鬥公關、出身、鬥埋條命 都係佢贏九條街

撰文:
最後更新日期:

今次 Blog Jamming 嘅主題係「劉華黎明周潤發,你揀邊個做特首?」

本人保證,呢篇文唔玩嘢,唔會封面周迅咁嘅樣、入面他信咁嘅樣,唔會掛羊頭賣狗肉。

總會有人話你知呢三個都係爛蘋果,或者有人會答第四個,或者三個都冇所謂。睇落去。

我就會好正經咁答你,劉德華黎明周潤發,三選一我會揀邊個做特首。

當然只係遊戲文章,唔好以為自己真係有得揀,亦唔好對以下的結論太上心。

畀你又會揀邊個?(01博評facebook專頁圖片)

講下個分析框架。未講特首要係乜、要有乜條件,先講特首唔使係乜、唔使有乜條件。人總愛聽今期流行,實會大把人話黎明做特首。噢,點解?「因為佢公關處理得好。」我可以話你知呢個係多餘的。Donald Trump 處理公關好好?定你覺得佢係 Marketing of de-marketing?黎明「公關」得好,因為佢係黎明。梁振英即時出嚟道歉,你覺得你會讚佢?馬時亨當年,仙股事件後出嚟 90 度鞠躬,一樣俾人媽到七彩。

噢,黎明係最識玩 facebook 嗰個。可能啦,可能比馮煒光楊偉雄玩得叻。但,如果玩 facebook 叻係個重要因素,你 facebook 上堆網友應該唔少拎緊 30 萬個月。

親民?或者啦。但其實今次三位候選人都幾親民,至少表面如此。民望?我唔信呢啲。民望要蒸發可以好快。唔信問下黃之鋒。鬍鬚曾而家直頭人氣文青,估下佢上任係咪天下太平?都幾千年,華人都仲係呢啲明君心態,唔明在野小三永遠係千依百順呢個道理。

 三選一,第一樣睇乜?第一印象 

好似測字咁,即時聯想到乜。呢個絕對主觀,但我唔會造假。

劉華:勤力。即係董伯伯。

黎明:金句王。即係唐唐。

發哥:香港仔。即係曾蔭權。

三選一你自己揀,但我想講,唐唐係選唔到嗰個。第一印象,劉華發哥勝。

 唔科學?咁來個科學的。藝人從政睇乜?當然係演技。 

劉華及發哥皆曾三度在金像獎稱帝。(梁碧玲攝)

政治都係一場大戲。咁演技其實都有客觀標準嘅,例如香港金像獎。《十年》拎最佳電影呀下,保證你唔敢講金像獎冇代表性。劉華就三次影帝,黎明捧蛋,發哥都三次。真係要分高下,劉華提名次數少過發哥,「命中率」好似高啲。況且劉華拎過男配角,發哥冇。黎明都冇。

當然你可以話黎明唔係主力演戲,「唔公平」。但政治就係靠你演戲多過唱歌。而黎明唱歌不見得比劉華發哥好(對,發哥都有出唱片的,後生嘅應該搵嚟聽,我推介《舊情人》。)演技,劉華發哥勝。最後同分的話,可以秤高劉華些少。

 再比,比條命 

一命二運三風水,藝人更加明白呢點。星座太籠統,但我又冇佢哋時辰八字。咁簡單啲,睇生日。

劉華,9 月 27。有乜人同一日生日?法國國王路易十三,強人。Cosimo de' Medici,文藝復興佛羅倫斯梅迪奇家族的代表人物,國父級人馬。日本半兵衛竹中重治。現代啲嘅有韓仔泳手朴泰桓,踢波嘅有羅馬王子托迪 Francesco Totti。其他藝人有 Avril Lavigne、Gwyneth Paltrow之類。幾好。

黎明,12 月 11。代表係 John Kerry,死火,又係選唔到總統,後來執返個國務卿。從政仲有黃宏發。俄國作家索贊尼辛(Aleksandr Solzhenitsyn),拎埋諾貝爾獎,但畀人捉過去勞改。作曲家白遼士(Hector Berlioz),OK 啦,不過最後精神崩潰。足球員有「野兔」沙維奧拿(Javier Saviola)同白頭佬拉雲拿利(Fabrizio Ravanelli)。藝人有谷村新司同五月天的石頭。真係麻麻哋,冇針對。

