【惱人資訊科技】手機、耳筒、閃光燈

撰文:托比
出版:更新:
Candy Crush 同Tsum Tsum嘅音樂同音效真係唔係個個鍾意聽,你唔熄左佢,都麻煩戴返個耳筒啦好嗎?搭搭下車,突然聽到有把男人聲講「Yummy」同「Sweet」係會打冷震。
托比
(資料圖片)

有時不禁懷疑,科技是否發展得太快,人類開始招架不住。明明智能手機面世這麼多年,又這麼普遍,但原來不是所有人都懂得用手機時不影響其他人。有些人就是有錢買最新款手機,但沒有能力阻止自己騷擾別人,講緊你盞閃光燈喇叭

就當作溫馨提示,或者不太友善的提醒也好,只想說,其實你大部份時間,都用不着開閃光燈來影相拍片,不論是日光日白或在室內,都可以關掉你天殺的閃光燈,無人會想無啦啦對眼被人閃咗一嘢,攝咗個魂魄入你部電話,跟手你發現張相太光,塊面好似彭麗媛咁,啲cream同啲油閃晒出嚟,仲有對眼好似森林啲野獸咁,又空洞又光又紅,然後你又影多張,旁邊路人無辜被閃多一下。

(資料圖片)

唔係話用閃光燈就錯晒,但作為一個路人,一個咁啱企你附近嘅地鐵乘客,一個坐喺餐廳隔籬枱嘅食客,我只係想活返喺自己嘅世界,唔係好想亦冇乜必要成為你嘅背景板;即使成為你塊背景板,你都無需要用閃光燈嚟話我知。基本上,你唔係攝影師或攝影記者的話,只係影吓枱面碟餸,或者喺景點同景物互動,用閃光燈係唔會令你張相靚啲,真係唔會㗎,不如長熄啦。

同埋耳筒其實唔係新發明,而電話都出左靜音功能好耐,Candy Crush 同Tsum Tsum嘅音樂同音效真係唔係個個鍾意聽,你唔熄咗佢,都麻煩戴返個耳筒啦好嗎?搭搭下車,突然聽到有把男人聲講「Yummy」同「Sweet」係會打冷震。

仲有!我知道現在手機數據都好平,手機睇劇超方便,不過我冇追開你套劇,我識嘅韓文只有「kimchi」和「寵寵寵」,睇唔到你個mon啲字幕,你唔戴耳筒,搞到人地都唔知走唔走埋你身邊同你一齊睇好,有聲冇畫真係好唔開心㗎嘛,買返個耳筒啦,乖。

仲有,雖然係人都知,所有細路一拎到部電話,就會乖乖地坐喺度唔出聲望實個mon同篤篤篤,但求求各位家長,一係你就俾佢玩,一係教好你位小朋友,唔好俾佢喺公眾地方發老脾,等佢大哭大鬧扭扭扭扭扭扭完一輪你又俾部電話佢玩,騷擾全世界之餘,自己又尷尬,何必呢?唔好講咩「小朋友梗係會扭計」,係你縱到佢淨係識玩電話,冇電話就大吵大鬧,其實唔係部電話有問題,係你個人有問題。

(本文純屬作者意見,不代表香港01立場。)