香港唔會做到東方荷里活 但何必要做東方荷里活?

撰文:
最後更新日期:
香港唔會再成為「東方荷里活」,但,做唔到又如何?點解香港要做「東方荷里活」?……明明係小店又要亂咁去學連鎖店,死得仲快。《雞同鴨講》教的。未睇過的搵嚟睇下。
李聲揚

專注本土也是一種出路,何必一定要成為第二個荷里活?(星光大道官網圖片)

2015 年,十大票房港產片,我睇咗 11 套,因為有套我睇咗兩次。唔好以為我無寶不落好有品味,或跟大圍多人睇我就睇。2016 年我都睇咗 16 套港產片,包括好多人聽都冇聽過的《施壓者》、《惡人谷》之類。而我當然係講在戲院睇,睇碟呀上網呀飛機上呀全部都唔計。電影節我亦冇睇任何新港產片,留返正場睇。

亦唔好以為我係退休阿伯、全職觀眾或影評人之類。掉返轉頭,2015 年香港十大票房當中嗰堆荷里活片,有 4 套我冇睇。

講呢啲,為咗話你知,我未必好有資格講港產片,但應該比好多人更有資格。畢竟你問導演編劇老細演員茶水阿姐都好,支持港產片最簡單嘅方法,就係畀錢入場。鬧冇問題,唔該畀咗錢先。鍵盤戰士打 10,000 篇文講都係冇用嘅。

望返 2015 年香港十大票房,就只得《五個小孩的校長》係港產片。本土口號夠響,但香港人有幾支持香港電影,大家心照。對,我好支持,你哋畀心機拍,不過周末都係幾舊水一家四口睇超級英雄好啲

我唔係電影工作者,又唔係文化人,甚至稱唔上愛香港,我就只係一個愛睇港產片嘅人。今次篇文唔係歷史回顧,唔係歌頌(電影人希望你畀錢入場多過寫文), 唔係建議,純係分享。

想做東方荷里活係冇可能

直入正題,今次 Blog Jamming 主題係「東方荷里活/夢工場」。即時畀埋結論你,任其他專家如何打飛機大講什麼「東方荷里活再臨」,我就話你哋諗都唔使諗,不過「夢工場」仲可以諗下。

我個人並不反對合拍片,或者「大中華片」之類,但聽聞而家主調係「本土」。若果係咁,堅持講咩「東方荷里活」嘅,唔係太離地,唔係太好心,就係連咩係「荷里活」都曲解。

香港點解當年可以係「東方荷里活」,大把文有講。你話可以舊夢重溫,即係好似而家同小朋友講「獅子山下」咁離地,「我哋當年都點點點」。當年嘅電影人當然好努力好值得歌頌,但今日嘅電影人一樣好努力好值得歌頌。你同我都好努力好值得歌頌,但你同我好努力都唔會變第二個 C 朗拿度。

同眾多流行文化,甚至足球一樣,當年香港嘅對手實力唔強。中國亦都未變崛起。咁多年之間,香港就算唔係退步都好,都唔夠人哋行得快。「東方荷里活」,如有,只可能係南韓,甚至中國,甚至日本,到印度都未到你。你唔順係你的問題,但個世界唔會因為你唔順而改變。若我預言有錯,他日你當然可以拎呢篇文嚟笑。

《狂野時速7》劇照

小小香港難與國家機器相比

荷里活係乜?荷里活係一部機器,並唔只係「人哋好努力」。大片商開戲,有晒制度,點融資,用幾錢,點發行,乜嘢題材,邊個演員,全部有數計。「藝術都有得計?」首先拍《狂野時速》就真係唔係好藝術,二來人哋開戲真係要計數,加埋美國的軟實力,以及眾多企業的財力,小小香港點相比?除非你拍埋大陸又唔同講法,但你唔係想行呢條路嘛。

係咪完全冇得鬥?未必,韓國就殺出條血路。但大家都知,韓國推廣流行文化,直頭係舉國機制,用國家機器。你想唔想像到香港限制間間戲院要一半時間播港產片(到時你可以由朝到晚睇《賭城風雲 2020》)?想唔想像到香港電影業全部係有錢財閥把持?

