17蚊食Ruby Tuesday的「不公義」

撰文:
最後更新日期:
客戶忠誠何價?睇情況啦。Loyalty 有時有 bonus,「熟客」「會員」都係咁回事…「熟客」訂唔到位,梗係不爽。特別係早早做「熟客」果啲,真係有種「識人於微時」的優越感,畀埋錢的更加係大爺…而本城的一大問題,就係好多人將自己不爽,提升到「公義」的層次。真係食個漢堡包都同你講 Michael Sandel。
李聲揚

信我,Ruby Tuesday唔會有幾災難,而今次鬧一大輪嘅,下次一樣會花大半個鐘去排半價雪糕。(王譯揚攝)

上次講「特權」篇文,引嚟不少激烈留言,有話我幫梁振英塗脂抹粉(而我成篇文冇提佢)。部分自己轉載嘅更加提埋我阿媽,人哋帶住矛盾去旅行,我就帶埋阿媽寫博文。適逢拜山見到阿媽,就話埋佢知。阿媽話我平時都唔帶佢飲茶,仲打蛇隨棍上叫我母親節訂枱。我話,不如拜完山去食 Ruby Tuesday 啦(下稱 RT,亦係公司的上市代號)。

利申:上次「特權」篇文講開「熟客」係其中一種最煩的生物,而我絕對唔係 RT 熟客。我在香港一次都冇食過(外國就有)。

絕世優惠 何罪之有?

當然我唔幫襯,不代表 RT 有何問題,正如你唔睇我嘅文,亦唔代表我有任何問題。以為我會寫幾千字鬧人地公關災難嘅,就 too simple。

事實上,我好懷疑啲「公關災難」係公關「發明」出嚟。正如獵頭人要寫好多職場問題,正如有人話「李斯德林並唔係發明咗漱口水,而係發明咗口臭」(好好思考呢句嘢)。正如寫電腦病毒的天才,不少入咗防毒軟件公司做。

儘管我唔食 RT,只食花生,但我不覺得 RT 有何公關災難。好多網民鬧?係。但有乜唔係好多網民鬧?話罷食果啲最後有幾多個真罷食?而有幾多個根本從來都少食?王晶套戲都大把人睇啦,對不?

坦白講,我覺得RT的優惠絕對令人心動。免費漢堡喎,原價加一只係 17 蚊。從來冇在香港幫襯過嘅我都想食下,不過見到條人龍就作罷。

正所謂「免費的往往最昂貴」,通常係指消費者,但今次 RT 亦都畀人鬧。鬧乜?

偷工減料?冇喎。
巧立名目收你水錢一杯 50 蚊?冇喎。
限量供應每日只限 10 位?唔係喎。

目測見到食過嘅朋友十分開心,高呼物超所值。

食嘅開心,公司開心。咁咩人好不滿?就梗係食唔到/不屑去食嗰啲啦!

免費漢堡喎,原價加一只係 17 蚊。從來冇在香港幫襯過嘅我都想食下,不過見到條人龍就作罷。(王譯揚攝)

你又 17 蚊 我又 17 蚊 做乜不爽先?

睇返報導,原來最不滿,就係平時班「會員」,即係「熟客」,聽聞好多「長期捧場」「花錢買會籍」。「會員」就原本有特權啦,公唔公平你慢慢拗。但最有趣係,「會員」都有得食 17 蚊漢堡嘛。人地唔會要求你「證明」自己唔係「會員」嘛。你係「會員」都可以照食!

咁「會員」唔滿意乜?就係因為好多人去排隊阻住佢食!

呢個,就比黃子華的「魚蛋論」更高境界。唔止佢有魚蛋,我都要有魚蛋;唔只係我冇魚蛋,我要整到佢都冇魚蛋。而家係,我有得食魚蛋,但我唔鍾意有人有得食!

