【TVB.博評】《誇世代》唯一共識:馬海倫好嘢!

撰文:
最後更新日期:

全長50集嘅台慶劇《誇世代》終於播完。有人話佢係台慶劇夠膽玩、夠膽創新係抵讚,又有人話節奏太慢拍短啲會好睇好多,意見都幾大分歧,呢個情況好似喺台慶劇好耐都冇出現過。十年八載之後會唔會好似監製咁講會變做「神劇」就未冇人知,不過睇過《誇世代》嘅觀眾都有一個大家都認同嘅觀點,就係馬海倫Helen姐好戲!

胡桃姨、川嬸 被主角淹沒

Helen姐以「香港玉女」選舉冠軍之名加入邵氏入行,之後轉投佳視,又去過麗的,1980年代後期加入無綫。我最鍾意Helen姐嘅演出,就係《十月初五的月光》當中識得占卜嘅失明寡婦胡桃姨,擔心個女(姚樂怡飾),又畀個女覺得自己冇用嘅嗰種無能為力、嗰種慘情真係歷歷在目。Helen姐近年另外一個代表作,就係喺《皆大歡喜》當中做石美(梅小惠飾)嘅阿媽豬肉婆川嬸。高低嘴掃把眉加上一副見高拜見低踩嘅嘴臉,同顏國樑演嘅石大川真係好合拍。不過始終兩個都唔係主角,被其他角色劇情淹沒在所難免。

觀眾力推最佳女主角

1960年代中期入行至今50年,Helen姐喺電視界終於等到尚慶端呢個角色,喺《誇世代》裏面由頭帶到尾。由喺銀行同埋屋企橫行霸道氣焰壓過所有人,到後尾為咗銀行祖業向家姐認錯,又為咗個女Paris(李佳芯飾)嘅安全去求仇人Mike(陳豪飾)希望可以一命賠一命。觀眾終於睇到Helen姐咁多年累積嘅功力一吓過爆發:胡桃姨嘅愛女情切、川嬸嘅見低踩,加埋《巾幗梟雄之義海豪情》裏面「鐵姐」嘅硬朗,成就咗呢個大台金禧台慶劇嘅主要角色,唔少觀眾睇完《誇世代》都想趁今年有票喺手,撐Helen姐做最佳女主角,可惜佢喺大台頒獎禮嘅「最佳女主角」同埋「最受歡迎電視女角色」都冇提名……(Helen姐暫時只係喺2013年嘅《萬千星輝頒獎禮》拎過「傑出演員大獎」。)

Helen姐於2013年《萬千星輝頒獎禮》得到「傑出演員大獎」(網上圖片)

+8
+8
+8

希望監製多用不同演員

有料嘅甘草藝員好多,不過可以得到咁多戲份嘅角色就真係要講運氣。隨住大台嘅大姐級演員講到明話拍劇太辛苦而愈拍愈少,一班等咗幾十年嘅演員終於有位上。行行其實都鬥耐力,有心人就一直練好功夫等運到,不過似乎演藝行業裏面「等」嘅比重真係好大。眼見好多藝員等等吓都轉咗行,做觀眾嘅都咪話唔欷歔。喺多咗電視台,以及大台正值各級都捧人接力之際,希望多啲唔同年紀唔同資歷嘅藝員都有機會得到一個可以發揮嘅好角色。

(本文純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。