為什麼男人較易肩膊疲勞？

我常常在facebook page分享，人生除了工作以外，必須擁有其他元素才完整，包括個人興趣、愛情、親情、友情等等。我之前亦寫過一些關於婚宴的文章，而婚宴過後，面對現實相處的種種，對男女關係有了新的看法，好多人話：「結咩婚吖，一紙婚書代表咩嘢，結完都可以分。」無錯，單是一張紙不會令關係快樂或長久，但兩個人一步步邁向簽下婚書的過程，卻代表着很多了解、爭吵、妥協、體諒與成長，而這些，都是承諾和廝守的基礎。
今篇，我想講吓變成人妻後對男人的看法。

你一定比人問過呢個問題：

「如果可以揀，你想做男人定女人？」

小學的我答：「男人！男人唔會俾人非禮。」（因為媽媽教我放學要立刻回家，街上有很多金魚叔叔。）中學的我答：「男人！因為男人唔會M痛又唔洗面對生仔十級痛。」婚後的我答：「女人！因為男人個膊頭要肩負的，實在太多、太重了！」

朋友Peter最近成日焦燥不安，男人不安都真係離唔開錢銀女人。由於錢佢有大把，咁明顯就係同佢女朋友有關。佢本身吞吞吐吐，但問多幾句，原來佢個年輕貌美嘅女朋友轉行做空姐，Peter因而覺得好不安，擔心女朋友進入新圈子會影響佢地感情，驚女朋友會遇上「狗公」，（男人覺得除咗自己之外，其他男人都係狗公）但Peter喺女朋友面前又唔敢講自己擔心，甚至扮到豪不着緊，自己屈埋不安。

安全感，不是女人專利

無可否認，女人胡思亂想的頻率比較高，但男人不安起嚟都一樣會亂咁諗，一段關係之中，男人都同樣需要安全感。女人缺安全感時，可以直接講出嚟要人哄、發脾氣、查Facebook、看Whatsapp，無論件事合唔合理，男人都要哄，哄到個女人變返正常情緒為止；而男人呢？感到無安全感嘅時候都唔講得，因為怕比人覺得自己弱，而且，講出嚟更有可能會激嬲女朋友，比人話幼稚唔成熟，所以，都係自己屈埋不安。

男人「想扭計」要計過時辰

係人都鐘意被另一半呵護，對於「扭計」，女人無論何年、何月、何時、何地，隨時想「扭」就可以「扭」；又男人就只能喺單獨相處，加上女朋友心情好（而幾時心情好係捉摸唔到的）就可以扭兩嘢，但都只係可以扭兩嘢，扭三嘢就會比女朋友嬲返轉頭，由女哄男即刻變咗男哄女。結婚之後，深深感受到男人對「戀愛感覺」的追求不比女人少，男人放工後極需要「被重視、被呵護」的感覺，這絕對是他們另一天工作的動力。

不能說的秘密

女人對住另一半，多數都會七咀八舌，每日放工講返當日發生過咩事，喺公司比人恰、過馬路比阿婆撞……男人卻有很多不能說的秘密，例如工作壓力、財政問題甚至驚玩機動遊戲同驚睇鬼戲！女朋友話要睇鬼片，男人可以話驚而唔睇嗎？社會普遍觀念就是認為男人一定要大膽、要夠強，同人講自己怕黑，感覺就好似向人承認自己是廢柴一樣。

之前睇過一篇報導，有研究指男性因抑鬱症而自殺死亡的比例比女性多2至3倍，因為習慣了不對外求助，累積的負面情緒只能強忍，無發洩渠道，男人雙肩負著的實在太多了，如果你隔離個男人仍然精神健全，其實他已經很強！

無論你係男人定女人，有工作壓力或職場咒怨，都歡迎到我Facebook page留言分享，唔好屈屈埋埋呀。

（文章純屬作者意見，不代表香港01立場。）