【英超預測．博評】大聲啲！今季英超會點呀？！
文：洛迪高@世界波
英超終於開鑼，球迷們都等到頸都長！第一週已經有唔少驚喜嘅英超，今季會點樣發展？容筆者係度預測一啲趨勢。邊個係冠軍？咪啦掛……筆者出名燈神，貼冠軍之後季尾畀大家鞭屍？不了！
群雄並起？咪又係嗰幾隊
英超競爭激烈就大家都知，隨住李斯特城奇蹟奪冠加上英超球會收入日升而可多作投入，唔少中下游球會都好肯洗大錢搏下，好似韋斯咸咁今季借入英格蘭國家隊門將祖赫特（Joe Hart）及前曼聯前鋒「小豆」靴南迪斯（Javier Hernandez），連摩連奴（Jose Mourinho）都覺得韋斯咸十足爭標份子，但由於近來英超豪強有更強能力吸引世界級球星，而其他球隊其實買入嘅都係一啲「偽」球星，好似愛華頓看似雄心勃勃，在轉會市場上大展拳腳，但購入嘅球員都係過氣球星亟待復甦嘅朗尼（Wayne Rooney），以及潛力尚待正式開發嘅辛度拉美利斯（Sandro Ramirez）及卡拉臣（Davy Klaassen），以及以高價4,500萬英鎊購入史雲斯中場施古臣（Gylfi Sigurdsson），但佢哋係咪一線？除咗朗尼外其他人都相當勉強吧……（以現時狀態及實力，朗尼的一線身份都好勉強，尚待佢證明自己），強者越強下其實今年前6同中游差距會變得更大，最多只能喺個別比賽令強隊難踢啲，所以前列球隊對碰搶分就好緊要！
奪冠領隊繼續難受
由11/12年度年幫曼城奪得英超冠軍嘅文仙尼（Roberto Mancini）開始，及後數任幫球隊贏英超冠軍嘅領隊都會好快「落鑊」或因其他原因離隊。先係文仙尼於13年5月被炒，繼而係12/13年度冠軍曼聯領隊費格遜（Sir Alex Ferguson）退休，接住係13/14年幫曼城贏英超嘅比歷堅尼（Manuel Pellegrini）喺16年由哥迪奧拿（Pep Guardiola）取代，14/15年嘅摩連奴第二次執教車路士，雖然幫車仔拎冠軍，但佢喺之後一年藍軍將士不歡而散，緊接落嚟就係幫李斯特城實現童話式奪冠嘅雲尼亞里（Claudio Ranieri），之後一季就因為成績問題季中離任，所以開季前大家都好戥上季幫車路士贏到冠軍嘅干地（Antonio Conte）擔心。
車路士一開季就喺9人應戰下以2：3主場不敵般尼，令干地好快就陷入危機，唔少博彩公司都將干地被炒賠率調低。事實上車仔陣容深度唔多夠，雖然有新兵如巴卡約高（Tiemoue Bakayoko）及莫拉達（Alvaro Morata）加盟，莫拉達更射入英超地標入球，但今年車路士要兼顧歐聯，而且干地戰術都會被英超對手仔細研究，相信一切都無上季咁順利，而且干地屬性情中人，夏季轉會期間都已經就球會轉會表達過不滿，繼續落去隨時同管理層爆衝突「被落台」。另外，干地喺處理迪亞高哥斯達（Diego Costa）風波唔夠俐落，加埋佢脾性，隨時危害佢對更衣室嘅控制力。球員作反？係咪好熟口面呢？
護級球隊堪憂
今屆升班球隊分別為紐卡素、白禮頓及哈特斯菲爾德，筆者相信佢哋早早會墮入護級漩渦。雖然哈德斯菲爾德首戰令人跌晒眼鏡，作客以3：0擊敗水晶宮，但觀乎人腳及經驗，似乎要喺英超生存就要喺轉會市場上加把勁，另一新軍白禮頓都面對相同問題。至於紐卡素雖然由名帥賓尼迪斯（Rafael Benitez）領軍，但睇完第一場對熱刺嘅比賽後，發現唔少戰將似乎仲未習慣英超氣氛，雖然陣中有舒維爾（Jonjo Shelvey）及哥爾碧克（Jack Colback）等曾征英超嘅戰將，但有啲實力被高估，亦有啲其實實力未夠，如果紐記眾將唔能夠及時醒來，仲同第一戰咁無厘精神，隨時又要為降班而戰，就算剛剛宣佈簽入西班牙祖斯魯辛馬田（Joselu Sanmartin），但呢位新兵效力英超史篤城以嚟表現未算突出，似乎都未必即時做到喜鵲救星。
3後衛未必Work
干地於上季以3後衛令車路士變得所向披靡並得到英超冠軍，吸引唔少領隊去試，例如摩連奴喺季前賽都多次用3後衛陣式，表明練兵等待有需要時用。不過3後衛陣式能夠為近年英超球隊帶嚟一定程度上嘅震撼教育，主要因為英格蘭本土球隊近來甚少用3後衛，喺戰術培養上亦有所忽略，但當經過仔細研究後，莫過喺其他球隊，筆者相信車路士嘅3後衛陣式都會開始面對困難，遭針對性應付，而且唔係每個球員都可以馬上識得踢3後衛，人跟我跟只要有反效果。
本土球員繼續缺乏機會
世界波之前寫過有關英格蘭青訓發展，其中一個本土球員青年隱憂就係缺乏英超上陣機會，相信嚟到呢季都會係咁。首先係回應番上面講到中下游都敢於投資購入球星，加上成績壓力，壓榨球員上陣機會。此外由於英超球會因為外藉教練頗多關係，戰術歐陸化，因此戰術素養較差，個人技術較粗糙嘅英格蘭球員（特別係前場球員）就難以滿足教練要求，或者後防球員會多啲機會，前場球員或中軸線上就似乎由外援操持……就以龍門為例，英格蘭國家隊正選祖赫特被曼城掃地出門僅能效力中游韋斯咸，費沙科士打（Fraser Forster）亦跟隨修咸頓浮沉中上游，第三、四門將希頓（Tom Heaton）及畢蘭特（Jack Butland）分別效力護級份子般尼以及中游史篤城，至於「超新星」門將比克福特（Jordan Pickford）可以效力極具雄心嘅愛華頓，但實力似乎亦一如不少英人天才般被高估。
重提歇冬期
其實英超一直以來都對於歇冬期不停討論，但可惜一直未有時間表，就連搞唔搞都未傾掂，但由於18年俄羅斯世界盃即將舉行，如果英軍喺世盃表現都仲係空懷「XX年最強」而令人大失所望，相信英超歇冬期就指日可待。
戴定頭盔先，始終而家球季只係啱啱開始，而且夏季轉會期又未完，如果大家喜歡，都可以Bookmark定呢篇文，完季後恥笑下筆者都未嘗不可……
（文章純屬作者意見，不代表香港01立場。）