做生意的,總會遇到呢類問題。客戶忠誠何價?睇情況啦。Loyalty 有時有 bonus,「熟客」「會員」都係咁回事。但同樣地大把優惠只係畀新客,信用卡迎新又有,收費電視家居上網又有,股票戶口亦都有。當中當然涉及顧客有幾容易跳槽的計算,但商人自然識計數,唔使你喺鍵盤度覺得個世界「應該點點點」。

當然啦,自己畀正價見到人地畀平價,就更加不滿,所以食店之類做團購幾時都要小心。最難唔係賣出去,最難係如何唔好令啲畀正價嘅人,覺得自己係水魚,時裝減價亦係咁回事。

但,你覺得自己笨咗係一回事。法律從冇話過要同樣貨物服務同樣價錢,你覺得咁係「歧視」,fine,咁係歧視囉。正如我講「ladies' night」篇文有提到,優惠某種人即係收貴其他人。但呢種歧視無處不在,好多時無人會理你。冇人話過你呢碟牛扒 300 蚊,隔離買團購嗰位唔可以 150 蚊食一樣的牛扒。冇人話同樣坐果班機,隔離果個平你 2,000 蚊你可以投訴。

同樣地,手機商推新款時,往往會將舊款減價,冇人話過唔得,你買果刻都應該預咗。當然商家有試過會退差價畀你,但只係特例,唔係老奉。聽過有人見到自己買咗張機票人哋之後做特價,佢話要回水,呢啲故事只會被人拎去做「港仔/港女批判系列」 。

在Whatsapp間流傳的電子優惠券。

今次就更有趣,17 蚊漢堡優惠一視同仁,舊客都可以有,已經畀好多推廣仁慈。舊客唔滿意乜?唔滿意多人喎,排隊排得耐喎。聽報導講有人拎住 4 月優惠但最後用唔到。嗯,我明,梗係有好大苦衷最後一日先用,而當然亦都係唔知有個咁嘅推廣會好多人,而當然餐廳係應該點都確保佢最後一日用得到。我當然明白,不過咁諗嘅,我建議你最好都唔好加入咁多會員優惠呀、儲里數呀之類,我估冇乜邊間公司可以保證你最後一日實用到優惠。

恃熟賣熟 食唔到漢堡包都成為「公義」問題

我要懺悔。對於好多我鍾意去嘅餐廳,我唔想佢太好生意。唔好咁多人阻住叔叔嘛。對,「熟客」有優惠,但都唔係大晒的。最好就係夠生意到佢唔執笠,但又唔好好生意到要排長龍。

「熟客」訂唔到位,梗係不爽。特別係早早做「熟客」果啲,真係有種「識人於微時」的優越感,畀埋錢的更加係大爺。是的,你見而家機場啲貴賓室越黎越濫,個個都入到,就當然唔爽。你見人人都係因航菠蘿會會員,會員櫃位條龍長過非會員,早入會的當然不爽。你見銀行各種優越優進理財條隊,仲長過普通戶口,當然不爽。但不爽到講晒粗口又話要投訴去美國,又要寫幾千字嘅,我就唔係好理解。而本城的一大問題,就係好多人將自己不爽,提升到「公義」的層次,真係食個漢堡包都同你講 Michael Sandel。

本城的一大問題,就係好多人將自己不爽,提升到「公義」的層次。真係食個漢堡包都同你講Michael Sandel。(陳奕謙攝)

信我,RT 唔會有幾災難,而今次鬧一大輪嘅,下次一樣會花大半個鐘去排半價雪糕。一路食一路鬧,有着數唔好執輸,最好就我有特權其他人冇,咁多年都係本城價值。

我講「出走」的一篇博文提到香港人唔開心,我冇講點解,但我相信其中一個答案係因為本城地少人多,又人人有錢,寧舍容易同人比較。上親 Facebook 都係話你知「我活得比你好」。的確,在我城唔只亦唔使活得好,最緊要活得比別人好。

(本文純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。