【PES.博評】足球遊戲與現實足球 關係密切甚至互相影響

撰文:
最後更新日期:

文:洛迪高@世界波

歐洲主流聯賽重開咗一段時間,連歐聯都揭開戰幔,對於球迷嚟講當然係賞心樂事,對於鍾意玩足球遊戲嘅機迷嚟講,就仲係差啲嘢咁。《Pro Evolution Soccer》(《PES》)系列新作《PES 18》已經推出,相信有唔少球迷已經用緊今集登場嘅本地球會東方挑戰緊世界豪強,至於《FIFA》系列新作《FIFA 18》雖然於9月29日先推出,但都已經推出咗試玩版畀大家過下手癮。當然出名嘅足球遊戲系列仲有《Football Manager》(《FM》)等,不過好似《FM》咁就會去到聖誕前先會推出。

以往大家玩呢啲遊戲時,都未必會將佢同現實足球拉上好大關係,但如今大眾已無法將佢哋兩者分開去睇,因為兩者之間嘅關係已經越嚟越密切,甚至互相影響。

《PES 18》已經推出,相信有唔少球迷已經用緊今集登場嘅本地球會東方挑戰緊世界豪強。(作者挑戰世界豪強時截圖)

喺《PES 18》入面雖然有東方,但樣子就真係差得遠…(作者挑戰世界豪強時截圖)

首先最直接嘅係商業贊助互相合作,透過話題性增加線上線下嘅曝光率,以達到互相推介嘅效應。正如喺《PES 18》推出前,遊戲開發廠商同英冠球會富咸就宣佈達成合作協議,富咸球會及球衣將原汁原味放入遊戲中,而喺遊戲外,富咸可以得到《PES》嘅球衣贊助,而且喺球場都會有相應活動,帶畀觀賽球迷更佳體驗,務求令兩者都可以達到雙贏效果。

其次就喺最近成為熱門話題嘅電競行業,足球遊戲亦利用電競呢個契機,開始將自己發展成為一個產業,就好似以前足球呢個運動咁。不過唔好以為電競只係停留喺遊戲發展商嘅藍圖,就連職業足球隊都想參一腳!好似喺足球層面上雄心勃勃嘅巴黎聖日耳門,喺電競界同樣展示野心。佢哋先成立電競戰隊,並挖嚟已退役嘅電競明星Bora "YellOwStaR" Kim做隊伍經理,而喺巴黎之前,早已經有華倫西亞、阿積士及曼城等歐洲球會成立咗電競戰隊。你以為巴黎佢哋只會玩足球遊戲嗎?你錯了,因為除咗有玩《FIFA》嘅選手外,巴黎仲以7萬美元收購咗一隊玩《英雄聯盟》(《League of Legends》)嘅戰隊,而佢哋喺歐洲賽場上,就曾經對過史浩克04…

唔知PES及富咸合作會唔會有助兩者同樣增加Fans呢?(fulhamfc.com)

唔知PES及富咸合作會唔會有助兩者同樣增加Fans呢?(fulhamfc.com)

正如YellOwStaR所講,如果要發展電競,淨係足球遊戲係唔夠。至於點解會搞電競?巴黎聖日耳門主席及CEO嘅艾加拉費(Nasser Al-Khelaifi)就講過,進入電競行業,其實係代表另一種同Fans溝通嘅新方式,呢種思維正正係從市場營銷方面出發。值得一提嘅係本地球會冠忠南區都有佢哋嘅電競選手,唔知遲啲會唔會有更多港超球會發展呢一樣嘢呢?

講起吸引Fans,有研究就指會有唔少球迷未睇波前會因為玩《FIFA》而愛上某隊球隊。喺14年嘅時候,ESPN同EA Sports合作做咗研究,發現喺34%《FIFA》非球迷玩家入面更留意足球。當足球遊戲令玩家接觸到唔同球隊時,或者隊伍可以用唔同方式,喺虖戲世界吸引更多球迷,上述講過嘅《PES》及富咸合作,正係呢個途徑嘅表現。

講完球迷就要講球員,如果話球員因為打機而令自己喺技戰術變得更勁,大家信唔信?阿仙奴球員伊禾比(Alex Iwobi)就話真係會!佢就講到自己會因為見到足球遊戲出嘅技術,而會走去做真人練習,希望真實比賽都出到。戰神伊巴謙莫域(Zlatan Ibrahimovic)就話會將打機時諗到嘅踢法放落真實比賽度。

唔知PES及富咸合作會唔會有助兩者同樣增加Fans呢?(fulhamfc.com)

講咗咁耐,職業球會最著緊就當然係呢啲足球遊戲點樣直接幫到球會成績,除咗一直引為美談嘅愛華頓與FM合作記,以及球會可利用足球遊戲(尤其是FM)嘅資料庫去做戰術分析,最近紐卡素嘅個案有趣得可以畀其他球員同球會參考下。話說紐卡素最近由史篤城簽入西班牙前鋒祖斯盧辛馬田(Joselu),祖斯盧就喺訪問中透露自己點樣了解紐記呢隊波,唔係上Wiki,唔係上Google,而係打機!祖斯盧雖然無講打邊隻Game,只係話打PS,不過佢就利用遊戲了解到紐記踢法同球員,咁睇似乎對佢融入都有所幫助,唔知以後會唔會有球迷喺買人前,叫位球員打機了解下隊友?咁祖斯盧有冇一早紐放自己去紐卡素試下自己點踢法點幫到隊波﹖另外亦有說法指因為有足球遊戲嘅存在,令而家唔少年輕化嘅球隊入面嘅氣氛相當唔錯,因為佢哋有更多共同話題,甚至可以一齊打嚟增進友誼,咁樣對球隊團結同士氣都有好大幫助,試問球會又點樣可以忽視呢?

(所有圖片由作者提供。文章純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。