【盜墓迷城.影評】擺明跟Marvel,都唔使跟咁足啩?

撰文:
最後更新日期:

跟風不是問題,歷史上,無數跟風之作,做不到青出於藍,也自成一格。沒有《賭神》,不會有《賭聖》,但《賭聖》引伸出一系列周星馳喜劇,周潤發也做不來。因為,周星馳根本沒有意圖倒模周潤發。

環球推出的Dark Universe電影系列,就似乎欠缺同樣的自信。手持隱形人、科學怪人、狙魔人等等角色,希望建構一個共用的宇宙,擺明是唔抵得Marvel的大成功。無問題,有心唔怕遲。都唔使跟到咁足,同埋咁心急掛?

【編按:以下內容或含劇透,逃生門在此。

Reboot 1999年《盜墓迷城》(The Mummy)作為第一炮。選擇Tom Cruise作為男主角,已經見到信心不足。係呀,因為中魔咒因為打古埃及邪靈因為幾千年的傳說,Tom Cruise呢個角色,最後成為半人半神,在Dark Universe往後的出品,會再度登場。所以一定要用大明星?再深入睇睇個角色設定,係一個無賴,係一個古惑仔,基本上係一個小朋友,你叫今時今日的Tom Cruise去扮演?我唔提Tom Cruise的演技有幾好有幾差,事實上以Tom Cruise的年紀、身份、地位,根本無可能返老還童演活一個死𡃁仔。除了迷信Tom Cruise的名氣和有一定程度的票房保證,我完全想不到還有任何理由要勉強到如此地步。你話,仲搵返洪金寶做鷓鴣菜,得唔得先?跟《鐵甲奇俠》(Iron Man)找來Robert Downey Jr.的用人唯才,差別太大。

然後,話就話係Dark Universe,但可以理解成《魔盜王》化,即係減少恐怖感,用官能動作取代。所謂的木乃伊,已經進化成《The Walking Dead》的喪屍;那個應該法力好強的古埃及公主,其實連少少邪惡的殺傷力也沒有表露過,只令人感覺是一個愛情至上的可憐花癡。Dark得很童話。無計呀,黑暗宇宙也要老少咸宜嘛,你看《神奇女俠》(Wonder Woman)的簡簡單單便大受歡迎。可以想像,未來的科學怪人造型,會參照《IQ博士》。

只可以輕嘆一句,迪士尼真係勁,勁到連競爭對手都怕了,只敢站在同一條戰線上奮力追趕,而不夠膽量開拓另一條方程式。這一齣新版《盜墓迷城》,情節不通,人物平面,場面重覆,定位模糊。跟之前上畫的另一套同類作品《金剛:骷髏島》(Kong:Skull Island)比較,好像還要再差多一級。搞到我開始吹毛求疵,連片名都看不過眼,我說中文片名。既然明刀明槍想將不同經典角色大串連,就無理由用返舊名《盜墓迷城》啦,應該跟返英文片名叫木乃伊,最多加個形容,例如木乃伊王,或者埃及邪神之類,方便日後聯盟,咁先夠視野宏觀嘛。唉,可能,又係關信心不足事。都係叫返《盜墓迷城》,最緊要穩陣,少改少錯。

難掩一臉失望,陪我看戲的朋友只好安慰我一句:「唔係吖,套戲至少有一項特點。講到個古蹟在伊拉克被發掘,搞到之後天下大亂,都係因為美軍於當地搞搞震,咪好反映現實情況囉。」她果然是一個關心國際局勢的好學生。

(文章純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。