，兄弟不是我們揀的，友情不是計算來的。喜歡一隊球隊，是一個眼緣，一個終身大事。

男人與他的兄弟球會，便是這麼偉大，這麼麻甩，這麼肉麻老土的一段情。直情可能是男人跟「愛」這個字最接近的家。

五年前，我與我的兄長到球場支持我們的細佬，那一晚是我人生最開心的一天。希望我的兄長、與我、與我們的細佬，有一天會再飛。

【本地薑音樂節2017 － 早鳥優惠】

萬眾期待，本地薑音樂節2017今日終於可以開始訂飛啦！由今日起到2月13日，購買Smash同埋指魔俠音樂會門票，可以有額外的早鳥優惠！快啲嚟睇下啦！

Smash : 古典流行，共冶一爐 

17 March 2017 (Fri) | 8pm 香港理工大學賽馬會綜藝館

http://www.art-mate.net/?a=doc&id=45331

指魔俠 － 神唔神 ？

12 April 2017 (Wed) | 8pm香港大會堂音樂廳

http://www.art-mate.net/?a=doc&id=45361
 

（文章純屬作者意見，不代表香港01立場。）