【01博客咁睇波】葡萄牙太弱 法國捧硬歐國盃

撰文:
最後更新日期:
見到基沙文入完波咁得戚的樣子,我唔會祝福法國。但客觀嚟講,我相信法國捧盃冇乜懸念。原因?對手實在太弱。下線嘅德國意大利甚至西班牙照計都贏到葡萄牙,何況法國?
李聲揚

德國於準決賽敗予東道主法國,無緣決賽。(Getty Images)

講波佬話宿命用嚟破。

今屆歐國盃八強,德國就史上第一次喺大賽淘汰意大利。四強就到法國,自58年第一次喺大賽淘汰德國。德國自 1966 年來專殺主辦國嘅優良傳統亦冇咗。

作為德國球迷,心情有啲複雜,主要係因為唔多服。唔知好事定壞事,但近十幾年捧德國嘅,好少見佢踼得好但輸波,亦冇乜因為誤判呀欠運呀黑哨呀之類出局。2006 輸比意大利,2008 輸比西班牙,2010 又係輸比西班牙,2012 又輸番比意大利,全部都心服口服,技術性擊倒。

但今屆唔係啦,唔係話法國唔掂,但德國踼得相當好,依然要出局。好事壞事睇你點睇。壞事就係心中唔多服,但好事係至少 2018 年都仲 OK 樂觀。

路維領軍能力常受質疑,卻每每能在關鍵時候取得好成績。(Getty Images)

2比0絕不代表德國比法國差

德國呢場已讓哂車馬炮,中堅侯姆斯停賽,中場基迪拉同中鋒高美斯傷出。但對法國絕大多數時間,依然唔處下風。法國頭幾分鐘可以在前場迫到德國,但好快就被迫(定自願?)放棄控球,打穩守突擊。笑我都好,2-0 嘅賽果,絕對不反映雙方實力差距。「如果唔係輸球 12 碼一切就唔同」,咁當然,足球冇如果啦。

我之前篇文鬧過德國教練路維逢凶化吉,令佢剛愎自用,但我相當佢肯定會教埋 2018 世界盃。四強淘汰咗意大利佢份工就已經穩陣,輸比大勇嘅主辦國,唔會令佢失業。

今場佢繼續重用親信,甚至打定開口牌,事先張揚話比「小豬」舒韋恩史迪加打正選。嘿,慌死我冇嘢鬧。

小豬表現算好好 基迪拉缺陣先最致命

但我拒絕抽水鬧佢呢個決定,好難話佢做錯。係,輸十二碼係小豬,仲係好致命嘅上半場尾段,仲令德國下半場陷入焗住搶攻嘅絕境。但撇除呢球波,佢表現合格有餘,而眾望所歸,年青力壯嘅安利簡(Emre Can),反而打得唔好。成個賽事,小豬唔算踼得好,但亦冇想像中咁差。留意小豬在曼聯差不多半季都冇踼足一場波,佢在歐國盃真係以 120% 努力,報答路維對佢嘅信任,而家總算可以光榮退出國家隊(唔係仲唔退下話?)。

小豬在歐國盃真係以120%努力,報答路維對佢嘅信任。(Getty Images)

由於小豬表現還可以,基迪拉嘅缺陣唔係最致命。但中堅侯姆斯停賽就大影響,中鋒高美斯缺陣更加致命。先講侯姆斯,後備取代佢嘅賀維迪斯,防守表現還可以,但造波能力就爭咗幾皮。對,中堅唔止要防守,仲要參加組織放長波,至少在德國隊一定要。到下半場保定都傷出,梅斯達菲入替後,就見到德國已經冇得玩中堅組織攻勢,自廢一臂。

無Plan B 「無鋒陣」令德國再輸波

但高美斯嘅缺陣,先係最災難性。2012 年人人鬧爆高美斯失機頻頻,估唔到今日要好似懷念董建華咁懷念佢。呢個就要鬧路維,點解唔選多個中鋒?冇鬧錯,因為佢自己都知。2014 年世界盃,德國一樣最初唔出正宗中鋒嘅老將高路斯,用梅拿打中間又試過,葛斯又試過,最後「無鋒陣」都唔掂。當時八強(又係對法國!)開始用返高路斯,即掂,捧埋世界盃。

嚟到今屆,情況一樣。頭兩場唔出正宗中鋒高美斯,球隊表現唔好。第3場分組賽用返,掂哂,對斯洛伐克對意大利一樣好。可惜高美斯因傷缺陣,今場梅拿就完全唔掂了。你可以話,「喂,傷咗高美斯佢都唔想架,又關路維事?」係,唔關佢事,但,plan B 呢?點解最初唔選多個中鋒?2014 年佢咪已經知道無鋒陣唔得咯。

睇返德國,考慮到傷兵都唔少,個別球員完全冇態,成個賽事表現其實唔錯。2018 年世界盃應該仲有得諗下爭標。高美斯年紀唔細,嚟緊兩年,就唔該路維快啲練一個有中鋒嘅陣,同埋,帶多個中鋒去俄羅斯。

法國隊前鋒基沙文(路透社)

法國一定捧盃 但我唔會祝福佢

法國呢?踼得不錯。其實 2014 年佢地被德國淘汰出局,都踼得唔差,只係紐亞多番神救。主辦國大熱門入決賽,好合理。見到基沙文入完波咁得戚的樣子,我唔會祝福法國。但客觀嚟講,我相信法國捧盃冇乜懸念。原因?對手實在太弱。下線嘅德國意大利甚至西班牙照計都贏到葡萄牙,何況法國?

葡萄牙繼 2004 年後,再殺入歐國盃決賽。咦?角色掉轉喎。須知道 2004 年葡萄牙就係主辦國身份入決賽,結果大熱倒灶,比冷門希臘擊敗,爆個大冷。咁今次, 葡萄牙自己做冷門,有冇機會贏番大勇嘅主辦國法國?

答案係,炆水啲咯。首先,國家隊嘅C朗拿度,對法國從來未入過波(其實對德國,對意大利,對英格蘭,對西班牙都冇)。

OK,宿命用嚟破。但其實葡萄牙今屆表現,真係冇說服力。希臘當年固然係大冷門,但,踼 6 場波,場場有波入喎(雖則係一球起兩球止),而淘汰賽,就直落 3 場 1:0 捧埋盃。最重要嘅係,當年葡萄牙根本分組賽已經係希臘手下敗將。

今次葡萄牙聲稱唔介意踼醜陋足球,冇問題。但,醜陋得嚟真係唔多掂,晉級路上亦冇遇過咩有實力嘅對手,勉強就係16強淘汰咗龜縮嘅克羅地亞。

葡萄牙戰術算成功,但,戰術嘅叮嘢,救到你一場救唔到一世。意大利戰術都發揮得好,但真係球員質素所限,八強止步。葡萄牙踼到入決賽,賺咗㗎啦。更何況,最有質素嘅C朗拿度,其實由歐聯決賽之後,都不在最佳狀態。如果葡萄牙拎到冠軍?我估美斯即時宣佈復出都似。

呢篇應該亦係短期內最後一次寫波,寫歐聯德甲就太趕客,可能下次要到 2018 年了。多謝讀者支持。

(本文純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。