熱血勵志不再 王道日漫係咪沒落?

撰文:夏水
出版:更新:
當下好似只係得返草帽一伙努力咁支持住熱血夢,戴志偉、鳴人、星矢通通已離場,如果有日尾田老師都收工,係咪亦都意味住「王道動漫」正式從江湖消失呢?或者我哋應該先諗下,點解呢幾年所謂「邪道」嘅動漫咁得人心。
夏水
《Jump》曾經最Hit嘅三本漫畫:《One Piece》、《死神》、《火影》都係算係王道漫畫系列。

我呢,係日本動漫奶水湊大嘅。

余家貧,去圖書館以外,屋企部 18 吋電視就係最大娛樂。喺粵語殘片未播嘅上晝,同埋《五稜鏡》未播嘅黃昏,陪住我嘅就係《功夫貓黨》、《機甲桃太郎》、《魔神英雄傳》、《魔動王》……到夜深,偷雞喺上格床爬落地,諗住可以獨霸電視睇星矢或者孟波,結果就被一早坐喺電視面前嘅舅父斷正押解回床。唓,條友肯肯定自己想睇《城市獵人》之嘛!

再大啲,開始有啲零用錢,就會買漫畫嚟睇,然後同同學交換睇,再然後就走去租漫畫睇。對比起今日拎起部電話,就可以「用自己方式」睇新番,當年呢陣古早味真係值得再三回味。

熱血勵志王道動漫退潮 揭盡人性醜惡邪道元素大熱

以前嘅少年動漫,包含嘅都係所謂「王道」元素:即係夠熱血勵志,主角無論係為咗拯救世界,定係成為世界第一球王,都會努力特訓強化自己。敵人好勁咩?唔驚,仲有精神時光屋畀你出少少術;打輸咗咩?唔緊要,歹角一定唔知點解留你一命,等你有機會苦練後再報仇。再殘忍嘅現實,都無法子打倒主角嘅夢想!用返漫畫雜誌《週刊少年 Jump 》嘅講法,就係強調「努力」、「友情」同「勝利」。

有老鬼話,近年啲動漫無咗呢種熱血汗臭鹹味。除咗 Jump 曾經嘅「三本柱」:《One Piece》、《火影》、《死神》之外,好多大熱嘅動漫,好似《死亡筆記》、《魔法少女小圓》、《進擊的巨人》、《20世紀少年》等等,唔只一啲都唔熱血勵志,反過來仲揭盡人性醜惡黑暗一面,根本係走上另一端嘅「邪道」。

當下好似只係得返草帽一伙努力咁支持住熱血夢,戴志偉、鳴人、星矢通通已離場,如果有日尾田老師都收工,係咪亦都意味住「王道動漫」正式從江湖消失呢?

或者我哋應該先諗下,點解呢幾年所謂「邪道」嘅動漫咁得人心。

喺「決斷主義」影響下,少年人選擇相信嘅理念百花齊放,動漫發展自然走向更多元化。(《進擊的巨人》官網)

日本經濟環境轉變 王道動漫熱血變離地

動漫同電影一樣,係反映社會現實嘅一面鏡,將創作者對社會嘅解讀同諗法呈現咗出嚟。1970、1980年代係日本經濟嘅黃金期,亦都同時係少年漫畫嘅黃金時期,呢個並唔係單純一個經濟巧合,而係信念嘅一脈相承──「只要你努力,未來就喺你手中!」王道動漫世界,邪永遠不能勝正,結果永遠係壞人被罰,正正係整個社會相信「努力就可以獲回報」嘅一種憧憬。

之但係,1990年代起,日本進入泡沫經濟崩壞嘅時代:可以憧憬嘅未來變得黑暗、努力唔擔保一定有回報、會社唔再係終身制、過勞死流浪漢比比皆是,令年青人唔再相信「努力有得食,好人有回報」呢套王道理念,更難叫佢哋去睇熱血到離地嘅王道動漫。

研究社會變遷會點樣影響動漫劇情同結構嘅日本評論家宇野常寬,喺佢嘅書《 00 年代的想像力》中就話,呢種氛圍最初令年輕人選擇「隱蔽」,唔想再做任何決定(因為都改變唔到絕望),到後來慢慢轉化成一種「決斷主義」、「相信某件事物,然後行動」,採取任何手段以求活下去。

動漫走向多元化 王道動漫吸納邪道元素

喺「決斷主義」影響下,少年人選擇相信嘅理念百花齊放,動漫發展自然走向更多元化:既然努力無用,點解仲要按傳統去盲目追求力量?所以有鬥智嘅《死亡筆記》、《 Liar Game 》,亦有講以複雜念能力系統、屬性互剋嘅《全職獵人》;既然服從社會主流會不得好死,點解唔自己去話事?於是又有《反逆的魯魯修》出現。正邪界線再唔係絕對,而係按信念決定,傳統正義方嘅魔法少女,係《小圓》嘅世界裏面,代表嘅只係身不由己嘅可悲,而墮落嘅魔女,又豈能話佢哋就係邪惡?

《一拳超人》省卻主角訓練嘅「王道」情節,換成爽快嘅節奏同自嘲嘅境況。(《一拳超人》官網)

2011 年日本 311 大地震,對創作者又帶嚟變化,除咗有各種「末日感」重、要為生存而戰嘅作品面世外。另一位日本評論家東浩紀喺一次演講中就指出,災後整體文化現象由以往嘅政府疏離變成與社會有連結,文化界主題唔再脫離政治化之餘,亦開始以關心地區為本位去創作,因此陸續出現更多非王道向的作品。

拋咗咁多書包,我始終覺得百花齊放係好事,而王道動漫係會繼續存在。關鍵係點樣吸納邪道動漫優秀嘅元素,好似《一拳超人》,省卻咗主角訓練嘅「王道」情節,換成爽快嘅節奏同自嘲嘅境況;又或如《暗殺教室》,王道嘅成長走向但配上「殺人」嘅反差等等,不斷轉變、修煉、進化,唔好只識賣萌、賣肉、殺必死,王道漫畫嘅生存之道,正正就是一種王道。

何況,成年人總係有需要王道動漫嘅時候,畀自己一啲向前走嘅動力。當現實不斷磨蝕意志,有咩比起睇動漫主角跌倒再起身嚟得勵志?抹一抹眼角感動嘅眼淚,我哋又再咬緊牙關努力向前行,呢個就係王道動漫嘅力量!

天呀!收筆就諗起《天元突破》,係時候翻睇了!

(本文純屬作者意見,不代表香港01立場。)