就當你鍾意大政府,冇所謂。OK,國家機器。香港政府支持港產片往績如何? 電影發展基金資助的《戰.無雙》,拎咗納稅人 300 萬,票房三舊水。我知,票房不代表質素,可惜我冇入場,冇得評,你睇過好好睇嘅話我知。不如講下多啲人入場,才女導演卓韻芝的《爆 3 俏嬌娃》。套戲如何?睇過你居然好意思話好好睇嘅,我請你買碟睇多次又點話?記住睇足全場喎!黃百鳴有份監製嘅《怪談之喜怒哀樂》又會拎納稅人 200 萬啦,交咗稅未呀你?

觀眾要求變高 食糊方程式唔再work

香港曾經係「東方荷里活」,除咗因為對手水平低,仲有其他原因,包括當年觀眾水平唔高。劉德華套《法外情》當年我都覺得好好睇,大個先知成套戲係照抄西片《Madame X》。不過當年資訊唔發達,冇乜人知,知亦只係一小撮人,冇得拎上 Facebook 笑。許冠文的《歡樂叮噹》照抄西片《Some Like It Hot》,周潤發套《公子多情》就係《My Fair Lady》,許冠傑套《最佳拍檔》亦都向占士邦「致敬」。凡此種種,多不勝數。

今時今日個個可以直接睇外國碟睇美劇,仲邊有呢支歌仔唱?更不用講而家觀眾水平高咗,要求高咗,而家拍返套《八星報喜》《八喜臨門》你仲係咪覺得好好笑?香港電影,至少主流嗰堆,好多都唔係以創意行先,劇本都未必係重點。王家衞係異類,更多係七日鮮的快槍手,我另一篇博評講嘅邱禮濤就係代表。有咁高產量,當年先做到「東方荷里活」。

係咪冇原創?又唔係冇。不幸地,不進則退,好多嘢都俾人學晒/抄晒。港產動作片威極一時,但之後人哋學到你。開頭仲帶挈到啲香港武指呀動作演員之類去荷里活或亞洲其他地方撈下,而家漸漸地唔使你幫。講文藝台灣拍得好過你,鬼怪片泰國拍得好過你,大製作韓國做得好過你,講銀彈又唔及大陸。

《雞同鴨講》是當年最賣座的電影之一。(電影擷圖)

做唔到「東方荷里活」 又如何?

另一樣好蝕底嘅係,你睇真啲荷里活,而家拍乜戲?都真係唔使有創意或好有心機。拍親嘅,不外乎係續集(《捉鬼敢死隊》有女人版添)、Reboot(蜘蛛俠 Reboot 得快過我屋企部廢柴電腦)、外傳(哈利波特外傳電影《怪獸與牠們的產地》之類),或者改編漫畫、小說、電子遊戲。大陸一樣行呢條路。香港有冇咁的東西?又拍《風雲》同《古惑仔》?

唔要合拍片甚至唔要變「國產片」,「本土化」係唯一出路。而要「本土」,就唔使諗咩「東方荷里活」。

用咗好多篇幅,有人可能未睇完已經開始鬧我潑冷水,咁係閣下的問題。香港唔會再成為「東方荷里活」,但,做唔到又如何?點解香港要做「東方荷里活」?假大空嘅口號,你聽得少?

港產片專注本土,我未必贊成,但亦不覺得係壞事。做唔到「東方荷里活」,又如何?有點離地,但可以睇下羅馬尼亞新浪潮(睇作者簡介都知我鍾意東歐)。羅馬尼亞電影大約自 2004 年起,在國際影壇大獲好評。香港國際電影節都成日有得睇,本人有幸睇過幾套。好唔好睇後話,但肯定嘅係呢堆羅馬尼亞電影全部都取材本土。固然佢地有賣埠,香港都有公映。票房當然麻麻,但人哋從來就唔係諗住做巴爾幹荷里活或東歐荷里活。電影在國際叫好(雖然不算太叫座),本土票房收得,仲想點?要出去同人鬥銀彈?有冇咁笨?

明明係小店又要亂咁去學連鎖店,死得仲快。《雞同鴨講》教的。未睇過的搵嚟睇下。重溫下許冠文幾十年如一日的搞笑方式,當年你好受落,而家世界唔同了。「東方荷里活」可以休矣,不過「夢工場」仲可以諗下。

(本文純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。