奇妙電視(如果)上場,電視格局:師奶、大嬸、麻甩仔

撰文:方以文
出版:更新:

九倉吳天海一句話唔再泵水畀有線電視,大家當堂呆咗,一眾電視迷擔心佢旗下嘅「奇妙電視」會唔會未開台先摺埋之時,奇妙嘅事就發生,佢繼續搞節目巡禮,話畀大家知5月14日開台(諧音「唔一定死」?)。
我就梗係希望佢開到,雖然啲節目唔係咁啱我口味。但係鹹魚青菜各有所愛,最緊要係有得我揀,唔使再睇嚟睇去得一個台。如果真係開得成,各個台嘅走勢取向會係點呢?

( 《城寨英雄》宣傳海報)

大台係師奶

成日話大台走下坡,但係佢的確仲係香港電視業界嘅龍頭。希望ViuTV一出嚟就可以扭轉乾坤係有啲不設實際,你睇吓上年一套《城寨英雄》同埋今年嘅《親親我好媽》立即搶返大家焦點,始終佢資源同經驗最多,爛船都有三斤釘。大台就似一個平時喺屋企打理家頭細務但間唔時會出去飲下嘢嘅年輕師奶,往日係位出晒名嘅美女,依家年紀稍長,但係要佢出去玩,佢化個靚妝都仲有戰鬥力,不過就唔係成日畀你睇咁囉。

最緊要係,佢有班好閨密觀眾,會一直支持佢,平時hea住嚟都仲得。要留意返呢位師奶佢生咗兩個仔,一個叫做J2,仲有個後生啲嘅叫做「Big Big Channel」。前者暫時好似孤兒咁,好似乜都唔理佢,但血脈相連,間唔時畀下錢佢叫佢幫手打下新台都咪話唔得。Big Big Channel擺明係搶年輕人客,得唔得要放長雙眼、等佢四月launch先知。

ViuTV係麻甩仔

(《瑪嘉烈與大衛系列綠豆》宣傳海報)

新台呢?就似個血氣方剛但唔係好識得planning嘅麻甩仔,有啲想法,但係冇乜執行力。開台係威係勢,但係過咗半年就無以為繼。最初諗住玩自己嘅規則,可以獨步天下,但係開台一年,嚟緊四月嘅新節目安排就同大台一樣,星期一至五打橫線播劇集,算係間接認咗自己做錯咗。

不過我想同新台講,你係無錯嘅,因為睇你台戲嘅觀眾係一班對比大台相對後生嘅人,亦都有一班自覺睇無綫好娘嘅人,佢哋有嘅係其他生活,或者已經佔佢地生命大部分時間嘅工作,真係唔會星期一至五坐定定睇你電視播乜。如果你諗住同大台爭班師拉客就更加無謂,因為佢哋同亞視班最後觀眾一樣,會睇到天荒地老先至收手,同大台共存亡。我推斷,就算新台橫線劇好睇都無用。上次《綠豆》爆,係因為有時間蘊釀,一個星期播兩集,播足三個月。大家傳下講下,後段先至做到個氣勢。依家玩一星期播五集,如果新台以一貫無乜做宣傳嘅宣傳方法,我就無眼睇喇。就算搵實力非凡嘅朱凌凌擔大旗做第一套劇,拍到識飛都無用啦。

奇妙電視係大嬸

若奇妙電視上場,將會是一個比大台更老成的「阿嬸」。(奇妙電視圖片)

佢係一個大嬸。無錯,佢係一個比大台更老成嘅阿嬸。我唔知佢內裏有冇鬥心,但係佢節目巡禮畀我嘅感覺係為一班捉唔到潮流嘅大嬸去度身訂造嘅電視台。你睇吓佢個節目巡禮,主持嘅年齡層好高,對我嚟講係冇亮點可言。

鍾慧冰、張學潤、茜利妹主持嘅《娛樂巴巴閉》係喺有線娛樂台完全移植過嚟,講八卦娛聞,呢個啱晒啲唔上網睇嘢嘅人睇,如果唔係一早睇晒我做乜仲要睇你?樓南光、Coffee、吳日言嘅性題材節目,我估都超越唔到新台嘅《晚吹 - 啪啪聲太好聽》。《香港人香港事》同《香港有寶證》sell本地但係講舊嘢,都唔會吸引到一班後生仔去睇。《帶阿媽去旅行》、《朝拜傲媽》就開宗明義啦唔再多講。唯一我會考慮下睇嘅係《杜汶澤食住上》,但又係煮嘢食加訪問,大台大把有得睇……總之成個台,我都睇唔到有咩新意。面對住大台都有涵蓋嘅觀眾層,情況唔太樂觀。

港台?永升亞洲?

我再重申,免費電視廣播頻譜係公共資源,要大家睇實。大家都有份,最好就大家都可以搵到自己想睇嘅節目去睇。所以呢個「師奶、麻甩仔、大嬸」嘅電視格局,對於香港電視界嚟講都叫有進步。至於港台電視呢,叫林鄭或者鬍鬚曾上場後畀多啲資源先再講。話要搞專業資訊形象嘅永升亞洲呢?你睇下葉劉,入唔到閘乜都唔使講啦。或者好似我咁,做核心外圍嘅觀眾一齊吹吓水囉。

(文章純屬作者意見,不代表香港01立場。)