【攝影.與父親】老豆,就是不一樣

撰文:
最後更新日期:

我老豆,就是跟你老豆不一樣。

最近因為一個廣告,畀我同老豆有機會合作去影一張相,對我來講,係一份最有紀念嘅禮物。

老豆兒時經歷過日本仔打仗,嚟到香港,基本上一生都無豪華過,以前鍾意賭馬、買六合彩,但橫財運一直都無遇過,反而畀阿媽日鬧夜鬧。

我、老豆和第一部電腦 

喺我六年級時,我實在太沉迷電腦,當時係Pentium 133年代,我同老豆講,計劃每星期儲40蚊零用錢,儲到中三時,應該就有一萬蚊去買第一部電腦。因為咁,我連踢完波都唔捨得買野飲,被同學笑每星期先儲40蚊,幾時先到一萬蚊呀?而家諗番,慶幸自己係一個會發夢嘅小朋友。

當然,呢40蚊無順利儲到,唔係自己洗咗就係被人偷咗。喺一個貧困家庭,有錢剩係有啲顧慮,但阿爸一直都知道我好想要部電腦。

終於來到中三,一萬蚊沒有儲到,但我仍然沉迷電腦。呢個時候橫財神就遇上我阿爸,上帝用咗老豆一生嘅運氣,幫佢中咗一張六合彩三獎,當時三獎只係一萬四千幾蚊,而老豆就畀咗所有錢我哋去買第一部電腦,而我亦因為呢部電腦,改變咗以後所有事,包括現時工作事業與興趣。

有眼光 押重注 影響我的前路

現在想想,舊時一萬蚊真係好多,我哋係一個貧困家庭,突然有舊錢就買咗我最想要嘅嘢,完成咗一個小朋友嘅夢,畀我繼續發夢落去。以一個賭博嘅人嚟講,算係將重注再次壓落我身上,但因為興趣使然,我可以帶住呢一注走到好遠好遠,亦係到現在我認為老豆係一個好有眼光嘅人,佢亦將最好嘅嘢畀左我。

因為有電腦,我同老師一齊研究,整班會網頁,影相將所有相放喺網頁上同討論區。雖然沒有大作為,但就影響咗我將來,決定由土木工程轉到修讀媒體設計。

將老豆拉進攝影工作 意料之外的收獲

以一個攝影師身分,有一個工作係影老豆,內心會好矛盾——到底係一份回憶,抑或係賣老豆出去。

但在整個攝影過程,老豆都非常努力配合,最後出街那張相,實在太喜歡,我從未喺佢身上見過嗰種充滿話語嘅眼神,所以更高興同佢有一個相處機會,有一個難得的「真・父子檔」廣告可以出街。

將老豆的一次印象留下,很現實,要珍惜同老豆相處嘅時間,更珍惜每一次我為他表現的機會。

廣告出街,雖然很多網民有意見,但對我來說都似放屁,每一個意見,令我更肯定需要堅持自己的思維,不被單一化,不隨波逐流。曾聽說,如果你想張相在網路多Like,將最平凡的照片放出去就是了。

我老豆,就是跟你老豆不一樣。​

 

【編按:相片由作者提供。】

(本文純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。