總評《瑪嘉烈與大衛系列 綠豆》:ViuTV的電視劇實驗

撰文:
最後更新日期:

由「你的寂寥和我的孤僻」到「只因剛好經過」,ViuTV開台劇《瑪嘉烈與大衛系列-綠豆》經過三個月,終於嚟到尾聲。

最初被一班傳統觀眾柴台,認為佢節奏慢、鏡頭唔郁、拍唔到啲角色塊面、多雜聲,

到上星期第24集,周家怡同埋林保怡嘅solo式演出,成功引起咗唔少電視迷嘅討論,可以話係「愈跑愈有」。

我就等緊今個星期大結局,好想知大衛最後會點,趙子龍又會點,粒綠豆又喺邊。

周家怡同埋林保怡嘅solo式演出,成功引起咗唔少電視迷嘅討論。(網上截圖)

《瑪嘉烈與大衛》作為劇集,喺力谷實況綜藝嘅ViuTV,佢嘅宣傳可以話係無聲無息,而對於ViuTV嚟講,呢個應該係電視台做嘅實驗。睇返最近嘅情況,今次實驗,係成功試得出香港電視劇係可以有其他發展方向嘅。

(睇到呢度,你都可以感受到我係《瑪》劇粉,以下大部分都係我對《瑪》劇嘅讚美嚟,唔啱睇都希望你盡量睇,大家討論吓就最有益。)

第一:講咗好耐講到口臭,話後生觀眾唔會再日日留喺電視機前面。

無綫用《武則天》開拓星期一至七21:30線,成功令到唔少年紀稍大嘅忠實觀眾喺星期六日,都留喺屋企睇電視,但就明顯唔理班後生仔(或者佢哋都覺得後生唔再睇佢)。

今次《瑪》劇夠膽一星期只播兩集,跟足日韓嘅玩法,應該係想試吓香港同日韓觀眾係咪都一樣,大多都會星期一二留喺屋企,而星期五六日先出街。

新台總經理魯庭暉喺早前一個講座,曾經回應參加者對呢個編排嘅質疑。佢話,唔擔心觀眾唔記得節目播出時間,因為好睇就會記得,真係唔記得就會上網睇返,而佢哋亦唔似無綫咁,勁快將啲劇落架,由得啲觀眾慢慢睇。不過我就話佢應該一早睇到家陣啲觀眾無咁 loyal,而且仲係大勢所趨,所以今次ViuTV將《瑪》劇放喺星期一二夜晚23:00播,就畀佢扑中咗。

(無綫之前都試過一星期播兩集劇。2011年嘅《飛虎》就係喺星期六日播,當年嘅最高收視喺大結局出現,有36點。但依家當然唔能夠同日而語,馬國明都話有27點已經好X高。)

第二:有觀眾揶揄《瑪》劇嘅「MV式」拍法。

靚嘅鏡頭構圖、少變化,無乜剪接,好多時hold住一個鏡頭開波,就到嗰節嘅結束。大台劇、亞視劇,甚至係維基劇都無呢個情況。嚟到導演 FatBall 同 25 手上,就成為咗每集半個小時嘅《瑪》劇嘅特色。

靜止嘅鏡頭角度,好夾呢個故事各個角色嘅拉扯。尤其係喺第24集,周家怡飾演嘅瑪嘉烈,喺餐廳見到趙子龍同Candy 以情侶姿態出現時,嗰種有嘢又要扮無嘢嘅演出,仲有最尾林保怡飾演嘅大衛喺屋內痛哭,鏡頭唔郁嗰種令觀眾等睇演員 show off 嘅氣氛,真係好少喺香港電視劇見到。

第三:故事發展到瑪嘉烈同趙子龍喺摩天輪上kiss之前,其實都分唔清主角們係好人定衰人。

每個人都錯少少又未錯晒,每個人都好似想挽回返件事咁。就連廖碧兒飾演勾人老公嘅Diamond,故事都營造到佢只係一個得唔到佢想要嘅愛嘅可憐女人。呢種角色設定,又係大台劇裡面少見嘅,而鍾意睇《瑪》劇嘅人,叫呢一種做「貼地」。喺世界上生活咗一段時間嘅人,都應該唔可以斷言自己係個百分百嘅好人,但喺無綫劇集世界裏面,好多時都淨係得白同黑、無灰色。大台成日俾人話「離地」,就係因為佢一啲都唔生活化。

今次好多人都會覺得自己同埋前度都係瑪嘉烈、大衛或者趙子龍,就係因為我哋都試過做半白不黑、半衰半好嘅人。有剛分手嘅朋友同我講,話睇《瑪》係自虐。唔夠貼地,根本做唔到呢個效果。

網上有人話《瑪嘉烈與大衛系列綠豆》係「神劇」,呢方面就見仁見智。不過,《瑪》劇嘗試開拓電視劇嘅唔同方向而又幾成功,呢樣就抵讚。無綫今個星期開始,喺 J5 開多個煲劇時段,星期一至七,2230晚晚播足一個鐘,明顯係因為翡翠台《晚間新聞》收視下滑而變陣。無綫新聞嘅質素下降當然對收視有所影響,但我覺得點都關《瑪》劇事啩。唔知傳聞會接《瑪》劇嘅處境劇《三一如三》可唔可以得到大家嘅支持,又會唔會突破大台嘅處境劇模式呢?拭目以待。

(本文純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。