進擊的Big Big Channel,能攻陷誓死唔睇TVB的人嗎?

撰文:
最後更新日期:

一再推遲,推到大家都覺得佢可能出唔到街嘅無綫「第三平台」Big Big Channel,今日終於正式登場。其實早幾日已經可以download到,我就試咗一輪,同大台一直宣傳嘅明星直播、網劇、KOL節目範疇大致上係一樣。對於呢個app嘅功能,我就覺得唔係新鮮嘢,同韓國早幾年已經有嘅「V App」根本上係一模一樣,冇新意。(韓迷應該好熟悉呢個App,我建議大家可以download嚟睇吓,人哋真係做得好好,仲早幾年做咗)

今次唔講內容,唔講個App好唔好用(因為佢始終未正式launch,可能有勁嘢未出嚟,個使用量會唔會迫到佢死server又唔知),純粹想講吓點解成日畀人話一成不變、毫無鬥心嘅大台,肯用咁多錢同時間去做個App出嚟?

一成不變、毫無鬥心嘅大台,何以肯用咁多錢同時間去做個App出嚟?(資料圖片)

新平台集中改變力量

大家都知大台嘅觀眾層年紀愈來愈高,始終要開新客源。不過呢班始終係最穩定嘅客源,唔可以太激進,如果唔係趕走班舊客時新客又儲唔切,大台就係咁先。最近佢肯開星期六日2130劇我估都係試吓班後生會唔會睇,或者一星期兩集嘅速度可唔可以令到班後生觀眾上網睇返。佢敢試,係因為周六日收視已經冇起色好耐。而周一至七咁播劇,收視始終會因為星期六日而拖低。喺冇得再差嘅情況下,可以一試。但其他嘅嘗試呢?就放晒喺其他平台。

籌備經年絕非冒險

Big Big Channel絕對唔係好多人所諗咁樣橫空出世。事實上係一步步籌備到今日,又或者係誤打誤撞集合咗之前嘗試過嘅嘢而出現嘅一個「新猷」。網上互動直播喺「myTV SUPER」facebook成日做,累積咗一定經驗,啲主持習慣咗點應付網民嘅反應。而啲啱後生口味嘅短片,甚至係惡搞自己友嘅片,就一直由「See See TVB」呢個平台做緊,仲喺冇大台宣傳下自己儲咗10萬個粉絲,要為新平台提供啱後生仔女口味嘅片絕對唔係問題。

你mark咗就唔會錯過

好喇,咁點解唔繼續用myTV SUPER同埋See See TVB呢兩個已經穩定嘅平台,而要冒風險將啲嘢搬去Big Big Channel呢?咁係因為Big Big Channel有主動性。有時做到啲後生仔啱睇嘅嘢,問題就出咗係reach唔到啲後生。呢個App就解決咗呢個問題,end-user可以follow鍾意嘅藝人,有咩關佢事嘅都會通知你。有一班人佢哋唔睇TVB嘅平台(包括電視同facebook)係因為唔鍾意某部分嘅藝員,你一like一follow呢啲平台就難免會見到佢哋。依家新玩法就冇咗呢個問題,隨時仲會因為某啲男神女神級數藝人,吸引到一班誓死唔睇TVB嘅人去like去睇藝人嘅專屬頻道,開發新觀眾。

用戶可選擇只follow喜歡的藝人。(資料圖片)

廣告收益非同小可

最重要嘅係,無綫可以利用呢個平台去賣廣告。經理人合約藝員如果畀人睇中咗落廣告,可以話係「目標觀眾喺晒度」。舉例,胡定欣嗰個健康食品廣告,廣告商搵佢再拍一輯,無綫就可以賣埋個Big Big Channel畀佢,叫胡定欣做幾個live又得,索性做個5分鐘節目播又得,仲要唔受到廣播條件監管,點植入廣告都唔怕你投訴、罰錢。Follow咗嘅粉絲十之八九都會睇落去,靠呢班咁集中目標觀眾所衍生出嚟嘅廣告收入非同小可,連埋電視廣告成個package咁賣,都幾和味。

金禧綜藝一池死水

《降魔的番外篇——首部曲》將於Big Big Channel播出。(tvb.com)

講到呢度,到底Big Big Channel有冇壞處呢?有,暫時可以見到嘅係無綫金禧50周年嘅綜藝節目全面低水,都係炒冷飯多。點解關事?因為Big Big Channel係綜藝科阿頭Sandy姐「全力以赴,做到最好」嘅project,顧得頭又顧唔得髻。以為50周年綜藝節目點都有好嘢睇?或者睇Big Big Channel好啲,我個人嚟講就想睇楊潮凱擔正、有張曦雯、鄧佩儀嘅《降魔的番外篇——首部曲》,仲有農夫做主角、演豬八戒同沙憎嘅《西遊之八戒與沙僧》兩套網劇。你又會唔會download個App望望?

(文章純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。