【博評】從轉會市場看球員能力，究竟球會而家想買球員啲咩？

文：洛迪高@世界波

轉會市場最多人搶嘅，早幾年就多係進攻中場同中場中球員，球隊對於佢哋要求，都幾硬性，亦會符合佢哋位置嘅要求！

不過呢幾年因為單箭頭陣式興起，喺好多球隊已唔係絕對核心或超級武器嘅前鋒，以及中堅及龍門位置，都因為有個別球星而令到轉會市場上又重新出現搶購潮，但引起呢啲位置又出現搶購潮嘅原因，卻又反而同佢哋位置要求能力有所出入，甚至跨張啲講，就係佢哋咁貴咁搶手，其實同佢哋位置上傳統要求能力上無正比關係。

龍門

平時喺香港街場同人討論門將手勢，有啲唔耐煩嘅朋友就會話，超，救到波咪得囉。而家買龍門都就似乎唔係救到波就得。

曼城主帥哥迪奧拿（Pep Guardiola）先後兩季以1,800萬歐元及4,000萬歐元羅致兩位門將，哥迪奧巴禾（Claudio Bravo）及艾達臣（Ederson）。兩位門將撲救能力唔差（至少巴禾喺巴塞時係咁），艾達臣更不時有神救，但相信哥帥最看中佢哋嘅，其實係佢哋嘅用波能力，能夠發動進攻先係最重要。

中堅

同龍門一樣，亦都係由哥帥帶嚟呢個球壇，就係搶手嘅中堅最重要都係技術夠好，能夠可以由後場組織進攻由守轉攻，控球短傳及長傳都有一定水準，至於本身單防能力或者協作防守能力已係其次，加上前場壓迫興起，令後場唔會經常受壓，就好似哥帥好中意嘅史東斯（John Stones）咁，變相令識用波嘅中堅更受歡迎。至於此趨勢丟失防守美學，咁就係後話了。

前鋒

筆者最近睇到有車路士球迷話，聽到球會想簽英格蘭傳統型中鋒安迪卡路爾（Andy Carroll）時，嬲到想放火燒圖書館，就睇得出今時今日對於前鋒，如果你只係一個柱躉，或者單純為一個機會主義者已經唔再受歡迎。大家青睞嘅，係會努力迫搶嘅莫拉達（Alvaro Morata），直線衝刺及運動能力強嘅盧卡古（Romelu Lukaku），技術全面嘅利雲度夫斯基（Robert Lewandowski），仲要數埋指違約金要成一億歐元嘅拖連奴前鋒比洛迪（Andrew Belotti），佢係球隊嘅絕對核心，由中場開始已經見到佢持球進攻，由中場到禁區，由持球組織到埋門都見到佢嘅身影，咁樣先係受市場歡迎現代前鋒。

筆者曾經喺之前文章提到而家成個球壇都希望球員能夠更全面，對於位置嘅分辨已更模糊（尤其是前場攻擊球員），而轉會市場中嘅身價就完美展示出呢種情況，對於足球娛樂性嚟講，可能會令球員本身技術更標準化，失去個性，但同時亦令足球能夠善用科技，令球員變得更「完美」。

（本文純屬作者意見，不代表香港01立場。）