港女麥紫莉Chili拍日本AV,點睇都係good deal?

撰文:李聲揚
出版:更新:

早排有單新聞,日本AV女優里美尤利婭畀日本稅局追佢逃稅。「里美尤利婭」你未必識,原名「小泉彩」多啲人識,我理解佢應該唔算好紅,但都係有啲名氣。問題嚟啦,女優一年拍幾多戲,在網上好易搵到,片酬亦唔係大秘密,收入透明度照計清過格仔AV,咁都有得逃稅?原來話,佢總收入只有兩成係片酬。剩低八成?係陪酒接客包養。

唔止一次提過《Freakonomics》呢本奇書, 第三章名為「點解毒販仲同阿媽住?」。作者發現好多販毒都同阿媽住,如果真係咁好搵,點解仲同阿媽住?真係咁孝順?

同樣地,我嘅問題係,如果拍AV咁好搵,做乜仲要接客搵人包養?

麥紫莉Chili〈網上圖片〉

求職擇業,永遠係一場賭搏,冇人話到你知邊條路啱。即使只係講錢,都一樣難答。有啲行業,你做到行內嘅5%,同只係中游份子呃飯食,完全係兩回事。而家呢個世代,樣樣都有人指指點點,狀元做醫生我覺得好合理,但又有人不高興。咁港女拍AV又點睇?我就覺得……好似販毒咁咯。且別誤會,唔係道德審判,而係拍AV都係做演員,咁亦同販毒或者踼職業足球一樣,係咪真係咁風光?睇你點睇,Winner takes all,但麥小姐拍AV嘅呢個決定,似乎都係搏得過的。

麥小姐嘅外表,我冇乜評論。事實係本人唔鍾意大胸,但寫文切忌當自己口味係全世界。目測連登巴打好似都係潑冷水嘅多,但又講真,有得睇你睇唔睇?台灣真AV達人「一劍浣春秋」點評過,覺得麥小姐外表絶對合格,我信專家。

但樣靚身材正兼青春無敵,又如何?元祖電玩街頭霸王(Street Fighter)過關後,對手都會講句“What Strength!But Don't Forget There Are Many Guys Like You All Over The World”。樣靚身材正青春又如何?問題係,得你一個有咩?

(網上截圖,作者提供圖片)

早前睇報導,日本一年出3萬套AV,兩三千新人出道。數字可靠性有幾高唔知,但照計唔會爭太遠。「200個日本女人有一個拍過」應該係標題黨,但2000個有一個就應該走唔甩。點解咁多人拍AV?之前寫丸龜買譚仔篇文都講過,日本人口老化,新一代一樣冇乜出路。年青人最大資本就係青春,好多人肯搏。況且日本咁大,鄉村少女嚟到東京,化埋妝改個假名,其實屋企人或朋友未必會知。但簡單經濟定律話你知,咁多人下海,必然就壓低片酬。

拍AV有幾錢?有報導話三上悠亞一套戲搵過億,在東京世田谷區買豪宅。但又係標題黨。首先,過億係…円。第二,同區一樣有平有貴,平嘅分分鐘一兩千萬円搞掂。而所謂片酬過億,真係佢落到袋嘅,可能得兩成,二千萬円比較似實情。

二千萬円,百幾萬港紙,都好多錢啦!係,但講緊係三上悠亞,即係美斯C朗米高佐敦咁嘅級數。拍AV都係藝人,都係販毒踼職業足球咁,一將功成萬骨枯。一個三上悠亞成功買樓,幾萬人在金字塔下面掙扎住劏房。

有冇咁誇?有。一般頂級女優,出道都只係百萬円一套,七萬港紙,聽聞呢度只佔1-3%。底層嗰80%呢?一套幾萬YEN,幾千港紙咋,都未夠你飛去四國睇一次漩渦。麥小姐叫做在香港有名氣,外型又似乎不錯, 照計係中間階層——但正如大前研一話齋,M型社會,中間階層極速消失,而你同我都心知肚明,中間向下流機會大過向上流。

AV是涉及龐大經濟的產業,港女麥紫莉早前報稱會到日本拍AV,引來大批傳媒追訪。(資料圖片)

文首講小泉彩,只計拍片一年都未夠50萬港紙,仲未交稅,佢仲要係生於片酬仲係不錯嘅年代,而家新一代都幾難有呢個收入。所以麥小姐話20萬港紙拍一套,我就真係有啲懷疑,而大家都知呢啲片酬多數都係報大數。

新人畀到盡,應該都係兩三萬港紙。當然麥小姐係來自香港嘅過江龍,可能奇貨可居啦。之前都有疑似港女拍AV,有Vivian有范美好,但始終都係身份不明,血統不純,又唔知邊度走出嚟,含金量點都冇麥小姐咁高,所以佢話係香港第一人,唔算誤導。但睇返往績,至少在AV上,日本人唔係太接受外來事物。金髮尤物都還可(聽聞平衡返日本男人的自卑,仲可以滿足其「脫亞入歐」嘅夢想),但同係黃皮膚,過江龍女優冇乜邊個成功。之前有台灣有韓國,暫時都冇乜邊個跑得出。

競爭咁大,再靚都好,最後都係紅海市場,靠份片酬就死得。就當報導冇作大,40萬港紙拍兩套,都真係未夠首期,更加過唔到收入測試。靠本土巴打支持?又真係惡搞。見網上意見都唔係一面倒咁踩麥小姐,有啲都話支持香港人,「到時搵seed」。係咯,到時搵seed,四個字擲地有聲。不如拎粒seed去供樓?即係,有邊位香港人真金白銀買AV呢?我有位AV大王朋友在日本試過,但相信佢只係少數。冇人畀錢,AV業自然難做,片酬自然低。

講到咁負面,小弟又係咪潑冷水?又唔係,條數又不能咁計。小泉彩嘅故事話到你知,片酬只佔兩成,八成係其他收入。好多退役甚至現役AV女優在風俗店做,亦係公開的秘密。狼啲嘅直頭安排同土豪私下交易,一次十萬八萬,一樣有水魚,一次好過拍足一年戲。正派啲嘅去六本木陪酒,價錢當然畀普通女仔叫高幾倍起碼。

講到呢度,大約明條數點計。港女拍AV,同藝員簽TVB差不多——份糧梗係奀啦,但你可以用呢個身份同知名度在出面搵食嘛。記得熊追人嘅故事嘛?點都唔夠隻熊跑,點解仲要綁好鞋帶?我唔使跑得快過隻熊,跑得快過你就得啦。同樣地,麥小姐唔使砌得低日本嘅女優,佢做到香港第一人就已經夠。

唔係話佢要借名氣陪酒或搵包養,就算變返普通藝人發展,都已經賺晒知名度。永遠只有先行者先搵到錢,葉玉卿一脫成名,之後嘅已經唔係嗰回事。周秀娜一樣早著先機,之後有幾多個做到佢咁名氣?麥小姐就算征戰日本失敗都好,至少已經係香港第一人,呢條數搏得過。返嚟介唔介意人哋用有色眼鏡睇佢?佢連打真軍都唔怕,鬼得閒理你班道德L的眼光。

(網上截圖,作者提供圖片)

況且,可能真係跑出呢,反正麥小姐完全冇心理負擔,話「當平時咁做」,更加認為日本男人尺碼同耐力都普通料(嗯,不過有黑人系列的)。咁,蝙蝠俠嘅小丑話頭,If you're good at something,never do it for free。既然一萬幾千走粉都有人搏,幾萬蚊拍AV,點睇都係 good deal,至少衰咗都唔使坐監。

(本文純屬作者意見,不代表香港01立場。)