【的士眾生相】單靠身材好、樣貌靚就可以成為真正嘅土豪獵人？

喺上環港澳碼頭上車嘅人，一係唔傾計，傾親計都係環繞賭場居多。呢次嘅女乘客，就分享咗佢嘅獵食經驗。

排隊排到第二三位嘅時候，打量長長嘅人龍係幾有趣嘅一件事。觀測下各式各樣嘅人群，數下邊個人係即將上車嘅乘客，估計下乘客嘅目的地，對於司機黎講係幾好嘅練習。最終上車嘅女乘客，最觸目嘅係一雙長腿，純黑色嘅長靴連膝頭都包埋，直逼短無可短嘅短裙，單單係呢對腳，樣貌已經唔太重要，總之唔會係樣衰。

一上車，係字正腔圓嘅廣東話：「師傅，去天水圍，益你喇。」益我？點益我？會唔會係色慾陷阱㗎。講目的地同時講其他嘢，反映咗佢都想傾計，咁我就放心搭訕，照平常做法，口不對心就係皇道：「益我？係咪贏好多呀？」「都算係贏嘅，個大老細俾三萬我賭，輸到幾千時贏返上萬幾，你話贏定輸喇。」長腿女語帶興奮咁講，重點應該唔係贏定輸，而係大老細三個字，令人慨嘆：怎麼天生不是女人。對於佢同大老細嘅關係，我盡量唔猜測太多，反正都係幾種模式：「有人對你咁好，已經贏晒啦。」

「呢啲大陸佬好多錢㗎，只要你掌握到佢地心理，要搵佢哋嘅錢一啲都唔難。」講到咁，都已經係幾明顯嘅暗示啦。「都要好似你咁，本身條件夠靚先得嘅。」「邊關事，」話雖如此，佢講呢句說話嘅語氣明明係深以為然。「我明白佢哋想要啲咩啫。」佢哋要咩？唔係要蝦條咩，有幾難明。我未包裝好呢句說話時，女人已經接住解釋：「佢哋最緊要係面子，只要你令到佢覺得好有面，同埋唔可以無面，就OK㗎喇。」「咁都係女人著數啲嘅。」我覺得係咁。

「梗係唔係啦，呢個袋已經唔係完全關我事。」女人揚一揚手上嘅購物袋，個品牌我似曾相識咁，總之係廣東道都見到嘅牌子，反正都係名頭響亮而設計醜怪嘅製品，係咩牌子都唔重要。「你知唔知我一入去間鋪，個SALES同我講咩？」「係咩早晨呀？」鬼知個SALES會講咩喎。「梗係唔係啦，佢一使走個老細，就細細聲問我係咪識嘅，我擰一擰頭，個SALES即刻話會鋸佢。」「之後呢？佢係咁叫佢買？」「邊有咁簡單，咁簡單佢就唔喺賭場返工啦。佢係咁迫問個老細『唔係唔買下話』『個袋好平啫，對你呢位老闆黎講，唔會係大數目丫。』聽到我都覺得唔應該唔買俾我囉。」女人將嗰位不知名嗰澳門SALES絕技道出，值得學習嘅地方真係唔少。

話咁快就過咗西隧，乘客好快就專注喺電話，傾咗短短十幾分鐘，都唔係好了解個女人職業係咩。婀娜多姿嘅女人，扭下扭下咁走入大厦大堂，身上嗰種風情萬種嘅女人味，嗰啲只識得用身體換錢嘅女仔有排都未學到。呢啲善於討好男人嘅土豪獵人，工種當屬於「專業」級別。

（本文純屬作者意見，不代表香港01立場。）