【無綫台慶】想台慶騷好睇其實唔難

撰文:
最後更新日期:

我唔係 TVB 鐵粉,但始終睇 TVB 大,有一定感情。我認我唔化,11 月 19 日係要開電視睇吓一班藝員為無綫慶祝生日先至安樂。

今年大台 49 周年,台慶大騷《萬千星輝賀台慶》慘不忍睹,就連係大台粉絲嘅朋友都喊得一句句。另一位01 Blogger游大東喺佢篇《過埋 50 周年 TVB 應取消台慶的三大理由》裏面,已經講咗台慶騷嘅前世今生,大家有興趣可以去睇睇。

不過正如游兄話齋,無綫礙於面子,唔會取消年年都要搞嘅《萬千星輝賀台慶》,咁不如踏實啲,睇吓台慶騷點搞先好睇。(睇到呢度如果你唔鍾意大台,可以慳返啲時間唔駛睇落去,我哋下次再傾。)

今年大台 49 周年,台慶大騷《萬千星輝賀台慶》慘不忍睹,就連係大台粉絲嘅朋友都喊得一句句。(電視截圖)

游大東:【咪搞啦!】過埋50周年 TVB應取消台慶的三大理由

游兄提到台慶對香港觀眾再冇意義,其中一個原因係佢唔再送車、送樓、送獎金畀啲觀眾(其實今次台慶都有送奬品畀觀眾,但要迫你裝 TVB Fun)。講句真,今時今日,睇得無綫台慶嘅都係佢啲粉絲,送隻 TVBuddy,甚至唔送嘢都照睇啦。之不過呢幾年就連大台粉絲都話悶,歸根究底就係無咗陣「無綫味」。

唔好睇 因為冇咗無綫味

以今年台慶為例,大小表演環節 13 個,無一個係有 TVB  feel,你換咗啲非無綫藝員上陣,都可以達到各個環節嘅效果,咁請問啲無綫粉絲又點會覺得過癮?畀我搞,今年有氣勢如虹嘅《城寨英雄》同埋《律政強人》,仲有口碑好嘅《 EU 超時任務》,有乜可能放過佢哋?

當年《金枝慾孽》收得,台慶都搵返劇中角色登場,做個趣劇環節。今年台慶《城寨英雄》四個主角齊晒腳喺晒度,《 EU 超時任務》王浩信唔見人都仲有朱千雪,《律政強人》就有李佳芯同何廣沛,點解唔用佢哋呢?你唔好話佢哋無時間喎,趣劇根本唔駛點排,何況用返佢哋劇中嘅角色去做就更加無難度。粉絲睇得開心又有共鳴,啲演員又可以為嚟緊嘅《萬千星輝頒獎禮》宣傳造勢,順便再推埋個節目叫人記得投票,一舉三四得,唔做就蝕底啦。最搞笑係郭晉安同黃德斌喺度,點解唔宣傳大台所講嘅壓軸台慶劇、耗資 200 萬拍攝嘅《致命復活》呢?

今年台慶《城寨英雄》四個主角齊晒腳喺晒度,《 EU 超時任務》王浩信唔見人都仲有朱千雪,《律政強人》就有李佳芯同何廣沛,點解唔用佢哋呢?( 《城寨英雄》宣傳海報)

無卡士的錯覺 永恆世代交替問題

游兄又提到台慶表演內容年年一樣,只係靠卡士去吸引觀眾,呢個 point 我認同。只不過台勢已去,當年嘅梁朝偉、張學友、郭富城、劉嘉玲、林憶蓮、葉蒨文,的確粒粒皆星,但粒粒星都係無綫所出,又或者想靠無綫宣傳,更加可能想拎《勁歌金曲》獎,邊個敢唔畀面呀?今時今日,台勢弱,加上同唔少唱片公司反面,搵邊個嚟賀你個壽呢?(其實點解要搵街外人幫你慶祝生日,我又係諗唔通嘅。)

又,「當年巨星」呢個 term 值得諗諗。今時今日嘅「巨星」就係當今嘅一線歌手,電視台嚟講就係當家小生花旦。九十年代四大天王出嚟,都有人話唔夠阿倫、哥哥、梅姐勁,呢個係永恆嘅世代交替問題。當然作出比較、力求進步係應該嘅,亦都唔可以成日都將價就貨。但理智啲睇,營造「當年巨星」嘅環境可一不可再。今日喺刀鋒上打拼磨練緊嘅人,我哋都應該畀返啲鼓勵佢哋。

全晚最啱數嘅係「福祿壽」阮兆祥、王祖藍、李思捷嘅棟篤笑。(電視截圖)

度度都錯少少 最終錯到離晒譜

話說回頭,其實當年所謂「強大卡士」都係塘水滾塘魚,今日無咗啲「巨星卡士」,都仲有二百個藝員可以搞搞佢。既然表演內容年年差唔多,無綫又話自己二百個藝員卧虎藏龍(呢個我認同嘅),點解唔安排啲人做啲啱嘅嘢呢?

全晚最啱數嘅係「福祿壽」阮兆祥、王祖藍、李思捷嘅棟篤笑,講返今年個台發生咩事,投入資源又少又有效果。趣劇咩?其實可以派張繼聰、陸永、C君,請埋 DoDo 姐就 perfect。跳舞咩?啲舞蹈藝員都係資產喎,做乜唔用佢哋?功夫新星表演嗰啲唔算係真功夫,係經剪接嘅武術表演,點解唔抽走梁烈唯,打場硬橋硬馬真功夫?(唔抽埋鄭俊弘,係因為人哋識打功夫嘅,細細個就練蔡李佛,喺美國拎好多州際比賽冠軍,仲拎埋中國國術教練牌)度度都錯少少,成件事就可以錯到離晒譜。

曾勵珍點名稱讚嘅馬貫東、鄧佩儀,前者就無影,後者就混咗喺四人彈奏鋼琴環節裏面。(電視截圖)

上緊位藝員唔見影 內鬥用人唯親所害?

另外,《萬千星輝賀台慶》貴為粉絲必睇嘅一線騷(《歡樂滿東華》粉絲唔會追住睇啩?),圍爐取暖,就係個好機會去宣傳上緊位嘅藝員。以舊帶新,將佢哋介紹畀觀眾,做好交接。上緊位嘅人會出行力博埋命,學陳凱琳話齋「粉身碎骨」都在所不計,重現當年嘅高難度驚險表演就有人選(我唔明點解啲人會覺得藝員表演空中飛人、行鋼線會好睇。應該係鬥有關表演嘅事先合埋)。不過呢個交接又係做唔到。

觀眾近年最受落嘅新人何廣沛,同埋即將成為男二嘅郭子豪,都被安排為康華、樊亦敏、馬蹄露伴舞,講句嘢都無份。憑《一屋老友記》爆出嘅「細寶」張彥博更加搞笑,成晚坐咗喺觀眾席。另外曾勵珍點名稱讚嘅馬貫東、鄧佩儀,前者就無影,後者就混咗喺四人彈奏鋼琴環節裏面。真係搲爆頭甩頭髮都唔明,通通係不解之謎。

好喇,講到呢度,你係咪想話所有嘢都係內鬥、用人唯親所害呢?但諗深一層,角力永遠都有,以前珍姐、樂小姐咪又係鬥到死,都可以有好嘢睇。咁關咩事呢?係無人敢出聲?定係有人聽完當無事發生?我哋喺外圍做塘邊鶴嘅,始終都係得個估字。

(文章純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。