港劇同性戀角色都沒有好結果?

撰文:方以文
出版:更新:

電視行業係流行文化嘅重要推手,由電視劇嘅內容、觀眾對電視劇題材嘅反應,可以側面睇到一個社會點樣看待電視劇所提到嘅議題。
喺香港電視劇當中不乏同性戀或者有同性戀意味嘅角色,睇電視台點樣設定「同性戀者」,可以反映社會對同性戀者嘅睇法。

不存在的同性戀社群

第一類,亦都係最常見嘅設定,有現成例子,就係播緊嘅大台台慶劇《幕後玩家》當中嘅偉仔(李豪飾):着住粉紅色西裝、行路扭扭吓、豎起隻手指做蘭花手、對男同事挨身挨勢,以搞笑甚至係丑角嘅形式出現。另一個大家都可能記得嘅同類型角色,就係《巴不得媽媽…》嘅蘇基,古明華仲以呢個丑角奪得2012年嘅大台最佳男配角獎。呢一類「得啖笑」嘅搞笑角色,好少會講明佢哋係同性戀者以避免歧視,之不過取笑同性戀者嘅意圖都幾明顯。最記得蘇基結局係同溫裕紅所飾演嘅男人婆相愛,有種「撥亂反正」嘅意味。呢種類型嘅設定,彷彿係話你知某啲電視劇嘅世界裏面唔會有同性戀者,係觀眾有誤會。(當然絕大部分電視劇連同性戀者嘅影都無)

沒有心路歷程的人物

第二類,就係收收埋埋,到最後先話你知係同性戀嘅角色。好似係2008年《珠光寶氣》鍾意Calvin(林保怡飾)嘅Sunny(黃德斌飾)、2011年《潛行狙擊》鍾意Co哥(黃宗澤飾)嘅爆登(沈震軒飾)。佢哋都係同性戀者鍾意異性戀者嘅角色,但係同性戀身分對於劇情嘅重要發展可以話係無乜推動。同性戀者身分對於個角色亦都無乜貢獻,無令到角色更立體。呢一種設計,喺電視劇世界裏面確認咗同性戀群組嘅存在,但係唔會同你交代佢哋面對啲咩問題,心路歷程更加唔駛旨意有。唔會去了解佢哋,亦都唔畀觀眾去了解。

陳自瑤飾演嘅Natalie喺《幕後玩家》中是一名女同性戀者。(電視截圖)

有戲份的同性角色

第三類,係有背景嘅同性戀角色。呢類唔多,咁啱大台嘅《幕後玩家》亦都有,就係陳自瑤所飾演嘅Natalie:為前度同性戀人籌錢醫病而監視顧成勳(陳煒飾),之後亦會同顧成勳有感情線。呢個角色已經算係立體同有戲。當然唔少得《瑪嘉烈與大衛系列 綠豆》當中嘅趙子龍(潘燦良飾),佢為咗大衛(林保怡飾)去試煉瑪嘉烈(周家怡飾),大家睇到咬牙切齒。呢類角色算係畀觀眾一個機會去了解同性戀者,深唔深入就係另一回事。

香港沒有同性戀人電視劇

雖然分咗幾類,但係喺香港電視劇裏面嘅同性戀角色,都有一個共通點,就係佢哋都唔可以同所愛嘅人修成正果,唔係意外死咗,就係愛上異性戀者唔會有大圑圓結局。香港人成日自詡香港係國際大城市,偏偏係咁多個華人城市社區裏面最保守,電視劇當中嘅LGBT群組除咗無完滿嘅結局之外,角色亦都無辦法坐正做主角,相對於同樣係華人社區嘅大陸同埋台灣,我哋到依家都無一套講同性戀人嘅電視劇。

台灣喺2003年,由公視改編白先勇先生嘅小說《孽子》,拍成同名電視劇,以同性戀者遇到的種種個人同社會問題為主軸寫成,播出後得到各方關注,仲攞咗金鐘獎多個獎項。大陸就喺今年2016年初,出咗套以同性愛情故事為骨幹嘅網劇《上癮》,極受歡迎,令兩位男主角紅遍神州。就連日本喺2015年都有以女同性戀者為題材嘅《Transit Girls》,仲要係富士電視台播。香港呢?仲係未有。我哋只係不停搵返1977年《家變》裏面嘅Louis(任達華飾)同埋Mike(駱應鈞飾)出嚟,證明香港電視劇、香港社會可以好前衛。差唔多40年前嘅事喇,有句說話叫做不進則退。衷心希望香港電視劇,同埋電視劇外嘅現實世界,所有有情人都可以終成眷屬。 

(文章純屬作者意見,不代表香港01立場。)