文明晚餐，男主動埋單女提出夾返，就係咁簡單

食飯AA制搞到打交上報，夠晒奇情。
最奇情係最初聽到一男一女，「有人提出AA」，好多人（包括我）就跟車太貼，梗係估個男方叫女方夾，女方唔制，搞到見報。一把把「批判港女」嘅利刀磨好晒諗住出鞘（有啲已經早出埋），點知話咁快就有另一個似乎更可信嘅版本：
係女方話夾返，但男方唔知飲大兩杯定男性荷爾蒙過多，覺得畀人冒犯，怒撕銀紙，搞到見報。

通常國家愈先進　愈鍾意AA

食飯埋單呢味嘢，真係充滿學問，仲有好多文化意義。商務應酬還好，好多都開公數，一個開到一個開唔到嘅當然係開到嘅請，唔好益公司嘛。而如果大家都唔開公數，但又未係好熟嘅，禮節上都係提出食飯嗰位請，唔會太大問題。反而去到私人層面，朋友情侶食飯，就惡搞啲，如果係「戀人未滿」嗰啲就仲難搞。不過我認為，社會越嚟越文明，AA應該係大勢所趨，所有情況都適用。

首先講明，其實AA有兩種，可以係全部人平分，或者各自畀自己嗰份。唔使睇《怪誕經濟學，Freakonomics》都估到，同一班人，前者張單應該貴過後者，正所謂有大食大，「人人叫凍飲你唔叫咪好蝕底」、「人人都食丁麵你食大光麵咪蝕咗」。但為求簡潔，本文唔分開兩種情況討論了。

AA聽落幾文明，但絶對唔係「古已有之」，同男女平權種族平等之類，係比較新的東西，甚至係社會進步嘅象徵。有理由相信，好耐好耐以前（咁當然先要有餐廳），社會常規並唔係AA。先進嘅社會，先開始鍾意AA（讀者可以諗下香港有幾文明）。

證據？大家都知AA英文叫「GoDutch」，原因眾說紛紜，但好可能係一種鄙視，「啲荷蘭人斤斤計較冇朋友，唔似我哋英國人，大家巴打不要分那麼細」。唔係單一例子，其他語言都有類似現象：英文叫AA做「荷蘭人方式」，在埃及人哋就話呢種係「英國人方式」，在土耳其呢，就係「德國人方式」。而在南美當然就叫「阿美利堅方式」，最頂癮係在意大利南部，佢地就叫「羅馬人方式」，分到好細。以上種種全部涉及身份認同，「佢哋」先咁做，「我哋」唔會。

「以訛傳訛」呢個遊戲，英文叫Chinese Whisper，中國人的耳語——而在法文，就叫「阿拉伯人講電話」——總之其他人就係唔知講乜。正如英國人叫梅毒做法國病，法國人叫做日耳曼病，日本人叫做支那病，俄羅斯人話係波蘭病，而佛羅倫斯人就話係那不勒斯／拿坡里病，真係分得好細。總之，衰嘢係人哋做的。（至於葡國冇葡國雞非洲冇非洲雞就係另一個故事了）

咩國家最盛行AA？當然係荷蘭，仲有文化都好相近嘅德國。有話Go Dutch其實係指德意志，難以考證，但本人去過德國十次八次，可以話你知的確如此。德文BB班教到在餐廳食飯，幾乎必定有呢句"zusammen oder getrennt？"——一齊定分開畀？而德國餐廳啲單好多都幫你計埋每位幾錢，甚至會幫你mark低邊個人食過乜，十分嚴謹。

除咗德國荷蘭外，奧地利，瑞士，同北歐五國都愛行AA。至於有咩地方唔興AA？答案就係南歐嘅西班牙，意大利，葡萄牙，希臘——大家巴打唔好分咁細唔好夾錢咁核突。

唔興AA嘅西班牙意大利葡萄牙希臘，令你諗起乜？冇錯，就係歐豬四國（PIGS）。盛行AA嘅德語系國家，荷蘭，同北歐，全部都係財政比較有紀律，甚至比較文明，男女比較平等，對性小眾較包容嘅地方。唔係話歐豬四國唔文明，但南歐的財經紀律同社會情況，你懂的。

