黃色血脈的ViuTV 是時候進步了

撰文:
最後更新日期:
ViuTV身為一個新電視台,可以話係含住金鎖匙出世。唔係話佢大把錢,而係食正大部分後生仔都誓神劈願話唔會睇無綫嘅時代出世,根本天生就要成為大台嘅敵人。
方以文

(黃永俊攝)

我個facebook專頁嗰邊,有人戲謔ViuTV做「黃屍台」,話佢好大陣黃絲味,所以唔會睇。留言無講點解佢會有咁嘅感覺,不過都唔難估嘅,因為喺ViuTV出現咗一班唔會喺無綫出現嘅人,例如長毛、何韻詩、葉蘊儀,更加有新台大鑼大鼓咁狂sell嘅《100毛》創辦人林日曦,又直播毛記電視台慶,全部反政府立場都好鮮明。不過其實亦出現過唔少建制派人士,好似曾鈺成、葉劉淑儀、蔣麗芸咁,都粒粒皆星,至於觀眾留意咩嘢feel到啲咩,就控制唔到喇。

但係我想講,ViuTV 咁多個人咁多個腦,無理由無考慮過或者諗唔到呢個感覺。全盤睇返,可能仲係有意營造出嚟嘅添。

被時代選中的電視台

ViuTV身為一個新電視台,可以話係含住金鎖匙出世。唔係話佢大把錢(雖然佢老闆係當收視如浮雲嘅阿Richard),而係食正大部分後生仔都誓神劈願話唔會睇無綫嘅時代出世,根本天生就要成為大台嘅敵人。既然大台有班慣性觀眾,新台又決定唔去硬碰,就自然要搶一班永遠唔睇大台嘅人,當中包括咗一班叫無綫做「CCTVB」嘅泛民支持者唔駛做,唔駛靠父蔭就已經有基本盤,所以新台話自己最高有68.9萬人收睇佢嘅節目一啲都唔出奇,大台話佢僭建根本一聽就係戇居啦。

(ViuTV網站圖片)

新台唔似無綫,無乜自己嘅藝員,雖然負擔細咗,但亦都要煩搵咩人去做節目。須知道由八十年代開始,香港好大部分嘅娛樂人物,無論一二三線,都係由電視台培養出嚟。當無綫依家都畀人話緊青黃不接、新台又唔似王維基咁大大力挖角嘅時候,就只好喺大海裡面撈。最現成又有知名度嘅,包括咗一班之前畀王維基挖走依家係公海浮沉嘅演員、一班models之外,仲有一班無綫唔理佢嘅歌手。不過講有gimmick、有noise、有高知名度嘅,一定係班日日喺新聞都見到嘅政客。

要切合時勢賦予ViuTV嘅黃色血脈,就唯有搵泛民班人,更何況大台一向唔會將政治同綜藝劇集撈埋一齊,無人理嘅新領域,新台唔做就嘥料啦。喺政治世界風起雲湧嘅時間,一涉及政治,自然有觀眾埋位。而嗰班「政治嘅嘢我唔識」、「政治啲嘢唔關我事」嘅潔癖人士,就會覺得新台係「黃絲」,會「破壞和諧」而唔睇。不過新台唔駛驚,因為呢班人如果係睇電視嘅,都應該係睇大台為主,因為佢啲節目夠「乾淨」嘛。

(毛記宣傳片截圖)

綜合以上嘅講法,同毛記電視合作就真係啱晒路。又有年輕人支持,又「政治正確」,最緊要係毛記班偽員啲人氣仲勁過ViuTV班藝員,WinWin雙贏,所以先會有史上首次電視台直播另一個電視台嘅生日派對。講出嚟都夠晒新意啦,一晚幾個鐘貨仔節目,根本唔會有人去討論個質素,邊度有得輸?

流住黃血係唔夠嘅!

之但係天生流住黃色血又唔係大晒嘅。觀乎依家ViuTV嘅大部分節目,都係只有gimmick,實際操作同製作嚟講,始終同無綫有一大段嘅差距。一個月已經過咗,新台嘅第二波節目就出街,要睇吓有無進步喇。你知啦,香港人最實際,大部分嘅觀眾好似我咁,好就睇唔好就轉台。你睇吓大台杜如風《關西攻略》收視去到24點,跟手破埋今年2230時段最高收視紀錄,再睇吓《跟住矛盾去旅行:林日曦VS蔣麗芸》網上負皮如潮湧,就知道觀眾唔係盲㗎啦

(ViuTV網站圖片)

話說回頭,喺我個facebook留言話絕對唔睇「黃屍台」嘅嗰位朋友,希望你明白,就算你真係討厭黃絲、視佢哋為敵人,你都需要知道敵人做緊咩嘅。開電視睇ViuTV啦,你又唔係AC Nielsen嗰特選800戶收視調查戶,開唔開電視都影響唔到收視㗎。如果唔想自己嗰吓收視計落對家嗰度,好簡單,唔好上網或者用App睇就得㗎喇,呢啲就真係會計落所謂嘅「綜合收視」度喇。

熄電視?我唔會囉。大氣電波我有分㗎!唔好話去到投訴咁激動啦,都要望實佢哋班友搞邊科啩。

(本文純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。