【不懂撒嬌的女人Ｘ春嬌救志明】跨劇場：Mall姐救春嬌

「博？！所以我從來都話女人應該喺事業上去博、去畀心機，畀心機就有回報，唔似得感情，付出幾多，收到幾多，從來都唔合理。你依家連結婚都話要博？你話我知，你有冇諗清楚。」

時：晚上十時

地：中環某coffee shop

人：電影《春嬌救志明》余春嬌（嬌）、無綫電視劇《不懂撒嬌的女人》第八集Mall姐凌敏（M）

［Mall姐坐在咖啡店中滑手機check工作電郵、發訊息予下屬指示工作。良久，春嬌急步趕到。］

嬌：Sorry Mall姐，個客突然call我，話要傾晒個job。以為好快搞掂，一傾個客就停唔到，呢樣改，嗰樣又改……

M：唔緊要，幾時都係工作最重要。食咗嘢未？叫咗個沙律畀你，煙肉碎蛋。

嬌：［舉手，示意店員落單］Latte呀唔該。Mall姐你未叫嘢飲？

M：［眼光投向枱上清水］咖啡少飲。

嬌：之前跟你嗰時，記得你成日飲咖啡。

M：戒咗。嗰時博到盡，我哋同你哋化妝店簽咗約，你公司派你跟住我北京香港兩邊走，幫你哋舖入商場，日踩夜踩。唔好話咖啡，雞精都當水飲。

嬌：講起雞就想嘔。佢哋話個job落咗姑婆咒，兩邊飛唔使旨意溝到仔。高層唔肯接，派我呢個中低層跟呢壇嘢。不過話時話，北京天氣咁乾，飲咖啡又躁又去水，都唔明點解啲北京妹皮膚咁好，把聲嗲起上嚟又咁鬼高音。我呢啲，人dry聲dry皮膚dry，好在公司畀我落返嚟香港，如果唔係真係大嘟鑊。

［Latte到。嬌呷了一口放下，左顧右盼。M望實嬌。］

M：春嬌，我為你好，先至約你出嚟，等足你半個鐘都等。

嬌：我知Mall姐對我好。仲好就得我，約我嚟你最憎嘅coffee shop。

M：唔係憎，不過我原則係喺coffee shop唔傾公事，只傾私事。

嬌：［呆，吸口氣、坐直、呼氣］Mall姐，我結婚，想請你嚟飲。

M：我就係想講張志明。點解你咁唔自愛，要同個人渣結婚？喺北京嗰時成日為咗佢喊苦喊忽。本來我以為個衰人冇樣好，遲早你都會甩咗佢。台北旅行地震，你又喊住打嚟，話佢淨係顧住自己唔理你。轉個頭，唱首歌詞唔啱音嘅爛鬼歌，夾埋隊唔啱beat嘅樂隊，搞場大龍鳳向你求婚，你就應承？我一路都以為你醒過Cherry，點知原來都係一樣，畀啲男人玩完一次又一次。

嬌：Mall姐。我需要張志明。我決定博一博。

M：博？！所以我從來都話女人應該喺事業上去博、去畀心機，畀心機就有回報，唔似得感情，付出幾多，收到幾多，從來都唔合理。你依家連結婚都話要博？你話我知，你有冇諗清楚。

嬌：我冇Mall姐你咁叻，諗嘢咁清晰理智。但係我問過同你一樣咁叻嘅人，佢哋個答案係50:50。博咗唔知得唔得，但唔博一定唔得。嗰個係張志明，所以我博。

M：咁冇保障嘅事，做咩要畀咁多心機去做去博？仲要畀機會一個有前科嘅男人？50:50，結婚都拎嚟賭，你係咪傻咗？

［沙律到］

嬌：［拎起叉，撥弄沙律］成世人流流長，總會遇到幾個仆街。但係又點知個仆街唔會改？或者我哋自己都係仆街呢。

M：余春嬌，你講咩？

嬌：Mall姐，我睇韓劇話，如果將女人簡單咁分成兩種，一種就係需要另一半，一種就係可以食自己。［嘗試將沙律中的菜、煙肉、蛋分開］張志明係仆街個個都知，見到女就痕，放狗都可以掛住溝女，放到狗都唔見埋。但係我好肯定，我好想、好需要佢幫我放狗。我唔可以日日的起心肝返工之前晨咁早喺海邊跑步放狗。常滿聽你order，可能係你train得佢好，但好大部分都係因為佢愛你。

M：常滿諗乜你都知，但係就唔知同張志明一齊係錯？

嬌：咁你知唔知常滿好怕熱？男人同狗一樣，佢愛你嘅話可以就晒你，但始終都有爆煲嘅一日。其實無分男女同狗，個個都一樣。Mall姐，你EQ咁高，對住賤人Gordon都畀佢激到掉電話。人，始終會爆煲。我想搵一個佢爆煲時我忍到佢，我爆煲時佢忍到我嘅仆街，一齊仆住街咁過一世啫。［只食沙律中的煙肉］女人可以有事業，但都可以有愛情，冇衝突。如果人生係50:50嘅話，咁都可以50%係喺事業上求穩定，另外50%係喺愛情上博一博啫。

M：［將碟搶到自己面前，將碟中沙律菜挑開，撥到自己碟中。靜了片刻］揀咗日子未？

嬌：揀好話你知！

M：［將只剩下煙肉和蛋的碟還給嬌，自己食菜］條路自己揀，仆街唔好喊。

［嬌大笑，M微笑］

-完-

（文章純屬作者意見，不代表香港01立場。）