【來稿】糟蹋衞蘭 荒廢千嬅 只識打逆境波的黎明
順境同逆境波完全係兩種不同技巧。順境時，氣勢如虹，最重要係 keep 到個 momentum，守業為本，唔犯錯，只要偶有佳作（撞彩也好），對手已經驚咗你。偏偏黎生喺無風無浪嘅日子搞嘅嘢，金句也好，facebook 張 profile pic 也好，通常都係瀨嘢居多。
文：溫嘉煒
讚咗咁多黎明，但都要從另一個角度再諗一下。黎明可能係公關高手，但充其量係逆境公關高手。順境波？恐怕佢唔多識搞。
一手好牌 冇張打得靚
黎明過去十年，大部分時間以唱片公司老闆、舒淇男朋友、樂基兒老公等身分出現在報章娛樂版。佢作為老闆，領軍成績其實不甚如意。
黎明手上不是沒有好牌，例如楊千嬅、衞蘭衞詩姊妹、JM、最近曝光機會愈來愈多的 JW 等等，其實都各有一片天；普通一點但非完全沒有市場（或賺錢能力）的，有陳小春、李治廷；騎呢如杜汶澤、馬天佑（剛剛陪千語 BB 放狗俾壹仔影到喺草叢邊屙尿嗰位富二代）等等。
可惜絕大部分若非不歡而散，就係鬱鬱不得志，或不時爆出騎呢新聞，被傳媒唱足十世。你點想像到有娛樂大亨可以將旗下藝人身材同一部電單車相提並論？
靠直覺 逆境時啱用 順境時瀨嘢
順境同逆境波完全係兩種不同技巧。順境時，氣勢如虹，最重要係 keep 到個 momentum，守業為本，唔犯錯，只要偶有佳作（撞彩也好），對手已經驚咗你。偏偏黎生喺無風無浪嘅日子搞嘅嘢，金句也好，facebook 張 profile pic 也好，通常都係舐嘢居多。
逆境波，所有唔應該發生嘅嘢同時發生，需要嘅係拆彈專家。紅黃藍三條線剪邊條，重決斷、靠直覺，乜理論都冇用。邊樣啱邊樣錯，只能事後孔明，學唔嚟。但只要一百個炸彈之中成功拆第一個，事情就會有圜轉。奇幻 MV、暴雨 concert、摩天輪甩底等等，每一瓣都有權俾人鬧爆，但結果都會忽然順眼。
領導能力令人懷疑 好在香港人夠善忘
即使佢今次活用 facebook 為演唱會力挽狂瀾，但有幾多能力做一個領袖（甚或特首……）其實好令人懷疑。畢竟一個正常社會，好少可搞到依家香港咁亂，人人都輸。
我哋唔知梁振英打順境波叻唔叻，但至少行李門單嘢就肯定係節節敗退。不過，香港人係善忘嘅，老黎一鋪翻身，隨時做 2016 娛樂圈風雲人物，當初點樣糟蹋 JM、衞蘭嘅黃金歲月，荒廢楊千嬅等等，轉過頭就冇人記得。大家今日望住 689，間唔中都會懷念老董有幾好。所以，話唔埋十年後，大家可能會悔恨，點解冇撐梁振英做足十年。
（本文為投稿，稿件可電郵至iwanttovoice@hk01.com；文章純屬作者意見，不代表香港01立場。）