【電視大事回顧】無綫進軍網絡 ViuTV後勁不繼 港視開台無望

撰文:方以文
出版:更新:

年尾流流,係時候做個大事回顧,尤其是今年香港電視業界有人退、有人上,唔講咁多,立即睇吓今年發生咩事!

  1. 亞視不再永恒

拖咗好耐嘅亞洲電視終於喺今年4月1日結束,完成佢接近59年嘅廣播使命。呢間全球首間華語廣播電視台,喺最尾幾年已經無乜出品,之不過佢執咗,對於電視迷嚟講難免感慨一番。臨結業之前,有唔少人搵啲亞視迷出嚟傾偈,講吓呢位老大哥以往嘅威水史。生榮死哀,對一班支持ATV嘅忠心粉絲嚟講,死可能唔係最傷心,最傷心嘅係對家無綫買咗唔少亞視嘅經典作品,要申請myTV SUPER先睇得到,換個方式再唱「亞視會~永遠都存在~」。

  2. ViuTV強勢上場

亞視死咗,觀眾期望一台獨大嘅形勢可以靠新電視台ViuTV改變。ViuTV主打實況綜藝娛樂,同大台以劇集牽頭的方向唔同。頭一輪一口氣推出嘅各個綜藝節目都令人非常有好感,包括咗大家拭目而待嘅《跟住矛盾去旅行》亦做出好成績。另外,夜晚23:45線嘅「實驗電視」,亦爆出咗網民好buy嘅《衝三小》。聲勢夠,可惜後勁不繼,收視愈來愈低迷,亦都無乜talking point,開台半年就蝕咗6,800萬。

  3. myTV SUPER上場 免費電視成二等公民

2016年嘅4月除咗亞視收檔,ViuTV上場之外,仲有無綫「第二大平台」myTV SUPER正式出世。呢個以網絡為主打嘅收費平台,令到唔少有gimmick或者係翡翠台唔敢播嘅節目,先喺佢度試下水溫先,好似係以性做話題嘅電視劇《性在有情》同埋有好多強姦戲嘅《巾幗梟雄3之諜血長天》咁。亦都有啲係大家期待嘅劇,都會放喺myTV SUPER播,好似係《愛情來的時候2》咁,先放喺myTV SUPER,隔成幾個月先喺翡翠台免費播。

你覺得《愛情來的時候2》、《梟雄3》都唔係好嘢嚟啫……咁萬眾期待嘅韓劇《藍色海洋的傳說》,仲有由大台退休轉投寰亞嘅Tommy哥梁家樹拍嘅《無間道》電視版,仲仲有鄧特希監製嘅4K電視劇《隱世者們》,呢啲全部放咗喺myTV SUPER。想喺翡翠台免費睇到呀?暫時J5就播緊《隱世者們》嘅,其他……慢慢等吓囉。

  4. 港視再申請無功而還

香港電視胎死腹中,12萬人喺行政長官會同行政會議決定唔發牌畀港視嗰陣好激動,上街去政府總部集會以示不滿。不過ViuTV開台之後,大家嘅不滿就少咗好多。

其實王維基2013年10月不獲發牌之後,喺2014年4月再次申請免費電視牌照,希望東山再起。一拖再拖,終於喺2016年9月,特首同行會將港視第二次申請發還通訊局,叫王維基再畀多啲資料補充,但魔童先生話佢無嘢可以再補充,質疑梁政府拖字訣。後來王維基喺今年立法會選舉參加港島區直選,唔少港視支持者希望佢入到局爭取發牌,可惜無功而還。自此之後都好少再聽到王維基有咩動作去爭取免費電視牌照,大家都相信佢係等梁政府任期過咗再嚟。唯一繼續有變化嘅喺港視股價,梁振英12月宣布唔爭取連任時,港視股價急升50%。可惜王維基唔夠票做特首選委之後,股價回吐。

  5. 上海梅鐸入無綫 大刀闊斧改革

有上海梅鐸之稱、紅色背景商人黎瑞剛2015年4月成為無綫主要股東,今年10月就做埋董事會副主席兼非執董,唔少人怕無綫進一步赤化。

係咪進一步赤化就未知,但係黎副主席坐入董事局之後,無綫就動作多多,大刀闊斧咁決定2017年摺埋收費電視,又推出「第三大平台」Big Big Channel,繼myTV SUPER之後進一步向網絡進發,希望搶返網絡話語權。雖然唔清楚呢啲變化同黎副主席有無關係,但時間上係巧合嘅。期待大台愈變愈好。

  6. 成也矛盾 敗也矛盾

《跟住矛盾去旅行》係ViuTV嘅皇牌節目、開台主打,搵對立嘅人物一齊去旅行,令到新台一開波收視衝到去68.9萬人(根據新台自己統計)。第一輯未播完,大家喺網上面已經討論緊第二輯搵邊個去拍好,最終有梁天琦VS侯志強、王丹VS馮敬恩。不過播都未播,就出現咗「因為王丹、馮敬恩於節目進行拍攝期間私下開記者會宣揚港獨」而抽起節目唔播。王丹之後出聲明,話一切都係ViuTV嘅安排,最後ViuTV亦承認係老屈佢哋。令到一眾政治顏色「偏黃」嘅觀眾火都嚟,話唔再睇新台。藍色就一向都唔睇佢,覺得佢係「黃屍台」,新台立即被遺棄。

不過令到ViuTV最進退失據嘅,係抽起咗《矛盾2》之後,令到本來要嚟11月打大台台慶嘅武器唔用得,而最慘係根本無第二個節目有同樣嘅關注度去打大台。最後新台播演唱會、播貓狗相關嘅節目,無人理,無眼睇,都可算係新台最大嘅打擊。受過傷先知道要堅強,新台可唔可以喺2017年盡快重整旗鼓呢?

