當勁歌總選變成Sunday靚聲王

撰文:
最後更新日期:

已經好幾年無坐定定睇《勁歌金曲頒獎典禮》,上一次有睇又有記憶嘅,係王菀之O晒嘴咁拎金曲金獎。上網睇返資料,原來係2012年嘅事。唔睇係因為勁歌總選愈來愈自我中心,頒畀自己友嘅氣氛愈來愈濃,又年年都悶,睇都無謂。

咁點解今年又無啦啦想睇返?唔係因為佢公信力有改善,你睇宣傳片話有王浩信、陳展鵬、胡定欣出席就知咩料。睇,係因為大台用咗「1/2世紀樂壇」嚟做今次頒獎禮嘅主題。無綫今年踏入49年,唔等下一年就搶閘sell半世紀,又話有歌神許冠傑、杜麗莎、林志美撐場,所以想睇吓佢搞乜。

事先張揚有歌神許冠傑,原來係有佢段片。(節目擷圖)

頒獎禮重點竟是回顧樂壇?

用「回顧半世紀樂壇」做頒獎禮主題係極之奇怪,一個屬於2016年嘅樂壇頒獎禮,點解重點要放喺回顧呢半個世紀嘅樂壇度,而唔係表揚今年努力嘅歌手、音樂人呢?就算真係用呢個做theme,個騷嘅rundown設計都出問題:一開始應該係用許冠傑開頭,而唔係杜麗莎。

杜麗莎打頭陣,唔講以為勁歌都新增咗個「金針獎」。(節目擷圖)

Sam Hui始終都係廣東歌歌星始祖,你手上得條預錄片段都好,點都要膽粗粗放opening啦,最多喺緊接唱許冠傑medley時再加多啲有份量嘅歌手撐場,咁先有個清楚嘅脈絡,之後安排杜麗莎、林志美出場就無咁尷尬。尤其係林志美,依家出到嚟個效果好似用嚟攝時間咁。(而絕大部分歌手係無時間唱晒成首歌)

《勁歌》主持大師姐盧敏儀出現,講哥哥同阿倫當年趣事。(節目擷圖)

另外,節目又安排咗《勁歌》「大師姐」,喺1980年代拍住鍾保羅做主持嘅盧敏儀上嚟,分享下譚詠倫同埋張國榮年代嘅樂壇見聞。之後又有《勁歌》另一位前任主持阮兆祥上嚟講四大天王。講真,現今身為大律師嘅Money肯上嚟係有驚喜,加上之後有陳柏宇同林奕匡合唱哥哥同校長嘅歌,又真係有啲睇頭。

JW、泳兒、欣宜今唱Diva組曲。點解唔合唱返自己嘅歌呢?(節目擷圖)

另外,泳兒、JW、欣宜合唱DIVA組曲都好聽。慘就慘在加加埋埋,成個騷懷緬過去嘅感覺愈來愈濃,好有《Sunday靚聲王》嘅feel,真係睇到我個心好唔舒服:明明一年只係得幾次機會去表揚當年努力過嘅歌手,點解會將個重點放咗喺啲前人度?我唔係話前輩唔駛尊重、唔值得大家記住,但呢件事唔應該喺勁歌總選度做吓嘛?咁邊個尊重今年付出咗努力嘅音樂人呀?

向MAMA學習

睇得出監製麥鎮東同一班製作團隊好想打破以往頒獎典禮嘅模式去爭取收視,呢件本身係好事,但係要清楚個方向先得。請問如果年度音樂頒獎禮唔係用嚟表揚今年出過力嘅音樂人,仲搞嚟做乜?要做好個頒獎禮有好多方法啫,最簡單係參考MAMA。我知一定有人話我媚韓,但係人哋個騷真係做到「present啲歌手今年做過啲乜」呢個目的,你挑戰唱吓我今年唱到街知巷聞嘅嗰首歌,我挑戰跳下你今年風靡全樂壇嘅嗰隻舞,或者索性安排唔同公司嘅歌手crossover做特別舞台,比拼之餘又可以喺頒獎禮當中突圍,成為節目嘅宣傳重點。喺香港做唔做到?有心就一定得。好簡單,今年叫欣宜唱《你是你本身的傳奇》,再叫方皓玟唱《女神》,己經夠爆夠gimmick啦。

與其懷緬過去,不如讓方皓玟唱《女神》更有睇頭。(符祥定攝)

咁樣搞,音樂頒獎禮先吸引到觀眾去睇,亦都可以話畀樂迷知道香港係仲有樂壇嘅,而唔係好似今次勁歌總選咁懷緬過去,或者好似呢幾年叱咤咁不停話你知香港樂壇好危險。係,危機意識要有,但係唔可以成日講,你叫啲音樂人抱住咩態度繼續做落去好呢?要觀眾睇返音樂頒獎騷,除咗各台要停止不合理地頒畀自己友令到啲獎嘅含金量繼續跌之外,亦都要諗吓點樣運用當年歌手唱嘅歌去做個騷嘅元素,咁先係正路嘛。

(文章純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。