【高學歷藝人】吳彥祖又將男神門檻拉高——建築大師＋美劇製作人

吳彥祖除了靚仔，還有什麼值得女生尖叫，男生仰慕的地方？多了。

吳彥祖跟好多大大小小明明暗暗的藝人們一樣，都上去玩內地真人騷。先唔好話係咪為賺人仔折腰了，香港根本就冇盛載到 reality show 的本事。大台事事旦旦拍劇以為可以繼續走出以往輝煌的道路，但《溏心風暴3》的收視已經證明嗰種拍咩都有慣性收視的時代真係過去了。鍾意睇勾心鬥角的的師奶會去睇陸劇，鍾意睇絕症之下的愛情和 oppa 的港女都迷韓劇啦；仔們佬們當然情願睇波（AV 同足球）。大台事事旦旦不思改進最多「新穎」得做得出港姐扮韓團，而近來相對比較沒那麼低的《降魔的》算是萬中無一……

說遠了。講到底，香港的電視似乎無一個可以俾人大顯身手的地方，所以男神祖祖咪去神州囉。況且男神祖祖都唔係亂拍真人騷，否則佢都去唱下蒙面歌王；男神祖祖今次參與《漂亮的房子》，因為呢張刀佢真係利，動手起屋真係佢強項！

男神的門檻又再次被提高了！

動手起屋真係佢強項？係，男神祖祖其實就係建築系畢業的高材生。

一齊動手起屋呢類電視真人騷小菲在德國都有過睇，見到人地起樹屋雖然過癮；但緊係唔夠見住男神祖祖搭馮德倫出演咁叫人肉緊。《漂亮的房子》的男神祖祖建好了一座草原星空圖書館「木蘭坊」就叫人睇得咁梳干？就算大陸拍得幾咁造作都好，只要主角係大家共同仰慕的男神，親切感大於一切。其二係男神祖祖今次真係出動真本事。因為套嘢完全 fit 晒男神祖祖的「合尺」（音：河車），唔使造假的真人騷幾時都係最好睇！

嗱，新聞內容就唔多講，大家有興趣自己去睇，總之大陸都好靠譜，搵個建築師同佢伙拍，但講到底男神祖祖先係策劃的大主角。結果草原星空圖書館「木蘭坊」起得出嚟就緊係唔好嘥，嗱嗱臨參加埋 RIBA International Prize 2018（就係被傳媒稱為「建築界奧斯卡」的英國皇家建築師學會獎）揚名立萬。而家入圍了，一來證明男神祖祖的功力，二來又可以令節目人氣就更火熱；真係 kill two birds with one stone 喇。

男神的門檻又再次被提高了，各位迷妹迷弟不如順手學吓人地點樣為自己的人生發力。不要問為什麼人生營營役役的打份牛工無時間俾你享受興趣追逐夢想，反而問吓自己為興趣同夢想做了什麼。

建築系的男神祖祖無循規蹈矩咁直接咁乖乖做一個建築師。當年喺加州出世的佢讀完書返香港旅行嗰陣，俾人相中咗去拍電視廣告，誤打誤撞咁憑一身高大威猛和俊朗的五官碌入影視圈，咁就半世人。

半世人參加超過半百部電影，你地眼中的吳彥祖可能係男神演員，但佢自己卻從來沒有放低自己的夢想，視演員為本業的男神祖祖一路都無將建築的心放低。我翻睇報導有提到佢媽媽喺上海的屋企同家姐喺西貢的住處，佢都有份放返一份建築的心落去，就連屋企裏面老婆個鞋櫃佢都親力親為；真係洋溢住愛的包圍。你不要再問為什麼沒有 dream comes true，先問你到底有無 dream 好了。

你以為男神祖祖 fulfilled 的就只有這些？男神亦喜歡創業，除了開設連鎖壽司店，仲孖住馮德倫開咗間「突圍電影製作公司」專責電影幕後製作。男神祖祖在 2015年孖住馮德倫在《陰屍路》（The Walking Dead）的大台 AMC 開拍美劇《荒原》（Into the Badlands）。赤手空拳一個打十個不是夢；以武術為本，改自《西游記》，用功夫打天下尋找烏托邦。

小菲當年就搶住做觀眾了，眼見兩個被喻為香港代表的帥哥衝出國際（雖然人家本來就是美藉），當然要瞓身支持；可能因為針對美國客路，又可能因為打打殺殺太 man 了，小菲最後支持唔住棄劇收場。Don’t get me wrong，小菲唔係覺得唔好睇，只係唔啱睇。唔講得笑的係《Into the Badlands》喺 IMDb 集集都高企八分以上，總平均都咬實 8.1 唔放，好評如潮。就連爛蕃茄由第一季唔到 50% 鮮度急升到第二季 100% 鮮度（可惜小菲無本事睇到去第二季），可謂見得人拜得神。

努力去做自己想做的事，用自己的力量去影響外邊的人；男神祖祖除咗用《Into the Badlands》向西方大推這場美式的《西遊記》，更有拍住真人騷玩住變真的草原星空圖書館「木蘭坊」。做男神唔係咁做，仲可以點做？

（本文純屬作者意見，不代表香港01立場。）