我和Cindy的故事 談男老師面對的誘惑
作為一個阿sir，見到遵理事件真係好嬲。
嬲嘅原因，唔係因為佢呃到蝦條我呃唔到，而係，如果你唔太老、頭髮未甩又做阿sir，呃蝦條實在太。容。易。
以小弟嚟講，行年30，教中學教咗幾年，靚仔談不上，補習天王的口才同魅力更加無，但自問十分用心教書，所以幾受學生歡迎，單是這一點，已經令我身邊有好多誘惑。
試過有學生想認識老師多啲，放學跟蹤個老師返屋企；有女仔對男老師好奇，就會趁問你嘢愈靠愈近；有時又facebook message送你好多心心心心…(我都認識唔少後生的同行，就算教小學，對小五小六女仔都要特別小心，唔可以令佢地誤會…)
一般來說，我大啲學生十幾年，喺我眼中，佢地係可愛（講得白少少係低B）多過有女人味，所以好多時候，好自然就會同佢地保持到師生應有的距離。但有時如果遇到啲思想成熟少少，覺得可以同佢溝通到的學生，就可能危險啲…
講講我同學生Cindy的故事。
Cindy 好喜歡打排球，仲要係校隊精英，有次，我罰佢留堂一個星期搞到佢無得練波，佢就日日留堂都眼厲厲望實我，咁我唯有撩佢傾偈，希望佢唔好嬲啦 （因為佢啲數真係太屎，我真係無得唔叫佢留堂），同佢傾傾下，就同佢熟絡起來。
自嗰次之後，佢就特別鍾意搵我傾心事，有時喺教員室外面一傾，就傾到五、六點（成日搞到我遲收工）。但好似Cindy 呢種學生，半成年，開始有自己思想，會懶醒同你分擔煩惱，但又未失去學生的簡單同純真，你就會覺得佢特別可愛，會忍唔住對佢好啲，friend啲。
而女孩子呢，會好容易因為一個佢尊重的人對佢特別少少，而墜入愛河。（補習天王約你出街，同宋仲基同你發展地下情一樣咁刺激架咋。）但男人的溝女雷達，唔會因為你做咗老師，就會無咗。你好易會feel到，你有無行得太埋，個女仔係咪對自己有feel。
嗰次，我feel到Cindy 應該對我有好感，又送小禮物又盛，我就唯有同佢講清楚，佢喊到豬頭咁，但一個屈尾十有人追，又忘記咗我，我哋就做返朋友了。
教書會偏心真係人之常情，但嗰次之後，我發覺，作為一個老師，有好多嘢你可以做，去避免同學生太close，令佢地誤會：
送禮物：成班夾埋一齊送的我會收，但如果一個女學生自費／自製一啲好有心思的禮物，sorry，真係要婉拒。
共處一室：大忌。落操場又好，出走廊也好，有嘢問有偈傾，就行出去有人見到你哋兩個的地方。兩個人單獨留喺課室，就算開晒窗，都唔得。（孤男寡女，一陣傾傾下個女仔大叫非禮都得㗎嘛，喺open area，係保障大家。）
Facebook：開一個學生專用account 是常識吧。而個嗰個account唔使太active，咁就算學生半夜send message搵你，你都可以大條道理唔覆。
電話號碼：畢業前都唔會畀佢地，畢到業，就當禮物送出去囉。
講咁耐，係咪即係「學生老師不應談戀愛」先？
我自己身邊都有啲師生戀成功例子，浪漫過《魔女的條件》入面松嶋菜菜子同瀧澤秀明都有（我呢個年紀係睇呢啲日劇，唔知係乜就自己google下）。但我唔會畀自己咁做。原因？唔係專業操守乜乜乜，而係作為一個男人，咁樣溝女，好。唔。型！
廿幾三十歲大男人，對比入世未深女學生，大大話話，你活多佢地十幾年呀。十幾歲小妹妹，一生中見過幾多個似樣的男人？學校啲男同學低低能能；但你無論內心有幾傻仔、幾禽獸都好，你讀書多，見識廣，日日上堂有套恤衫西褲做你的花紙，加埋「老師」呢個身份，總會令人以為你成熟穩重又可靠。一個咁既package & setting，要令少女傾慕你，從而將蝦條奉上，有幾難？成個遊戲根本就唔fair嘛！
蝦條好食，就係男人都知。但咁樣溝女法，真係十分之cheap。個女仔鍾意你，好可能只係因為佢見得男人少咋！
最後最後，大家可能會質疑，寫文章的我， 文筆又唔好，講野又粗俗，做咩人阿sir？
係，你鬧得啱。好多阿sir，廿幾三十歲，教數理化，真係都係我咁樣，胸無半點墨，麻甩又咸濕，我就係想同戀愛大過天的學生講：
喜歡老師，可以係好浪漫、好青春的回憶，但要切記：男老師都係男人，男人都係仆Ｘ嚟嘅，包括我，包括補習天王，更包括你心中的他。佢哋嘅真身，都係同我一樣，幼稚、麻甩，同覺得蝦條好好食㗎咋！
（本文純屬作者意見，不代表香港01立場。）