【奧斯卡】演技論英雄？好彩唔係！
Leonardo DiCaprio 已橫掃大部分頒獎禮，獨欠最重要的奧斯卡小金人。係好似必勝。如果，我只夠膽話如果，一個唔好彩，爆冷呢？暴亂都似。
我知我知，今屆奧斯卡，大家的焦點只會放在Leonardo DiCaprio 做唔做到影帝，連最佳電影係邊套都無人關心。又不是《十年》。
佢再輸 暴亂都似
打開口牌。《鐵達尼號》（Titanic）老拍檔 Kate Winslet 一早講明 feel 到係佢，肯定會親身出席，見証好友攞獎。仲唔係營造公眾期望再構成輿論壓力？事實上，Leonardo DiCaprio 已橫掃大部份頒獎禮，獨欠最重要的奧斯卡小金人。係好似必勝。如果，我只夠膽話如果，一個唔好彩，爆冷呢？暴亂都似。
相對於未睇過《復仇勇者》（The Revenant）的觀眾，睇過的，肯定較少。無所謂，大家支持個人，不是支持套戲。是感情分，也是同情分，同情分是累積下來的。第四度提名影帝，以其走紅二十年的產量與質量，老實講，算偏少。尤其2010年的《不赦島》（Shutter Island），演得出色，但無聲無色，最令人可惜。2013年的《華爾街狼人》（The Wolf of Wall Street)，出盡九牛二虎之力，偏偏遇上為演活愛滋病患而狂減47磅的Matthew McConaughey。以頒獎禮不成文的鬥慘潛規則，無可能唔輸。
這位演員很努力，很搏命，很想做到影帝。失明人士也看得很清楚。比畢彼特（Brad Pitt）優勝，在於公信力高得多，沒有人夠勇氣批評他的演技。因此，假設他今屆守得雲開，大家只會說輪都輪到，值得的，高興的。即使，大家可能未看過他在《復仇勇者》的演出。吊詭的地方正於此：獎項，不是應該以當屆的作品成績論英雄嗎？好彩唔係咋。否則，《丹麥女孩》（Danish Girl），以 Eddie Redmayne 的細緻，應該輕鬆取勝。
Eddie Redmayne 技勝一籌也冧莊難
《丹麥女孩》的拍攝時間，在去年奧斯卡頒獎禮前後，即 Eddie Redmayne 憑《霍金：愛的方程式》（The Theory of Everything）摘下影帝殊榮之際。去年，他跟《飛鳥俠》（Birdman）的 Michael Keaton 叮噹馬頭，說是埋門僅勝，也不為過。如果，評審團敬老，獎座落入飛鳥俠手，沒人會驚訝或反感，但我敢說，今屆有套更具說服力的《丹麥女孩》參賽，一定會補償給 Eddie Redmayne。
不是說 Leonardo DiCaprio 演得比較差。他是比較落力。做事過分落力，通常會帶來反效果。現在不用補償，係要連續兩年頒給 Eddie Redmayne 來錦上添花，有沒有可能？有，但機會率大跌。我的意見是，下周一朝早，Leonardo DiCaprio 眾望所歸的話，記得，請 Michael Keaton 飲茶。
（本文純屬作者意見，不代表香港01立場。）