【職場警訊】張eDM已經去到v16,你地究竟改完未?

撰文:
最後更新日期:

Click得入嚟,你知唔知乜嘢係v?V stand for Version!v16即係同一份文件/圖已經改到第16次,係尖叫、眼花、想暈、作嘔、崩潰的時候!如果你做緊嘅工係唔需要對住同一份嘢改完又改、改完又改,你唔會明白點解個人明明唔眼訓但都係好混頓同埋集中唔到精神。望住嗰幅明明已經將個太陽畫咗喺中間嘅圖,你唔理解個客/老闆點解仲叫你將個太陽「置中」,究竟要放到幾「中」先係佢心內的「中間」?除咗叫你改嗰個人之外,個世界究竟仲有咩人分到個太陽有0.03mm偏了左邊?

曾經在PR agency工作,嗰時我成日都覺得D in house PR係失憶嘅。

version 4嗰次,個客叫我喺poster寫「精緻甜品,盡在ABC甜品屋」,佢話個重點係要突出「甜品」二字,令人諗起甜品就諗起ABC甜品屋;

version 5,個客又同我講:「都係唔想一句句子出現兩次『甜品』,感覺好累贅」,結果改成「精緻甜點,盡在ABC甜品屋」;

version 6,個客諗諗吓都係覺得『甜點』唔夠準確,又改成「精緻糕點,盡在ABC甜品屋」

我明知你點都會改十幾次先收貨,即係頭十次心機都會比人當垃圾,長此下去我都無心機喺一開始就將最好嘅嘢比你啦。(視覺中國)

當然,每個version,阿客人都唔會只係改一部份,總會順手又改吓圖,個雪糕試吓拉大2 cm,轉頭又試吓縮細返4cm,反正改嘢唔洗錢,咩都試吓囉!「數量有限,賣完即止」好D?定係「限量發售,售完即止」好D?唔知喎,決定唔到喎,「試吓囉」

有D嘢同毒品一樣,唔好亂試            

就係呢種試吓唔洗錢嘅心態,到6點都未放得工,仲陪佢玩緊「甜品、甜點、糕點」,最正係往往都會用返最先嗰個 — 甜品。各位客人呀!老闆呀!其實「用人不疑,疑人勿用」呢個道理你明唔明?你搵得我做嘢,就應該相信我一定係嘔心瀝血將最好嘅嘢做出嚟,往往頭三個version都係最用心,已經以最好嘅用字、行文、圖畫將產品呈現,因為我都想個task盡快完,大家開開心心準時放工,所以喺你「試吓囉」之前,我就已經用專業判斷同知識,整出一個最好效果,交到你面前就已經係90分以上嘅功課。偏偏你就要喺version 4-14之間將份嘢由90分變40分,然後到version 15你開始累了,就「算啦,放手比你搞」,結果我又要由version 16開始慢慢將D嘢變返version 1-3嘅樣。

係,我知我收得錢就要陪客人/老闆改來改去,但你又知唔知咁樣改法,係搵人笨又搵自己笨?好簡單,我明知你點都會改十幾次先收貨,即係頭十次心機都會比人當垃圾,長此下去我都無心機喺一開始就將最好嘅嘢比你啦,反正張圖畫成點,你都係鐘意改。我們必須承認人人都有惰性,同埋無人鐘意被不信任的,呢種改來改去嘅「訓練」,好容易就會令人「求其啦,反正都要改」、「有字就得啦,反正都唔會用」,唔夠膽放手、交出信任,咁你其實唔洗比錢搵人做丫?所有嘢自己做哂咪得囉。

我做in house PR,就更明白點解一份簡單嘢都要做到v16,就是那種層層遞進的架構。(視覺中國)

畢業後,我們仍是填鴨

到我做in house PR,就更明白點解一份簡單嘢都要做到v16,就是那種層層遞進的架構。當你交出version 1-3,接收同比意見嗰個,好多時都係話唔到事嗰個,例如係officer,officer同你玩到version 5,佢先開始交去比senior officer睇,如是者仲有assistant manager, manager, senior manager……每人改兩三個version,唔經唔覺就v16。

點解會咁?因為每一個上級收到份嘢,都會問下級「你comment咗未?」下級為表示自己做咗嘢,就一定會先comment而後交。其實我真係唔明,一個完全話唔到事嘅人,comment有咩用?特別係設計、寫作呢類非常主觀,完全係講個人品味,毫無客觀準則嘅task,officer覺得靚,唔等於senior manager覺得靚,咁officer個comment究竟有咩意義?講得好聽D係訓練officer做judgment,但最終係訓練佢學識judge靚唔靚,定培訓佢成為上司肚入邊條蟲?直到有一日,佢知道老闆鐘意「甜品、甜點定糕點」,咁就係成功了?

想向上爬,似乎都避唔開要識讀老闆/客人個心?如果你有類似經歷,歡迎到我Facebook page留言交流。

(文章純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。