【MK少女.來稿】那一片情竇初開的MK風景

撰文:
最後更新日期:

正所謂「回憶哄騙我,但凡失去也是美」,當MK style要消失的時候,大家就會開始懷念。今晚我同朋友們飲酒,然後講開呢篇《香港01》訪問的時候,大家就不禁慨嘆,原來自己已經三十幾四十歲。正係所謂人到中年。很懷念青春時候的MK風景,也很想去文化保育一下。

(網上圖片)

【編按:本文為回應早前《香港01》社區專題訪問:【旺角之亂】鍾情旺中、Lolita 旺角女生:呢度嘅定位就係Cheap

老老實實,MK style靚咩?真係講唔上。但混雜,土炮,亂嚟先係香港本土文化嘅精粹。MK style就係來自大家靠手邊僅有的資源,嘗試去模仿一d由二手甚至三手而嚟嘅資訊,再撞埋落去一啲大家做緊見慣嘅嘢度。於是有鬧市中抱熊啤啤的lolita,又有金毛超短熱褲涼鞋加手中半枝煙。由呢個角度睇,如果MK style當年係模仿日本唔知原宿定涉谷feel,咁今日流行韓風同埋偽ABC,本質上其實無乜分別,都係香港人土炮地勇於嘗試的精神。情況正如80–90年代的港產片一樣,《最佳拍檔》入面許冠傑扮晒007但隔離又多咗個有台山口音的麥嘉,呢樣先係正嘅地方嘛。

噢,但我哋呢啲老餅,其實唔係懷念呢樣嘢囉。我哋係懷念一種好raw的感情。個情況係咁:當時大概係90年代末,2000年前後。在中學與大學之間,人生仲係處於發展初階的矇矓狀態。我哋都仲係努力發育中的年輕人。對世事的了解好少。唔會分到咩日系唔日系,MK唔MK,但在呢啲麻甩仔的朋友圈子中總有一個少女。佢直率,霸道,粗口爛舌,但願意露出長腿,配合年輕貌美,震懾著我們情竇初開的心靈。佢周不時出現,可能係我哋圈子中其中一個男仔的女朋友,又可能只係無聊,得閒想群下男仔堆。而我哋青春躍動的心入面會有掙扎——係唔係真係鍾意佢呢?唔一定,雖然會成日幻想下。於是男仔之間有時就會因為爭住在MK女仔面前表現下而鬧翻,然後無幾耐又因為踢返場波而和好如初。

(網上圖片)

青春期的我哋,生活圈子就係受住呢個少女的影響,周不時有感情糾紛。係,我哋仲有正常的審美觀,知道學校入面仲有清純美少女,學術美少女,同埋運動美少女。但大佬,我哋接觸唔到丫嘛。呢個MK少女就係在學校以外的生活中出現在左右,而又肯同我哋呢啲麻甩仔出街,無聊地在大時大節去蒲的人。到今日我哋人到中年,有教書佬、有Fund佬、有差佬、有寫字佬。但在結婚生仔之後,都仍然會在內心的一角留一個位置,俾呢個曾經陪伴我哋成長的MK少女。

(本文純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。