【影評】鄧寇克+軍艦島+戰狼II:三套愛國戰爭片,三種表達手法

撰文:
最後更新日期:

最近一個月,本人連續睇咗三套「愛國戰爭片」:係韓國嘅《軍艦島》,中國嘅《戰狼2》(在深圳睇的),同埋英國嘅《鄧寇克大行動》。香港冇上《戰狼2》,而亦唔係好多人有興趣走上大陸睇,可能因為咁, 見坊間唔係咁多人拎三套戲一齊講,本人即管試下。

總會有人認為三套戲不能相提並論,特別係《軍》《鄧》都算係有真實歷史舞台,《戰》片就只係大話西遊,仲係現代。另一方面,未必人人同意《鄧》片係愛國戰爭片。佢嘅「主旋律」味道明顯較薄——但唔係冇。況且,正所謂作者已死,好多觀眾睇完都係照講愛國。

(以下含小小劇透,筆者認為冇乜所謂,但原教旨主義嘅不妨跳到文章最尾)

【編按:以下內容或含劇透,逃生門在此。】

先講《軍》片,谷阿莫式嘅撮要就係

「韓國人好慘畀日本人呃日本人死唔認錯不過韓國人有啲都好賤但整體都係好日本就冇個好」

本人都去過日本軍艦島觀光,日本官方介紹當然對黑歷史隻字不提,難怪韓國人心中有氣。《軍》片相當商業,當紅韓星擔正,但一樣係愛國旋律片。片尾字幕不忘話你知日本人依然唔肯認數。宋仲基見傳媒都不忘話比大家知,佢愛人宋慧喬唔肯拍某日本公司廣告。 

《軍》片上映後,在韓國嘅口碑評分急跌,票房亦後勁不繼。原因?因為韓國人覺得唔夠粵語殘片式嘅黑白分明!接受唔到戲入面嘅大奸細係韓國人。睇返新聞,韓國人對於遊客(尤其係日本人)在軍艦島擺甫士自拍相當不滿,而對於日本將軍艦島變成景點賺錢更加係氣憤。滿腔憤怒入場,話你知其實大奸角係自己同胞,又真係有啲落差 – 即使導演話畀大家知呢個係事實。

《軍》片相當商業,當紅韓星擔正。(《軍艦島》劇照)

《戰狼2》又如何?大家知道極之收得。但你話內地觀眾盲目愛國狹隘民族主義?又唔完全係,至少同期真正主旋律大片《建軍大業》票房就完全被比下去。 事實上套戲票房報捷,自編自導自演嘅吳京暫時並冇洋洋得意,反而係走去睇《建軍大業》仲影埋相放上網話「一齊加油」——只係呢點你就知佢唔係有勇無謀嘅肌肉男。 正經講,佢套《男兒本色》有提名金馬最佳男配角,可見都有啲演技嘅。 

套戲,就當然係中國Rambo中國超人,情節熟口熟面。而吳京再威武一個打一百個都好,最後都係要解放軍幫下手。戲入面更加定時影下國旗講下護照抽下歐美國家水咁,仲話你知中國人在非洲好受歡迎,呢啲就笑下算。傳說中有人睇到起立致敬唱國歌,我冇見到。不過我見到有金髮鬼佬入場睇,相信主要係陪伴中國女伴,辛苦晒。

《軍》片韓國有壞人,咁中國有壞人嗎?當然有,為利是圖嘅商人啦,仲有強拆嘅惡霸啦。但最重要係,同《人民的名義》一樣,中國當然好多問題,官場都好多問題,但主要係地方政府問題,或個人問題,當然係同體制無關啦。好似係。

但《戰狼2》畢竟同傳統愛國片都仲有啲唔同。佢同好多外國片一樣,講「家庭」。吳京演嘅冷鋒雖則好似係愛國英雄,但佢已離開解放軍,唔係體制嘅人。打餐慒好大程度係因為私人恩怨,幫佢死去嘅愛人(其實因為片酬傾唔掂而「被殺」)報仇。