  7. ViuTV直播連環出事

自從ViuTV出現之後,好多以前J2會直播嘅盛事,主辦單位都會畀咗99台去播,皆因起碼係主要頻道,覆蓋率同埋對活動嘅名聲都好啲,偏偏ViuTV就喺直播出事。先係10月,香港首次舉辦一級電動方程式大賽,新台連續兩日直播。第一日去到最尾時間,賽事淨返兩個圈左右,就硬cut去播新聞,好多觀眾睇到呆咗,齊齊去ViuTV Facebook聲討。ViuTV極速補鑊,喺當晚重播賽事,但係直播變重播觀眾接受唔到,最後ViuTV道歉。

以為經一事長一智,可惜喺12月直播全港韓迷期待嘅《MAMA 2016頒獎禮》時又領嘢,喺啲一線人氣歌手表演時去廣告,令到一眾韓迷嘈到拆天。連環兩次直播出事,跌到一地都係眼鏡。不過新台終於學精,1月1 日將會直播《叱咤樂壇流行榜頒獎典禮》,事先講明係無廣告無間斷直播,希望可以扳回一城。大家望到實,希望佢唔好再出事…

  8. 綠豆熱潮

以為新台用綜藝節目打大台,但估唔到嘅係周一、二晚播嘅半小時電視劇《瑪嘉烈與大衛系列 綠豆》會成為城中熱話,我估連新台自己都諗唔到。ViuTV製作部副總裁金廣誠,搵小說家南方舞廳嘅作品改編成為電視劇,用嘅係拍開音MV嘅導演,打破咗大台拍劇嘅固有畫面同埋陳述方式,新鮮感仲有貼地嘅愛情觀令到好多睇厭咗大台劇嘅觀眾熱烈支持,喺網上不停宣傳,形成熱潮。結局林保怡同周家怡嘅solo亦都令到兩位演員嘅演技再一次備受認同。

不過新台執到豆唔識煮,乘住個勢加開咗四集SP就令唔少觀眾反感,因為一個鐘嘅劇裏面,有成55分鐘都係炒返以前播過嘅片段,再另加5分鐘新片。網上一片媽媽聲。而後繼接力嘅實況處境劇《三一如三》就令觀眾大失所望,新台嘅追劇潮一下子就唔見咗,好可惜。

黃浩信和朱千雪憑《EU超時任務》贏得「最受歡迎劇集搭檔獎」。(梁碧玲攝)

  9. EU刀下得民心 城寨打到紅

新台有套《綠豆》,大台年初都有兩套劇有口碑,包括咗邵美琪、黃德斌主演嘅《刀下留人》同埋王浩信、朱千雪主演嘅《EU超時任務》,當中《EU》仲勁到有網民分析結局,可惜兩套都係叫好唔叫座。直到下半年出現咗sell真功夫嘅《城寨英雄》,大台先叫做有一套叫好叫座嘅電視劇,全民投入討論。

爛船都有三斤釘,《城寨》好睇在真功夫、角色描寫立體,就連配角好似係演小智嘅李日昇、夏滿哥嘅李嘉、楊老闆嘅歐瑞偉、爛賭發嘅魏惠文、鑫鑫嘅林穎彤咁,都成為一時熱話。不過大家最好記住,套劇係好睇,但對於有將近50年經驗嘅無綫嚟講,啲劇應該係要拍到呢啲水準先叫做合格。

  10. 大台頒獎 民間回應

一年一度大台頒獎禮,毫無疑問受到觀眾流失影響而得到低收視,不過我夠膽講仍然係全港電視迷嘅焦點所在。大熱嘅《城寨英雄》囊括視帝視后、最受歡迎男女角色、最佳劇集等獎項成為大贏家。不過就有好多網民為其他演員抱不平,包括《巨輪II》當中一句「臭雞」揚名嘅鷲哥吳岱融,以及《EU超時任務》當中無限輪迴嘅渠頭王浩信、Madam Ling朱千雪。不過有討論、有talking point仍然係好事。

有網民就搞咗個全民提名、全民投票嘅電視大獎。視帝視后分別係《瑪嘉烈與大衛系列:綠豆》嘅男女主角林保怡、周家怡。最佳女配角就係同劇嘅廖碧兒,而最佳男配角得主就係《巨輪II》嘅吳岱融。希望2017繼續有跨平台嘅電視大獎,亦都希望投票人數多啲,個結果先有說服力,唔使淨係睇住大台自己個頒獎禮。

(本文純屬作者意見,不代表香港01立場。)