【足球.博評】你又踢過我又踢過 邊個踢晒摩連奴同哥迪奧拿?

撰文:世界波
出版:更新:

文:洛迪高@世界波

阿歷斯山齊士(Alexis Sanchez)加盟曼聯後,成為第14位曾於曼城主帥哥迪奧拿(Pep Guardiola)及曼聯主帥摩連奴(Jose Mourinho)麾下效力嘅球員,而其餘13位都命運各異,喺兩帥旗下都大放異彩嘅卻甚少。

沙比阿朗素(Xabi Alonso - 摩帥麾下:皇家馬德里;哥帥麾下:拜仁慕尼黑)

沙比阿朗素就係其中一位喺兩帥旗下都表演出色嘅球員,原因當然係佢作為中場大師嘅能力,皆因佢喺兩位主帥旗下都係踢相同位置做相同嘅野,而喺榮譽方面沙比喺皇馬拎到兩個冠軍,幫拜仁贏三個冠軍。不過沙比就曾經講過,覺得摩帥會對球員有同理心,所以令球員好肯為佢戰鬥,咁即係代表咩呢?

洛賓(Arjen Robben - 摩帥麾下:車路士;哥帥麾下:拜仁慕尼黑)

同沙比相似,由於能力出眾,洛賓喺兩帥治下都係主打翼鋒做差唔多嘅嘢,不過洛賓就已係職業生涯較早時間為摩帥效力,所以對佢影響力,自己會比喺佢高峰期時先有機會合作嘅哥帥為大,始終係摩帥正正式式將佢帶到世界最頂尖舞台,而洛賓喺球員發文平台Players Tribute出文時,亦提及摩帥而無提哥帥,咁似乎又係咪和應緊沙比講嘅說話?

伊巴謙莫域(Zlatan Ibrahimovic - 摩帥麾下:國際米蘭;哥帥麾下:巴塞隆拿)

「哥迪奧拿同摩連奴相反,如果摩佬可以照亮成間屋,哥帥就係負責拉窗簾嗰個。我認為哥帥會拎自己同摩佬比。」呢句說話截錄自伊巴自傳中,相信大家都估到佢哋嘅關係。其實伊巴效力巴塞時,數據並唔差,不過就始終同球隊戰術格格不入,踢得一年就要離隊,而佢之前一季踢國米就幫摩佬贏意甲兼自己拎埋神射手。

伊度奧(Samuel Eto'o - 摩帥麾下:國際米蘭;哥帥麾下:巴塞隆拿)

我諗呢個唔洗多講,伊度奧喺哥帥旗下踢咗一年就同伊巴交換飯鑊,轉投摩佬嘅國米,最後仲成功奪得歐聯。奪冠過程中伊度奧仆心仆命連客串左閘都試過。至於佢喺14年講過佢同哥帥嘅關係:「哥迪奧拿從來都唔敢喺我前面對住我講嘢,有次國米對巴塞我同佢揸手,佢只係因為有鏡頭先咁做。」

麥士維(Maxwell - 摩帥麾下:國際米蘭;哥帥麾下:巴塞隆拿)

講起伊巴自傳,戰神講過唔知做乜效力咁多球隊都有麥士維喺身邊(曾一同為阿積士,國米,巴塞及巴黎聖日耳門效力),所以佢同伊巴一樣,喺同時期為摩帥效力完就一齊去巴塞受哥帥執教。麥士維離開摩佬後,為哥迪奧拿贏過兩個西甲及一次歐聯,仲有其餘七個獎項,比起伊巴,佢喺哥迪奧拿手下發揮得更好亦贏得更多獎項。麥斯維就曾經品評過兩位名帥,佢話:「兩位教頭要求都好高,但性格同精神面貌好唔同。哥迪奧拿係比較平和,比較似外交家。」

柏度(Pedro - 摩帥麾下:車路士;哥帥麾下:巴塞隆拿)

摩佬成功購得柏度四個月後,自己就要掛冠而去,之後柏度就講過:「所有事都朝壞方向走,士氣好低。」唔知佢係咪埋怨摩佬呢?

古莊臣(Eiður Guðjohnsen - 摩帥麾下:車路士;哥帥麾下:巴塞隆拿)

古莊臣本人曾經表示,兩帥人緣好好但性格唔同,摩佬性格強烈而哥帥好怕衝突。不過古莊臣可以去巴塞,喺車仔受過摩佬指導而打出名堂絕對功不可沒。

迪布尼(Kevin De Bruyne - 摩帥麾下:車路士;哥帥麾下:曼城)

我諗大家唔洗諗都知係邊位教頭幫助佢成為而家咁嘅世界一流中場。摩佬話當年賣佢係因為比利時中場唔肯接受競爭,不過正正因為迪布尼離開車仔,先有機會而家受哥帥點撥,並由以往打邊線成為世界級中場球員。

法比加斯(Cesc Fabregas - 摩帥麾下:車路士;哥帥麾下:巴塞隆拿)

法比加斯當初愛回家返巴塞跟隨哥帥,但佢嘅發展相信不似佢預期,本來返去係做沙維(Xavi Hernandez)或小白(Andres Iniesta)接班人,但佢大部份時間都係打十號位甚至係做假9。而當轉投車仔後,法比重回中場中路,佢就表示過好滿意呢個位置。

比沙路(Claudio Pizarro - 摩帥麾下:車路士;哥帥麾下:拜仁慕尼黑)

大家係咪唔記得有佢份? 雖然比沙路效力藍軍有兩年,而佢可以為摩佬服務嘅比賽就更少,得五場。不過由於晚年佢定位只係一位救急後備前鋒,所以喺哥帥底下亦不見得有好多機會,但佢至少贏過德甲冠軍。

舒韋恩史迪加(Bastian Schweinsteiger - 摩帥麾下:曼聯;哥帥麾下:拜仁慕尼黑)

作為一位幫德國奪世界盃嘅功臣,世界級中場小豬無論喺哥帥定摩帥下,都從來無得到配得佢地位嘅待遇。哥帥當佢係半主力已經過份,結果導致小豬投奔曼聯,但喺摩帥手下,小豬近乎從比賽絕跡,如果唔係因為曼聯受傷兵困擾,小豬喺投美職芝加哥火焰前,可能都無得再踢比賽。

其實要數,仲可以數到迪高(Deco)及羅美奧(Oriol Romeu)。不過作為波圖時摩佬愛將,迪高從未為哥帥上陣就離開巴塞,至於喺摩佬旗下,佢就渡過咗一段輝煌歲月,令佢名聲鵲起。另外羅美奧雖然叫做為兩帥都效力過,但佢僅為哥帥巴塞上陣一次,然後投車又被摩佬外借兩季,然後賣畀修咸頓,受兩帥點撥就最少了。

(本文純屬作者意見,不代表香港01立場。)