【來稿】大學界傳聞：「祖傳筆記」保grade救命不求人

大學生將成個古代藏書樓嘅idea放入幾張筆記紙之中，大玩古今crossover，你話喇，祖傳筆記呢樣嘢係幾咁fashion，又幾咁古典傳統呢。所謂「藏書教子孫」，我建議將祖傳筆記藏於大學圖書館，方便學子溫書，必可保障代代奪A，全系奪A，人人有書溫，科科有A派。

文：潮文社

五月時分係考試季節。都市有都市傳說，大學亦有大學界嘅傳聞 ── 例如比較少人講嘅「祖傳筆記」。大學部分科目嘅考試，好多時一成不變，每年出同一題，或者隔年出，一字一眼不變，時有發生，所以自然出現model answer，亦即筆記。只要有一個人整理好答案，背咗佢就考到正常或理想成績。「祖傳筆記」又可以叫「組傳筆記」，意指一組傳一組。玩Ocamp會分組，前輩(組爸媽)會將佢地以前收到嘅筆記，用完之後留畀freshman（組仔女）溫習，然後父傳子、子傳孫，所以既係「祖」傳，亦係「組」傳。

壯哉祖傳筆記！經歷十年八年前人智慧層累結集而成，組組相傳，永續筆記，閱之既可以保grade救命，又可以神交古人，臨考試最好用，冇上過堂唔緊要，背晒份嘢就包冇爛grade。唔好睇小幾頁紙仔，原來大有古風，蘊含住悠久嘅華夏文明。中國古代有藏書習慣，即係收藏經典同書籍。地方上稍有錢嘅士人、大族會起樓塔，作為收書之用，就好似現代圖書館咁。起個書塔有咩用？有金執咩？冇錯，古代讀書如挖金，係考取功名嘅唯一機會，要往上流就一定要讀書。只不過，書唔係人人有得讀，例如學者宋濂出身微寒，想讀書都要左搲右搲，問人抄書，抄完返屋企自己睇，認真慘慘豬。

藏書樓同祖傳筆記都係代代相傳，務使子孫（組仔女）考試考得好。以現存規模最大嘅古跡藏書樓「天一閣」咁，閣主范欽窮半生精力去收集圖書，死前警告子孫：

「代不分書，書不出閣。」

即係唔好將啲書分豬肉咁分，同埋唔畀將啲書拎出書樓，又講過：

「其書不借人、不出閣。子孫有志者，就閣讀之」

可以見得，書藉都只係有財有勢人士自私睇，其一目的係留畀有志向嘅子孫，如果他日要考功名就容易得多，入閣咪書不求人。如此一來，確保後代都有書卷氣，功名易取，亦保持宗派勢力。

而大學嘅祖傳筆記就好似古代士人咁，由多代師兄心血堆積而成，目的都係為咗投考，兩者同樣有密傳性同功利性。大學生將成個古代藏書樓嘅idea放入幾張筆記紙之中，大玩古今crossover，你話喇，祖傳筆記呢樣嘢係幾咁fashion，又幾咁古典傳統呢。所謂「藏書教子孫」，我建議將祖傳筆記藏於大學圖書館，方便學子溫書，必可保障代代奪A，全系奪A，人人有書溫，科科有A派。

仲記得讀大學嗰時，睇past paper就知邊啲科目嘅題目年年不變，大家就非常淡定，因為前人早已整好筆記，照單汁藥咁砌晒咗個答案出黎，我地要做嘅只係背notes。不過，梗有啲老師「玩嘢」，出以前冇出過嘅題目，風格大變，一打開份試卷當堂好似亂碼咁，出到黎個個天怒人怨、破口大罵。

至於古代考試，就穩定好多了。明清兩代，八股文科舉日漸成熟，內容不出四書五經，年年考嘅嘢相若。有考試，自然有補習天王筆記，例如《京華日抄》、《曲園課孫草》等等，都係明清出名嘅科舉用書，入面分析晒一篇八股文嘅起承轉合應該點樣寫，畀埋樣板，如同補習嘅作文5**筆記，你唔需要明白內容，只須背好範本，入到去按題照寫就答到，絕對冇老師「玩嘢」，不知幾開心。

其實要改動試題，涉及好多因素，包括重新諗題審題、學生反對等，為求大家好黎好去，老師少不免都唔改題目，因而先促成大學嘅祖傳筆記出現。無論古代科舉、明清八股，抑或而家嘅中文範文、大學考試，其實性質一樣，務求有據可依、有嘢可背，結果都係令讀書人束書不觀。咁到底考試本質係咩？一不離分能力之高下，二無非鞏固習得，但而家似乎只分到背誦能力之高低，更遑論有助學習。中學考試時仲背唔夠咩？大學教育其實可以做得更好，例如為個final quiz賦予返少少意義，或者直接摺埋個考試佢。廿一世紀了，仲玩八股取士？

「禁絕傳統咪得囉。」

不了，祖傳筆記只係表癥。

（本文為投稿，稿件可電郵至iwanttovoice@hk01.com；文章純屬作者意見，不代表香港01立場。）