【選老頂背後】香港好在有邱禮濤

撰文:
最後更新日期:
與其話本文係評《選老頂》,不如話,係評邱禮濤。佢就等於你樓下茶餐廳個廚,經濟實惠,偶然星期三晚會失準,食你唔死。《選老頂》唔會成為經典,但香港電影絕對需要邱禮濤。點解?因為基本常識話你知…
李聲揚

評論邱禮濤的作品,不應與評論王家衞之類用同一把尺。

與其話本文係評《選老頂》,不如話,係評邱禮濤。

先講個故仔:剛剛好 10 年前,2006 年 4 月 4 日,第 30 屆香港國際電影節,開幕電影係杜琪峯的《黑社會以和為貴》。我永遠記得嘅係,放映前,杜生十分陰濕(諗唔到有更好的形容詞)的笑容,神秘兮兮咁吩咐大家,睇完唔好爆個結局出去。

完場後,掌聲雷動,應該係我睇咁多年電影節最誇張的一次。其中一大原因係,當時特首曾蔭權應該在場。睇過套戲嘅,應該想像到當時的場面。

以黑社會比喻香港政局,杜琪峯必定係祖師。珠玉在前,《選老頂》遲咗 10 年,先天已經不足。不錯,10 年間政局變化好大,但唔好忘記 10 年間社交媒體都變化亦好大。明抽暗抽直線曲線借古諷今拎外國人講故仔乜都有人玩過,邱禮濤唔係神仙,可以變得乜嘢出樣?

《選老頂》電影劇照

典型邱禮濤作風 絕非另一套《十年》

我入場前已聽咗不少搶住去睇的朋友講,評價都係普通。我反而覺得十分欣慰。因為,至少在呢套戲,政治冇凌駕電影(或藝術),唔係講政治就大晒,觀眾未係咁麻木。

邱禮濤抗拒俾人覺得係「機會主義者」,但不能否認《選老頂》十分 smart ass。天時地利人和,套戲充滿話題,「今時今日你老母買條菜都係政治」固然係金句,片中亦都有大膽的場面:睇女,有陳意嵐跳艷舞同床戰;睇仔,都有洪卓立幫王宗堯手淫,極具話題性——十分典型的邱禮濤作風。

而套戲,亦都就僅此而已。Quite simply,就係十分邱禮濤。至少在前半段,政治對白爆過不停,講現實情況亦公仔劃出腸,慌死你唔明。要粗口,有大量流利抵死的粗口,要睇靚女有靚女,要睇靚仔有靚仔。但,就只係咁。《選老頂》或者冇《Z 風暴》或《末日派對》咁取巧,夾硬將時事話題快手順手放入電影,但爆完一輪對白後,去到後半段,係劇力不繼。完場令人相當納悶。

邱禮濤自己講過,套戲的占卜橋段,取材自莎劇《馬克白》(Macbeth)。我倒覺得,成套戲係《笑傲江湖》。滿腔熱血,當《選老頂》係另一套《十年》去睇的,必定覺得中伏,心中暗罵邱禮濤掛羊頭賣狗肉。大家以為佢會控訴制度不公義政客虛偽之類,最後邱禮濤話你知:

「政治好黑暗」

「你哋啲年青人滿懷熱血其實俾人利用」

「走為上着退出江湖先係好結果……否則就好大鑊」

而江湖腥風血雨,權力令人腐化,遁入空門先係大智慧,正係《笑傲江湖》的中心思想。

但凡此種種,係咪代表我對《選老頂》,或對邱禮濤好失望?絕對唔係。覺得好失望嘅,可能係你有錯誤嘅期望。首先,你要明白邱禮濤係個點嘅導演。要明白佢絕對唔難,佢不扮高深,而最重要係,佢執導過超過 70 套戲,大把嘢俾你研究,爭在你有冇時間睇完《陰陽路》Boxset。

邱禮濤單是今年便有 4 部電影上映,包括《兇手還未睡》。(香港國際電影節提供)

量產型工匠 執行能力驚人

對,其實都可以唔使睇晒,由佢五十幾歲執導過咁多套戲,你已經想像到佢係一個工匠。「工匠」絕無特別貶低佢的意思。邱禮濤唔係王家衞,當然亦唔係杜琪峯,佢甚至唔係雷頌德的 K 歌工廠。佢比較似早期的王晶,唔係指意識政治取態為人上,係指功能上,大家都係工匠,相當出色的工匠。評論邱禮濤,真係唔應該同評論王家衞之類同一把尺。今年佢仲有《兇手還未睡》、《失眠》同《拆彈專家》上。好多人一年都睇唔到 4 套港產片呀。

呢套《選老頂》,佢用咗 16 日拍。知道呢樣嘢後,我諗你要重新評價。作為一個工匠,邱禮濤再一次展示咗佢驚人的執行能力。創意大把人有,但 execution 其實一樣咁重要,或者更加重要。畢竟呢個世界上太多 idea 多多但成日交唔到貨嘅人,例如本人。

我唔會神化或矮化邱禮濤,佢就係一個好稱職嘅工匠。偶有佳作,例如上年廣受好評的《雛妓》,或者完全冇人留意的《浮華宴》。好片未必太多,但極爛的片更少(《青春鬥》算失敗之作)。佢就等於你樓下茶餐廳個廚,經濟實惠,偶然星期三晚會失準,食你唔死,但又冇乜必要影相寫食評講到每碗麵都可歌可泣。

香港需要邱禮濤

邱禮濤可以拍到咁多套戲,除咗佢超人嘅 execution,都要有老細肯畀佢開戲。呢度要講佢另一個優點。邱禮濤一般唔會令老細賺大錢,拍嘅戲唔為攞獎,拎到就當意外收獲。最重要係乜?係快、狠、準,長玩長有。唔會搵大錢,但一樣唔會大大超支,唔會搞幾年,唔會做毒藥。

唔好忘記,年中仲有N咁多套戲由佢執手尾。老細點會討厭佢?演員點會討厭佢?觀眾點會討厭佢?的確,咁多年嚟,好少聽人話好鍾意邱禮濤,但我從冇聽過任何觀眾演員行家話好憎佢。

《選老頂》唔會成為經典,但香港電影絕對需要邱禮濤。點解?因為基本常識話你知,出色嘅電影唔會太多,港產片仲要面對眾多對手,一年有幾套好戲已好難得。但,靠幾套戲點養得起咁多電影人?好戲仲要未必賣座。真係靠你一年睇幾次港產片?

你可以選擇無寶不落,物價又貴,人生苦短,無謂去睇《特工爺爺》甚至《選老頂》。但對成個生態嚟講,我哋唔只要幾套好戲,仲要一百幾十套普普通通的戲,最好加多幾套爛片。一個只有王家衞杜琪峯,或者《十年》《踏血尋梅》嘅世界,太悶太沉重了。

【劇照由Golden Scene提供】

(本文純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。