離地膠劇 要怪電視台取消了兩個崗位

撰文:
最後更新日期:
ViuTV將會首播佢第二套自家製劇集《三一如三》。新台宣傳時話呢套係「實況處境劇」,到底係咪用實景就叫做「實況」就未知,不過我心目中嘅「實況處境劇」,暫時就只係得無綫嘅《香港八一》至《香港八六》系列…喺資深電視迷心目中不可取代嘅處境劇《香港八幾》系列,成功在於夠貼市……喺中英雙方商討緊香港前途問題嘅 1980 年代,市民開始討論政治,《香港八幾》系列就食正個勢。
方以文

ViuTV將會首播佢第二套自家製劇集《三一如三》。(ViuTV截圖)

ViuTV將會首播佢第二套自家製劇集《三一如三》。新台宣傳時話呢套係「實況處境劇」,到底係咪用實景就叫做「實況」就未知,不過我心目中嘅「實況處境劇」,暫時就只係得無綫嘅《香港八一》至《香港八六》系列。

冇諷刺 冇時弊 《香港八幾》之後冇處境劇

行內人叫處境劇做 sitcom,即係 Situation Comedy「處境喜劇」。拍攝方法主要係,將啲演員放喺幾個主要場景裏面,然後交代故事發生,諧趣為主。好似依家深夜重播緊嘅《皆大歡喜》,劇集初期嘅主要場景就係「洞蜜園」茶樓加金家大宅;《愛.回家之八時入席》就係電視台。劇裏面發生嘅事,絕大部分都同現實社會無關聯,稱唔上「實況」同「處境」。資深電視製作人鄧特希喺一個訪問當中講過,呢啲應該只可以叫「短劇」。

劇裏面發生嘅事,絕大部分都同現實社會無關聯,稱唔上「實況」同「處境」。(無綫電視截圖)

喺資深電視迷心目中不可取代嘅處境劇《香港八一》至《香港八六》系列,成功在於夠貼市。當年無綫希望《香港八幾》系列,可以做到商台廣播劇《18 樓 C 座》咁,寫一班草根階層喺茶餐廳討論吓民生議題、諷刺吓時弊,玩共鳴。喺中英雙方商討緊香港前途問題嘅 1980 年代,市民開始討論政治,《香港八幾》系列就食正個勢。劇組初期以即日新聞做題材,一日之內寫、拍、剪、播,務求新鮮熱辣,成功得到支持,一做就 6 年,同依家啲成日畀人話「離地」同「膠」嘅劇集好唔同。

編劇重要 但「故事」與「資料搜集」都緊要

好多人都將啲「離地膠劇」歸咎於編劇質素差,其實唔可以怪晒佢哋嘅。無綫以前嘅創作組,除咗編審、編劇之外,仲有兩個一度消失咗但係好緊要嘅崗位:「故事」同埋「資料搜集」。

「故事」即係 story maker,相傳係當年創作部大佬劉天賜創立嘅崗位,負責度故事大橋。做得呢個崗位嘅人都有返咁上下份量,個個都係才子才女,包括甘國亮、陳韻文、沈西城咁。呢班人諗好個故事之後,就交畀編劇去度分場、寫對白,編審就去統籌整合。

「資料搜集」就為編劇搜集資料,最厲害嘅係安排編劇直接去見要寫嘅人物,寫警察就去訪問警察、寫地盤工人就去地盤度睇吓佢哋嘅工作情況咁,角色同橋段有血有肉,係有原因嘅。

不過呢兩個職位都喺 1980 年代尾消失咗(唔知同 1988 年香港電視集團改組有冇關係),從此編劇就冇咗 backup。(更正:「資料搜集」崗位於後來重新設立)

《不速之約》好似日本漫畫《死亡筆記》(網上圖片,無綫電視截圖)

有朋友早幾年做過大台編劇,話佢哋有間資料房,裏面放晒漫畫同小說,「靈感」好多時都由嗰度嚟。咁就可以理解點解早幾年大台會有好似日本漫畫《死亡筆記》嘅電視劇《不速之約》,同埋好似《日式麵包王》嘅《情迷黑森林》。呢位熱愛創作嘅朋友當然好快頂唔順走咗啦,因為佢完全睇唔到有咩創作同發揮空間。

如果依家啲電視台仲有「故事」同埋「資料搜集」呢兩個職位相輔相成,你估啲劇會唔會好睇返啲呢?

(本文純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。