打工仔,請不要為天災喝采

撰文:
最後更新日期:

位於食物鏈最低層,我當然知道喺香港生活有幾難捱,但呢兩日聽到左一句「正呀打風!買定料打邊爐。」右一句「破力場啦!好想放假。」我內心卻不是味兒。

颱風海馬正接近本港。

畢業幾年,我們嚐到生活很苦、工作很忙、假期難求,上天賜的風假很吸引吧?我以為只有中學生先會咁諗,我讀書時也很期盼打風,但人一路成長,會睇新聞、會見到生離死別,每逢颱風都造成許多許多人命傷亡,慢慢我提醒自己,「颱風」其實是天災,沒什麼值得慶祝或祈求的。你有見過台灣人祈求地震嗎?有見過日本人求海嘯嗎?香港人太幸福,對「天災」一詞太陌生,我們的腦袋被「工作」支配着。

每逢打風,我們腦中只祈求有假放,我們的腦袋被「工作」支配着。 (網上圖片)

曾經,我都係極渴望8號風球放假嘅人,但認識咗一位好有愛心嘅朋友後,我慚愧了。

呢位朋友每晚都落街餵流浪貓狗,我跟過佢去,小動物一聽到佢把聲就走出嚟,每隻都知自己一定食得飽,所以從不爭食,成個畫面好有愛。有次打風前夕,我諗緊買咩零食返屋企嘆,朋友卻擔心到想喊,因為一打風就好多流浪動物會死,人類拆散咗動物的自然環境,害牠們無處容身,仲要天災時拍哂手掌。

仲有,無論8號或10號颱風下,一樣好多人要照常返工,緊守崗位,佢地返工放工,甚至工作期間都可能會死…

「咁佢地入職嗰日就預咗啦!」
涼薄的人這樣說。

喂,你唔係都知道生活好苦咩?唔通就只有你打工係辛苦嘅?人地為養家搵命博,人工亦唔高:巴士、的士、鐵路司機、機場各人員、傳媒工作者、你屋企樓下個看更......當然少不了大家很尊敬的消防員,淘大工業村迷你倉大火後兩個消防員殉職,嗰排大家唔係好關心消防員咩?送水送餅送慰問......善忘的香港人,你高高興興放一日假,背後不知多少無辜家庭因此破碎,捐幾多錢都補唔返。

「風要打就打㗎啦,我求唔求都影響唔到,講吓都唔比咩。」

唔係唔比講,但關愛社會多啲,講啲正面打氣嘢,好過研究死人塌樓之下仲買咩料打邊爐。我做過10號風球都要返工嘅工,明知自己有責任喺身,我唔會抱怨,當時年少嘅我甚至有拯救世界嘅熱血感。但橫風橫雨下,我call成個鐘的士先有人肯載我,一推門出屋企大廈門口就企唔穩,仲要驚吹爛大廈度門要我賠。平時兩分鐘就上到車,打風要20分鐘先一步步行到出去,仲要被的士司機Jip我整濕佢架車。

坐喺車度,兩邊都係洪水,我內心默默祈求唔好咁樣死。返到公司,一打風就打仗咁,比平時更忙亂!電話不停響、風暴消息不停變、稿不停改……lunch嗰盒飯仲要特別難食。聽住邊度有交通事故、有人追風墜海、有老樹倒下、有人住嘅木屋入水或倒塌……放工打開社交媒體,卻睇見大家圍住爐或拎住咪高峰,慶祝咁多慘事嘅一日,心情更沮喪。

據說聽日有可能打風,我知你而家好開心,但請諗吓其他人嘅感受。最基本係唔好叫外賣!因為送外賣比你嗰個都係人,佢都會有危險,少一個call,佢就多一分安全。同埋唔好喺網上跳求雨舞,講多幾句打氣說話好嗎?肉體上幫不到什麼,心靈安慰都好。

當你喺屋企開心打麻雀享受假期,有想過在外頭工作的人嗎?(資料圖片)

最後,我再三重申,我知道返工好攰,但作為一個有良心嘅廢青,我唔望打風。

攰嘅話,我會sick leave。

(文章純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。