【使徒行者2.博評】陳豪將演技退步合理化,一線星的責任感呢?

撰文:方以文
出版:更新:

芷珊姐姐主持嘅皇牌節目「最佳」系列,今年以「拍檔」為名再添食一輯。冇雷聲亦都冇雨點,不過有啲拍檔好耐冇喺電視機見到,我得閒都會睇吓。Bobby、大宇同埋蘇永康嗰集好好笑,不過喺10月8日播嘅第四集我就睇到怕怕。

事緣嗰集係訪問陳豪同埋蔡少芬,大部分都係由蔡少芬去帶住,芷珊姐姐間唔時問吓問題已經輕輕鬆鬆夠晒料。不過對我嚟講成集嘅重點就喺陳豪度,嗰段震撼感十足嘅對話出現喺節目下半部,詳情如下:

黎芷珊問:你哋為咗拍劇可以去到幾盡?

陳豪答:

其實我成日都講,唔係我哋去得幾盡,而係佢哋嘅角色有寫得幾深入囉。// 我成日都講,其實演員我哋可以 // 幾深入都可以去到,而佢哋描寫有幾深入呢?反而係畀幾多時間我哋去做工夫呀。 // 即係等如電影咁樣,如果你有足夠時間,去俾佢入戲,然之後有足夠時間,好有深度咁樣去描寫佢哋嘅內心嘅世界啲呢,好多嘢都做到呀。但係電視上,我諗依家嚟講, // 應該個需求都唔係太多,所以我好坦白講,就算你做得幾深都好, // 但係喺畫面上你係唔會feel到, // 因為點解?佢唔會好深入去描寫出嚟嫁嘛,所以變咗就係…我成日都講睇戲嘅需要囉。
(《最佳拍檔》截圖)

接近「自殺式投訴」

「//」係剪接位,列埋出嚟比較均真。我唔知陳豪原本講嘅全段係咪咁,但係大家見到嘅字就係節目出街時嘅實況。唔知係咪我多心,蔡少芬喺陳豪講呢段答案嘅時候,個表情好怪,比起其他部分係兩種氣氛。我當時個樣都同蔡少芬一樣。首先係覺得陳豪係咪傻咗,就算呢啲嘢係真,都唔好喺節目度公開講。之後又諗,陳豪一定唔係傻嘅,而且我相信佢係有修養嘅人,佢咁講,唔通係「自殺式嘅投訴」?

劇本差時間不足

因為《使徒行者2》,陳豪嘅演技成為大家嘅討論點之一。喺我專頁嗰邊,有觀眾討論點解陳豪愈做愈hea,覺得由《溏心風暴》開始,佢嘅演繹就一直反覆向下。依家喺佢呢段說話好似搵到答案。佢嘅答案有三個重點:

(1) 因為劇本寫得唔深入,所以演員演得唔深入。

(2) 因為討論劇本時間以及演員準備時間不足,所以演員演得唔深入。

(3) 因為電視(可能只係指大台)嘅現有表現方式,演員做得深唔深入都冇分別,所以演員演得唔深入。

蔡少芬喺陳豪講呢段嘅時候個表情好怪,比起其他部分係兩種氣氛。(《最佳拍檔》截圖)
《使徒行者2》每集開頭都有名人語句,抄足美劇《Criminal Minds》
+3

大台開劇,演員會有本天書,講吓個故事同埋人物設定。本天書寫得深唔深入,合唔合理我唔知。但演員可以做嘅嘢,就係喺自己嘅範圍努力做好佢。演員嘅職責係做好戲,事前要做嘅功夫就係要諗好多嘢去back up自己嘅角色,根據故事去想像角色一生。個角色喺劇本描寫嗰個時空之前遇過啲乜事先會做成佢今日嘅性格、價值觀,就會影響到演員點樣去做反應,以及同其他角色之間嘅氣氛。所以陳豪所講嘅(1)同(2)唔係冇道理,但演員可唔可以盡做呢?或者佢有冇盡做呢?喺(3)似乎見到佢嘅取態。

一線星更要有責任感

佢話演員「幾深入都可以去到」,只係因為電視呈現唔到出嚟,所以唔會演到咁深入。呢點就真係大錯特錯。正如頭先所講,我哋呢啲普通觀眾都見到演員嘅演技進步抑或退步,又或者睇到演員有冇交足貨。大家有眼見,唔少上咗位嘅一線男女演員,都喺度「揸流灘」。好多時我都會問句「你咁嘅料,唔係畀啲咁嘅嘢我呀?」。

我知,可能係劇本爛,可能係對手屎,但係你身為一個台甚至係行業上面有影響力嘅演員,當你都係hea住做嘅時候,其他細嘅又會點呢?你又知唔知會影響觀眾對於一個台,以至到成個行業嘅觀感呢?希望高層低層台前幕後行政宣傳都各自負返應有嘅責任。我哋做觀眾嘅,亦都有責任,唔好睇嘅就熄電視,好睇就介紹多啲畀人叫人睇。成日話港劇已死,我就話依家都未,但如果畀呢啲心態蔓延落去,就真係指日可待。

(本文純屬作者意見,不代表香港01立場。)