【轉載】新界西人絕對係一群堅毅嘅物種

撰文:
最後更新日期:

同冬天用電熱水爐沖涼一樣,住得新界西,基本上都係一個都市傳奇。

首先住到咁遠,就會學識時差唔一定出現於國與國之間,新界人嘅一日,永遠都早啲開始,夜啲結束。

(作者facebook相片)

文:逆行@電視汁撈飯

時差出現在新界人身上

當大部分返九六嘅奴隸仍然在夢裏邊暢遊,住新界嘅可憐蟲已經喺巴士站,迎着寒風作出無盡嘅等待。無論係元公定屯公,明明佢叫高速公路,但汽車嘅步伐就諷刺地同香港人買樓嘅期盼一樣,每日都停滯不前。呢個時候可能會有平權人士彈出嚟「香港仔隧道都係咁啦!」無錯,好多路都會塞,但細心一想,塞完隧道就出到港島,附近係銅鑼灣、金鐘呢類文明世界,大廈臨立嘅市區,公司可能就喺附近;但新界?當你辛辛苦苦捱完條長青或者大欖隧道,你面對嘅仍然係一片荒蕪,貨櫃碼頭?高速公路?如果突然內急,你連搵個廁所嘅機會都無!哀傷嘅感覺有如幾經努力讀完大學攞到張沙紙,以為自己可以出人頭地,到頭來只係原地踏步,前路茫茫。

「搭地鐵丫嘛!」就好似叫你等多班車或者努力增值下自己一樣,難聽過粗口。先唔計西鐵已經逼到PK,有啲已經失心瘋嘅朋友為咗一個位, 可以由天水圍搭返兩個站入屯門再由屯門搭返出紅磡,等等,希望大家唔好叻唔切,西鐵嘅兩個站,同地鐵嘅兩個站,係唔同嘅。果四個站嘅犧牲,唔係咁易㗎,所以有人提倡讓座,你知唔知人哋為咗呢個位付出咗幾多?再講,唔係話唔想讓,但莫講話坐位,連企位都未必有,朝早8點去到錦上路你仲上到車,同元公或者屯公無塞車一樣,已經好似李斯特城贏到英超咁興奮。

「其實Google map話好快啫…」究竟有幾多人真係會用Google Map嘅suggested routes?我唔知。因為佢就好似政府呃人去讀副學士或者進修,然後話有好多出路一樣,得過講字,有時啲路線睇完都想笑出嚟,新界尾出去九龍頭又入返新界尾,究竟係咩邏輯,再者,仲未計塞車等車嘅時間。

大家瞓覺或者玩電話並唔係真係因為攰或者怕悶,而係因為當西鐵於漆黑隧道中疾走,望住不斷後退嘅街燈同埋無盡嘅黑暗,你看到的不是晚歸,是絕望。(資料圖片)

阿媽話以前見工聽到你住新界西,一定唔想請,但如果我係僱主,知道有新界朋友嚟見工,無論公司喺邊我都會請。因為經過住新界嘅磨練,呢位員工仲有咩克服唔倒?

喺元公同屯公鍛鍊出異於常人嘅耐性,你話個客好煩好難湊,有咩煩得過塞車要等半個鐘先行完果幾百米;你話OT辛苦,份工要成日企,有咩辛苦得過由7點45分企到8點45分而架車仲不斷搖嚟搖去,個腳力已經升到S級;你話要最好有啲經濟知識,西隧同紅隧嘅替代品原理加上政府介入價格限制嘅禍害,有邊個喺紅磡轉隧巴嘅新界人唔了解?

如果真係有小朋友跨區返學,細細個就已經可以練出一番橫鍊筋骨加上不屈不撓嘅志氣,大過唔飛黃騰達都至少可以拯救地球,攞諾貝爾獎都只係基本。

夜晚放工先係新界人最大嘅考驗

而除咗要早啲返工,夜晚放工先係新界人最大嘅考驗。

你可以試下問住新界嘅同事,佢地有幾耐無睇過《愛回家》,雖然其實都唔係好想睇,但如果可以做家訪,新界西嘅家庭應該會係:「阿女,做咩又笑又喊呀…」「無…返到嚟《幕後玩家》仲未開始做,有少少感動…」據非正式統計,新界西人睇MyTV嘅比率應該係最高。歐洲美國有Winter Time,香港工時根本就應該有新界西Time。

如果係返工之後有gathering,更加係煎熬。當住九龍、港島嘅朋友返到屋企沖晒涼上埋床,住新界西嘅朋友可能仍然喺美孚或者尖東行緊果條為競步賽而設嘅走廊,亦可能喺大欖隧道架巴士入面企緊。若果有呢類朋友,你嘗試約佢喺銅鑼灣或者旺角食飯,而佢又成日唔參與或者甩底,應承我,體諒佢,因為只要你真係入過屯元天,你就會體會到果份孤獨。無論喺西鐵定巴士,你都會見到呢大堆人,好似吸咗麻醉藥咁昏迷咗,瞓到東歪西倒,或者不斷㩒電話,如果我係電訊公司,無限數據嘅推廣我一定擺晒喺新西。

但係唔好誤會,大家瞓覺或者玩電話並唔係真係因為攰或者怕悶,而係因為當你離開旺角或者美孚呢啲所謂嘅鬧市,當巴士在公路上奔馳,西鐵於漆黑隧道中疾走,望住不斷後退嘅街燈同埋無盡嘅黑暗,你看到的不是晚歸,是絕望。明明只係千幾平方公里,但呢片彈丸之地就劃分成兩個世界,睇到呢到如果你仍然話「車…大陸呀外國呀都好多人係咁啦」,你唔明。當人人如是,面對同一樣問題,就不用如此傷春悲秋,但住新界又要到港島工作,就正正經歷着猶如貧富懸殊嘅鴻溝,社會不平、M形建構嘅壓抑,望住太古城和港景峰的同事,你無言以對。 為咗避免呢份悲傷同抑鬱,只好逃避於夢境或者虛擬世界之中。

啲人成日笑問,「新界係咪仲有好多人養牛㗎?」新界人真係會答「係呀,好多㗎!」咁講唔係搞笑或者敷衍了事,因為我哋心知,自己就係果啲牛。(資料圖片)

呢個地方真係特別西

最後,你會發現新界西人特別多愁善感、胡思亂想、憂國憂民,只因他們就是一班受盡壓逼、不公和欺壓,但仍舊努力,安分守紀嘅一群。「愈有錢嘅人就愈玩嘢呀!點解我要住到咁遠呀?!」許文彪嘅呼叫經常喺佢哋耳邊響起,但佢地無隨之和應,亦無半句怨言,只會繼續默默每日好努力咁搭兩個鐘頭(or more)車,來回地獄又折返凡間。

啲人成日笑問,「新界係咪仲有好多人養牛㗎?」新界人真係會答「係呀,好多㗎!」咁講唔係搞笑或者敷衍了事,因為我哋心知,自己就係果啲牛。

新一年,好多人會話要「珍惜眼前人」,識珍惜,一定係珍惜住新界(西北)仲會出嚟見你、食飯聚會或者(準時)返工嘅朋友,呢堆堅毅嘅生物,根本要列為香港七大奇觀,加入健力士世界紀錄大全。

叫得「新界西」,地如其名,呢個地方真係特別西(地理上)。

【編按:本文獲作者授權轉載,原文刊於作者Facebook專頁。】

(本文純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。