只係巧合？舉一反三，仲有咩地方唔鍾意AA？當然就係中東。中東人出名好客，正如南歐人一樣。但同時間，呢種「好客」亦反映在浪漫放浪嘅民族性上，同「度縮」嘅德國人係兩個世界。又或者係因為窮所以好客所以唔興AA？窮地方比較有人情味係常識。幾十年前返大陸民風都好淳樸，而家當然唔係呢回事。社會文明進步收入高，人自然開始斤斤計較，亦都時間寶貴。你去緬甸問路人哋就真係陪你行半粒鐘，有人情味之餘亦反映時間唔值錢，在香港當然就唔係呢回事。

「戀人未滿」最難搞

好似好進步嘅香港又如何？就我理解香港人唔多介意AA，特別係朋友間。朋友間當然都會請食飯，但你提出要AA，或者你主動話夾返，都唔會太無禮唔會搞到打交見報。即使好熟嘅朋友都唔介意AA——或者人人都忙，根本因為未必成日見得到，「下次我請」都唔知係幾時。總之，朋友搵你食飯，好熟都好，你唔會老奉覺得係佢畀，呢度唔係希臘。

最難搞，始終係男女仔約會。真係純朋友嘅都還好，拍緊拖嘅亦應該大家有共識，「我請食飯你請睇戲」（當然唔係睇阿凡達）或「今次你請下次我請」之類，咁當然你請女朋友食米芝蓮三星佢請你食譚仔就後話（掉轉就更好）。

最煩就係啲「戀人未滿」，發展中，dating，溝緊，或者有人以為溝緊嗰啲。我固然識啲女仔係「職業飯伴」，以前真係識個女仔，人工唔高又唔多洗錢，月尾冇錢想食好嘢就約啲不同嘅男仔去埋單（對，我係其中一個）。陪食飯咋下，唔好諗多咗。但呢類人應該係少數，公道啲講，我識嘅女仔，好多都唔係好介意畀返錢——況且，其實都好難到你介意，分分鐘搞到見報喎。

最難搞嘅係，AA有時可能係傳達緊一種訊息，就係「冇興趣繼續發展」。中七時本文作者扮大人請心儀女仔去食啲cheap cheap西餐，當事人堅持畀返錢我，令我好難受——因為明顯佢話我知佢唔享受呢個約會，事實之後佢亦都冇再見我，但呢件已經係1997年嘅事。

AA見報事件後，有女仔朋友估我會寫文，率先話我知好多港女雖則貪錢，但都唔係貪嗰幾百蚊（我鍾意最尾呢句）。最怕就係其實唔介意夾錢，但又冧個男仔，咁夾返錢佢會唔會以為我唔想發展？又或者，唔夾錢人哋會唔會誤會自己有機？

我嘅答案係：come on，都咩年代啦。而家嘅人鍾意直接，你夾咗錢都好，返到去WhatsApp佢話佢知好好食，之後再搵佢食飯，話下次你請返佢，包保人哋唔會誤會啦——而你下次一樣可以唔畀錢。掉返轉頭，真係唔想夾錢嘅，返到去十問九唔應，人哋又點會「誤會」你鍾意佢？

結論：作為金融從業員，我話你知，盛行AA嘅國家，信貸評級明顯較高，財政狀況明顯地比唔興嘅健全，債息亦明顯較低，社會亦比較平等。AA的確係文明表現，越文明嘅國家越興，香港人唔好搵咁多理由。以前都仲話怕咩傳達錯訊息，但而家又不是八十年代，科技發達生活節奏快，冇人理你咁多hidden message。文明約會，男方應該主動埋單，女方請提出夾返，條仔收唔收就後話。唔好用「怕人誤會」做理由。

（文章純屬作者意見，不代表香港01立場。）