發哥,5 月 18。俄皇尼古拉二世,末代皇帝嚟喎,大吉利市。唔緊要,仲有教宗!若望保祿二世(John Paul II),夠地位。英國哲學家羅素(Bertrand Russell),勁人。仲有艾未未。Well。名單幾好,但同劉華比爭啲,況且,尼古拉二世亡埋國。

條命,劉華勝。

 另外,睇學歷 

你心諗玩嘢嗎?三個都冇讀大學,嗰個年代唔出奇。但當今「先進國家」元首多數都頂級大學。幸好正如廖詩颺篇博文話齋,我城特首都係得一個讀過大學咁大把。不過真係要計,劉華叫做會考聽聞有個 B,中文細分有 A,勉強可以加少少分。

學歷不分勝負,但最後打和要揀嘅,一樣劉華險勝。

 之後,睇成名過程社會閱歷 

其實三位都算成名得早,三位都叫做係無綫電視產物。

劉華喺屋企小食店幫過手。

黎明就英國讀書返嚟,賣過電話。

發哥就真係乜都做過,打雜,酒店,擦鞋仔(真擦鞋),的士司機。

成名之路,照計發哥個故仔最好。

 最後,睇出身 

對,而家講根正苗紅。唔好咁偏見?我冇,不過其他人會。而家好地地冇人講,但到真係選舉,乜都有得做黑材料,民主典範美國一樣係咁。奧巴馬(Barack Obama)畀人質疑唔係夏威夷出世。Ted Cruz 仲大劑,加拿大出世。John McCain 最煩, 巴拿馬運河海軍基地出世,有排拗。

我哋三位侯選人,劉華大埔泰亨村出世,老豆做消防員。掂。

黎明北京胡同出世,老豆印尼華僑阿媽北京人。唔得「本土」。

發哥南丫島出世,老豆做蜆殼石油,仲掂。

呢個回合一樣係劉華發哥勝出再次強調,唔係我對黎明的身世有何意見,係「其他人」的意見。

寫到呢度,都唔使特別做統計。劉華險勝發哥,勤力萬歲。唔好忘記,劉華仲係唯一一個拍戲演過特首嘅,仲唔係整定係佢?

又不過,如果大會容許嘅,其實我真係有第四個,更好的選擇。就係——

郭富城!

城城憑《踏血尋梅》成功稱帝。(美聯社)

第一印象,當然係「國貨城」及佢新歡女友 Moka。好喎,中港融合實冇問題。唔好忘記城城仲係台灣紅返香港,兩岸三地都打通晒。

演技?城城都拎過一次香港金像獎影帝,唔及劉華發哥,但唔係交白卷。

條命?城城 10 月 26。猛人就多咯。其實一個李丞責已經玩晒!逆天改命,時光倒流返去 1997 前再揀過啦。正經嘅,希拉里(Hillary Clinton)一個亦都殺晒。知道咩係「托派」嘅,送個托洛斯基(Leon Trotsky)畀你。鍾意風流人物有法國總統密特朗(François Mitterrand),佢歸天嗰時情婦私生女同正室一齊去葬禮,威水未?要 exotic 啲嘅,有伊朗沙王巴勒維(Mohammad Reza Pahlavi),或者玻利維亞現任總統(Evo Morales)。城城條命真係帝王命。

講學歷,城城都聖若瑟中五,唔失禮。

講出身,筲箕灣出世,小學讀慈幼,冇乜問題。成名路上佢更加曲折,做過景福金行,之後入無綫。但佢在無綫真係霉咗一排,最後先因為台灣電單車廣告「反攻」香港。啱晒呢排個個講李斯特城 style。

最重要係,城城先係公關高手。劉華秘婚呀生咗個女,黎明演唱會開唔成,發哥拍王晶片俾人鬧之類,濕碎。其實你諗下,郭富城啲新聞先最大件事(主要係佢的女伴)。由熊黛林攻城 33 小時、偷食芒果王秀琳、到唐季禮藤原紀香,仲有最新的 Moka,單單新鮮。當然仲有最經典,已經冇乜人提起,1999 年在澳洲開演唱會,疑搭上女歌迷,俾人設局偷拍,仲有人想賣片畀傳媒。呢啲先係真危機處理。搞得掂咁多女伴的,先係真公關高手。

(梁碧玲攝)

最後,城城同其他三位唔同,佢未結婚(黎明就離咗婚),大可以學韓國朴槿惠咁,「嫁給國家」,保持單身。畢竟,既然當年城城可以答應歌迷 30 歲前唔失身,照計,做咗特首一樣可以答應大家唔結婚,全心全意「迎娶特區」。

(本文純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。