【足球.博評】七個被摩連奴賣出後發奮的球員

撰文:
最後更新日期:

文:列奧C@世界波

紅魔曼聯主帥摩連奴(Jose Mourinho)教波叻就大家都知,不過可能因為佢離開波圖後,咁耐以嚟執教嘅球會都算有錢同肯聽佢話畀錢買人,所以不時有啲球員摩連奴睇唔多上眼就會賣走,然後搵人代替,不過有啲球員都算爭氣,用實力同表現證明自己畀摩佬賣走係佢走寶,有啲個案更係摩佬去到新球會都買番佢,就好似啱啱加盟曼聯嘅比利時鋒將盧卡古(Romelu Lukaku)!

盧卡古終於再次加盟豪門,以7500萬鎊轉會曼聯。(網上圖片)

盧卡古(Romelu Lukaku)

上季喺英超攻入25球,成為聯賽神射手之後,盧卡古終於再次加盟豪門,以7500萬鎊轉會曼聯。雖然「小魔獸」上季成為神射手,但久唔久佢都係會喺門前三碼「炒飛機」,當然令「車迷」難忘嘅仲有2013年喺歐洲超級杯對拜仁「漫步12碼」......而呢球失誤之後佢就加盟咗愛華頓。

當年好多人都以為係「摩佬」要求賣走佢,不過盧卡古就講返當年係佢自己想有穩定出場機會所以先轉會,而摩連奴仲係第一個SEND短訊祝福佢嘅人。

縱觀摩連奴多年戰術都熱衷以一個可以做支點「停到波」嘅前鋒掛帥,由初掌車路士時嘅杜奧巴(Didier Drogba);到國際米蘭嘅迪亞高.米列圖(Diego Milito);皇家馬德里嘅賓斯馬(Karim Benzema);甚至上季免費加盟曼聯嘅伊巴謙莫域(Zlatan Ibrahimovic),全部都屬於護球能力頂級嘅前鋒。就睇下近年幫愛華頓攻城拔寨、比4年前為摩連奴效力時更強壯嘅「小魔獸」可唔可以喺曼聯繼續入球如麻。

馬達(Juan Mata)

洛迪高經常講笑話摩連奴識「黑暗兵法」,而相信馬達係最能夠「講兩句」嘅當事人。2013年二度執掌車路士,作為2012年球季車路士年度最佳球員兼球隊助攻王,馬達喺「摩佬」帶領之下明顯不受重用,普遍認為原因係馬達身體質素欠佳、速度不高而且防守積極性唔夠,而摩連奴一向偏愛快速、對抗性強同埋可以又要攻又要守九項全能嘅翼鋒,所以出場時間大減,2014年下半季更被賣去曼聯。

(資料圖片)

估唔到3年之後,前車路士領隊就同前車路士球員喺曼聯重逢,「摩佬」將馬達賣咗俾3年後嘅自己。當時普遍認為馬達會再一次被賣走,更甚係曼聯之後簽入同馬達類型近似嘅米希達恩(Henrikh Mkhitaryan),種種跡象都顯示馬達又要再一次被摩連奴捨棄。不過除住連格技術較差、最後一傳欠準繩;米希達恩受傷,馬達再次得到摩連奴重用。

對比3年前,加盟曼聯之後馬達身體對抗性仍然係弱點之一,不過其他方面就有相當長進:經常回後防守,當華倫西亞(Antonio Valencia)受壓,都唔難睇到馬達會去到佢附近一齊協防;轉任右翼之後空間較多,就算對手加以壓逼,皮球處理都較以前出色及快速;當然仲有佢無可取代嘅創造力啦。

經常俾人問自己同「摩佬」關係,馬達就成日都話自己同摩連奴無咩問題,「喺車路士摩連奴有佢獨特戰術要求,而曼聯就有一班同我風格更相似嘅隊友,就係咁簡單。」

迪布尼(左)(路透社)

奇雲.迪布尼(Kevin De Bruyne)

2013年摩連奴將外借去德甲雲達不來梅嘅迪布尼回收,但比利時攻擊中場似乎就未能令「摩佬」滿意,全季都得唔到足夠上陣機會。摩連奴認為迪布尼心理質素薄弱,面對競爭反而欠缺積極,最後比利時人選擇離隊,以1800萬鎊轉投德甲另一支球隊禾夫斯堡。

結果只係用咗1年時間,迪布尼喺德甲大爆發,全部賽事交出16個入球同27次助攻,吸引曼城以5500萬鎊將佢帶返英超,更加成為球隊攻勢泉源。

邦路斯(Leonardo Bonucci)

要數今季意甲暫時最爆炸性嘅轉會,首推一定係祖雲達斯中堅邦路斯以4200萬歐元轉投AC米蘭。一黎邦路斯同基亞連尼(Giorgio Chiellini)、巴沙利(Andrea Barzagli)、保方(Gianluigi Buffon)嘅防守組合無論喺國家隊球會都已經合作多年,拆伙消息相當驚人;二黎已經30歲嘅邦路斯竟然吸引AC米蘭出價4200萬歐元。

唔講可能好多人都已經忘記,其實邦路斯算係出身自國際米蘭青訓系統,不過年少尚未成名嘅佢喺2009年以340萬歐元「超低價」出售去另一間意大利球會巴里,而時任國米領隊正正係摩連奴。

貝特蘭(Ryan Bertrand)

作為車路士青訓產品,貝特蘭被視為艾殊利.高爾(Ashley Cole)接班人,不過咁多年嚟佢都無得到過上位機會,更喺摩連奴回歸車路士時就被外借去修咸頓。雖然表現出職業生涯最高水準,但2014年外借結束之後就畀修咸頓正式買斷。

呢幾季貝特蘭喺修咸頓繼續有穩定表現,更有傳出曼城領隊哥迪奧拿曾經有意收購,唔知喺「車仔」時期要搵艾斯派古達(Cesar Azpilicueta)客串嘅摩連奴有冇後悔呢?

菲臘比.路易斯(Filipe Luis)

唔知係咪皇馬時期用開稱得上係「最佳左閘」嘅馬些路(Marcelo),令摩連奴對左後衛要求都相當高,除咗貝特蘭之外,以1600萬歐元高價由馬德里體育會加盟嘅菲臘比‧路易斯同樣成為「摩佬」刀下亡魂。

喺馬體會攻守兼備,後上能力強嘅菲臘比似乎都頂唔順摩連佬對球員過高要求,更曾經喺媒體面前話「摩佬」對球員要求太高,同批評球員所以失去更衣室嘅支持。而佢亦喺一季之後就回歸咗馬體會。

出色表現令沙拉喺嚟緊2017球季以破球會紀錄嘅3400萬鎊加盟利物浦,喺熱身賽已經「開齋」。(路透社)

穆罕默德.沙拿(Mohamed Salah)

2014年挾住「埃及美斯」外號加盟車路士,但係同樣表現令摩連奴未感滿意,喺2015年1月就被外借至意甲嘅費倫天拿,瞬即回復狀態,半季攻入6球。而2015年9月就再被外借到羅馬,11年後正式被羅馬買斷,2季入球都有雙位數字。

出色表現令沙拉喺嚟緊2017球季以破球會紀錄嘅3400萬鎊加盟利物浦,喺熱身賽已經「開齋」。嚟緊一年沙拉可唔可以再喺英超證明自己,相信都會係看點之一。

總結:

其實從馬達嘅例子以及摩佬多次訪問都睇得出,其實摩佬賣走嗰位球員,好多時唔似媒體所講咁樣係不和,所以就算再見番摩佬甚至合作,都唔會有Hard-feeling~

(本文純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。