傳說中有人睇到起立致敬唱國歌。(《戰狼2》宣傳海報)

+2

自導自演嘅吳京暫時並冇洋洋得意,反而係走去睇《建軍大業》。(吳京微博擷圖)

香港人對《戰狼2》嘅批評,當然在預計中。但戲入面嘅中國人打鬼佬自high大橋段,其實係港產片用得最早最精。《精武門》嘅「中國人唔係病夫」人人識背。 你可以話時代唔同,李小龍都死咗幾十年。 但,《葉問》同《霍元甲》,一樣係呢種套路,一樣收得。何解香港人打日本人打鬼佬就得中國人就唔得,就不得而知了。

最後,《鄧寇克》,好多人講過,我就不講太多。《鄧》片明顯地更加傾向個人,「國家」好似不存在,但又無處不在。英國兵有義氣,連假扮英國人嘅法國人都攬。英國軍官唔會「讓領導先走」,留守到最後。英國機師夠晒浪漫,仲要燒埋自己隻機,心思細密。英國水手都一樣咁愛國,個仔死埋都無怨,小人物造成大奇蹟。你話唔係歌頌自己咩?一樣係,不過佢冇咁大個黨字或軍字咁解,係由個人切入,話你知「英格蘭期盼人人都恪盡其責」嘅精神。

(劇透完)

《鄧》片明顯地更加傾向個人,「國家」好似不存在。(《鄧寇克大行動》劇照)

+2

三套戲最大嘅分別,當然係愛國嘅硬銷程度,又名肉麻度,或者飛機度。《戰》片雖然唔係官方出品,但擺明係硬橋硬馬《中國夢+一帶一路+卒之站起來》,少少KY都唔用。《軍》片就冇咁肉麻,軟銷一啲,但都係銷民族大義。《鄧》片就的確冇講愛國情操,等觀眾睇完自己get到,夠深層次。

但,點解會咁呢?其實未必完全因為民族性或乜。只係大家處於不同嘅歷史階段。 英國軟實力超班,經濟力量都強,未必係沒落帝國。但肯定最輝煌嘅係日不落嘅good old days。韓國呢?真正堀起係韓戰後「漢江奇蹟」,甚至有人認為係88漢城奧運之後先算,或者係近年韓流文化征服全球後嘅事。 至於中國啦喎, 就真係再遲一啲, 可以話係金融海嘯之後先有「話語權」。

處於不同階段,就拍到唔同嘅愛國戰爭片。中國急於要認同,要嘅係慌死你唔明嘅「中國護照好勁中國人好打得」。英國一早軟實力超班,想表達嘅係「唔好講咩政府軍隊咁肉麻啦,小人物先係人性光輝」。韓國呢?其實介乎兩者中間,《軍》片導演想拍比較有血有肉嘅故事,但原來好多觀眾都仲係想睇韓國人怒打日本人。

《軍》片導演想拍比較有血有肉嘅故事,但原來好多觀眾都仲係想睇韓國人怒打日本人。(《軍艦島》劇照)

睇返美國片,其實套意識形態都係咁上下演化。最初當然係大美國無堅不摧,Rambo決戰阿富汗,拳王洛奇怒打蘇聯禁藥怪獸殺人機器,打到蘇共官員都起立拍手致敬,飛機之極。往後仲有美國總統開戰機救地球之類,睇到毛管棟。但911同金融海嘯後,就唔再係呢套了。小人物故事先係王道,講911係講消防員係講普通家庭,超級英雄都要有人性有軟弱之時,講記者講小兵。湯漢斯成功取代史泰龍或湯告魯斯成為美國icon。

中國又如何?又唔係冇進步嘅,慢啲咯。而家嘅主旋律片,已唔係當年嘅樣板戲咁propaganda。 《集結號》都會讚下國民黨啦,到《戰狼2》直頭係開始有個人意志——不過, 緊急關頭, 記得都係用國產電話call 解放軍。 

(本文純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。