【來稿】人夫有話兒：好老婆的三大特徵

面書經常會出現「好老公/好男友嘅十大特徵」又或者係之類嘅圖，你總會見到有無數女人，不停咁share／tag佢另一半嚟提示一下對方又好，放下閃光彈又好。
咁十大好老婆／好女友嘅特徵呢？都唔少，不過九成九都係女人tag返自己多，又無話唔准嘅，不過就有啲雲加話自己隊波好好無問題咁囉。
作為一個結咗婚就5年，又就嚟有第二個小朋友嘅人夫，我又不妨講下响好似我呢啲三十中嘅男人，心目中好老婆又應該係點。

文：堅離地拓海

結得婚，斷估你都廿尾三頭。各位過咗呢個年紀嘅已婚男士，除非你哋係全馬超馬選手，否則相信你哋一定有經歷過明明生活上無咩大改變，因乜事突然肥咗咁多嘅呢一幕。然後10個朋友當中，有9個都會話呢啲叫做「結咗婚幸福咗所以肥咗」。

做老公唔可以肥

講真，一個好老婆其實就唔會畀呢個做老公肥嘅藉口嘅，成世人流流長，假如你要有埋細路的話，老公真係要有個健康嘅身體去準備往後嘅生活。一結婚就肥，食飽飯就去坐按摩椅等瞓覺，講真你老婆似乎就唔係好幫到你管理你自己啦！聽起嚟好似好女權咁，但實際上男人往往都係hea過女人好多，你睇佢地行街買嘢果種堅毅你就知，所以男人有時真係要一個好老婆去鞭策下。

我結婚前都肥肥地，飲下酒，瞓到12點先起身，家務叫識做下啦，不過就唔慌整理得去邊。結咗婚之後呢，大大個老婆做我個role model，早睡早起，家務依家做得仲叻過我老母，約人好少遲到，呢啲都係跟我老婆學。

仲有，當你見到佢做嘢湊女做家務時，你自自然然會心諗：喂我唔可以有事架喎，最好傷風感冒都少啲，學張衛健話齋：「我害怕你要照顧我擔心得出一臉倦容」，之後你就會有操fit嘅衝動。

我就係因為呢個信念，結咗婚到依家減咗40磅，早兩年去改婚戒時，仲畀個阿姐問我係唔係要改大呀？我好鬼得戚話：「唔係喎！小姐，改細喎！」果刻我知我老婆比我更自豪，因為佢令佢老公比結婚前更有規律、更進步。

老婆要知所進退

王傑話齋：「我要知道幾時要退」，上面講嘅就係老婆剛強主動嘅一面，咁當然男人嚟講呢，就點都要有啲話事權先平衡到，好老婆就會好掌握到呢一點。

10隻手指都有長短，總有幾方面個老公係叻過老婆啩？識得收放自如，或者講白啲，有啲自知之明嘅女人，响呢啲位就會放畀老公去理呢啲野。舉個例：錢，買樓、買股票計定屋企支出，我有見過部分真係對錢無咩sense嘅女人，係都要扮專家，又呢樣又果樣，結果呢，當然係輸啦。

再引伸落去，錢輸咗都算，有時唔識扮識呢下，响朋友面前輸埋個面先係大忌，唔少巴打相信會試過或者見過，有老婆响朋友聚會中衝出嚟柒，明明唔識果樣嘢出嚟扮專家，再加埋唔知咩三姑六婆嘅經驗同理論，跟手就全場O咀。在場係老死都仲好，笑下無事，如果係同事上司就大檸樂啦！之後返工個男人總會疑神疑鬼，覺得其他人响度講你。好嘅老婆呢，唔識就索性唔出聲，再高啲就直頭出去行下，等你班友自己吹，又有自己空間。

怪獸家長，女人居多

講遠少少，育兒。大多數（頭盔，我話大多數啫）老公响細路讀書方面嘅心態都輕鬆啲嘅。時下果啲怪獸家長，或多或少都係老母居多。同人比較嘅好多時係女人自己，「阿邊個仔報緊邊間學校呀」，「邊度邊度要點先會收呀」，通常都係女人之間嘅話題。

男人呢？多數會覺得書自己讀好先啦，同人比較做咩？我哋咪又係咁大？久而久之，真係會有男人係放咗工唔想返屋企嘅。無他，一個「煩」字。當然關心仔女學業係好事，不過過晒火位嘅老婆亦好常見，跟住各種家庭問題隨之出現，老公更加hea落去，因為件事已經俾個老婆搞到好複雜。

比較得小朋友嘅老婆，就梗會比較埋自己老公啦。咁唔使多講都知，呢樣正正係男人死穴。比得好仲好，比較起上嚟覺得自己老公唔好，就真係兩個人都唔開心。男人响呢啲位，真係會極度反感。相反，好嘅老婆就真係從來唔會比較，又或者永遠都覺得自己老公最好。你唔好以為「永遠都覺得自己老公最好」好易，好多女人結咗婚之後，可能因為一齊住／小朋友／經濟嘅問題，由好崇拜自己老公，慢慢變成樣樣都因比較而睇唔順眼。

望望你身邊嘅朋友，keep得好、事業OK、成日都好正面、鍾意返屋企嘅，通常都有個叻同埋收放自如嘅老婆。成日悶悶不樂，唔知想點果啲，通常個老婆都好煩。唔想返屋企果啲，通常老婆都係「無料扮四條」嘅控制狂。所以揀老婆時，靚唔靚真係其次（當然最好都係靚），但叻得嚟又會令你進步，釋放你嘅潛能，先係最重要。

（本文為投稿，稿件可電郵至iwanttovoice@hk01.com；文章純屬作者意見，不代表香港01立場。）