【萬千星輝.博評】女演員賽果跌爛唔少人副眼鏡?只因睇漏:王晶

撰文:
最後更新日期:

《萬千星輝頒獎典禮2017》賽前嘅焦點落晒喺王浩信同馬國明嘅「視帝之爭」,仲有《降魔的》同《踩過界》嘅最佳劇集對決。最後王浩信封帝,馬國明就繼2012年《On Call 36小時》之後第二次得到「最受歡迎電視男角色」,平咗林峯嘅紀錄。最佳劇集就由全台總動員嘅《誇世代》奪得,《降魔的》得到「全球網民最喜愛劇集」叫做拎返個安慰獎。呢幾個名單都係大家心水之內,只係估邊個拎咩獎。至於視后、最受歡迎電視女角色、最佳女配角就跌爛咗唔少人副眼鏡。

TVB一家人 余黨受壓

我之前喺自己個Facebook page預測今年頒獎禮嘅賽果,以無綫正值捧人接班之際,一眾企穩一線嘅演員,好似宣萱、三哥都係冇機會,因為要用獎幫人升level,情況有啲似當年胡定欣第一次拎視后咁。基於呢個大前題,我估視后係李佳芯、最佳女配角係林淑敏、飛躍女藝員係朱晨麗,結果全部燈晒……估Ali封后,係因為Ali係余小姐嘅人,亦都喺《誇世代》同埋《踩過界》交出成績,點知今年高高層要用頒獎禮宣傳「無綫一家人」嘅訊息,近年獨領風騷嘅余黨喺咁嘅氣氛之下受壓。Ali冇緣視后,寶座落咗喺賽前突然大熱、就嚟要傾續約嘅《不懂撒嬌的女人》唐詩詠。至於點解我估女配角係《愛.回家之開心速遞》林淑敏,係因為男配角我估唔會畀到何遠東,而每年嘅男女配角其中一個都係順民意而生,唔係何遠東就應該係「大小姐」。好可惜,我平衡咗唔同派系加埋少少民意,但係睇漏咗一個人:王晶!

升level拍電影

直至我見到「最受歡迎電視女角色」同埋「最佳女主角」嘅頒獎嘉賓係王晶時,我先如夢初醒:無綫依家有多一個派系影響大局,就係王晶嘅「星王朝」。星王朝電影公司,喺冇幾耐之前先至同無綫同埋邵氏簽約,以後王晶就同無綫緊密合作,開拍電影、網大。當然王晶唔會要啲無名小卒,喺已公布會拍電影嘅無綫人,名單暫時只有三個,其中一個係大部分人覺得已經企喺一線嘅袁偉豪,另外兩個就係拎咗「最佳女配角」嘅朱晨麗,同埋「最受歡迎電視女角色」嘅蔡思貝。

蔡思貝得到「最受歡迎電視女角色」(資料圖片)

+5
+4
+3

山頭主意難消滅 

有觀眾話今年嘅賽果爆冷,如果呢個結論係因為同民意差太遠嘅話,咁少年你就太天真。大台近年都唔係好睇民意。大台頒獎禮只係各個勢力強弱嘅指標,背後有跡可尋。當然我依家係馬後炮,下年如果估邊個會得獎嘅話,要睇無綫內部、合拍單位、邵氏,仲有星王朝。高高層想消滅山頭文化似乎係冇可能嘅事,之但係如果各個勢力平衡得宜,各個部門互有精彩作品跑出爭上位,咁都係我哋觀眾之福。

以後王晶會同無綫緊密合作(《千王之王》截圖)

(本文純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。