【武術01】奧運有乜睇:一分鐘教你睇明摔跤

撰文:斷水流大師兄
出版:更新:

唔阻大家時間
今次想極速教你睇明奧運摔跤
起碼可以知一下基本嘢

(Getty Images)

游水跑步鬥快,足球手球鬥入波,唔講都明。但係冷門項目例如摔跤(對香港人而言),睇唔明就真係唔明,係唔係摔落地就贏?一個回合幾長?點計分?

唔怕,俾一分鐘我,我講講最簡單嘅,等你同人可以傾兩句。

Freestyle 同 Greco-Roman 有咩差別?

奧運摔跤分兩種:Freestyle係自由式,Greco-Roman係古典式。細分別唔講,最大分別係古典式唔可以腳摔人,亦唔可以捉對手隻腳。即係自由式常見嘅single-leg 同 double-leg takedown喺古典式比賽係被禁止嘅。

一場比賽有幾長?

兩合回,每回合三分鐘,中間有30秒休息。

點算贏?

唔計受傷犯規,贏嘅方法有三個。一個係壓制,一個係贏分。壓制就係壓住對方,令對方背脊掂地,即贏。如果成場比賽無壓制,時間到就計分,分高果嗰贏。

仲有個贏法叫technical superiority,喺古典式比賽如果兩位選手得分相距8分,高分果嗰直接贏,喺自由式就要相距10分。

點攞分?

太多方法,講幾個常見嘅。分數分為一分、兩分、四分,古典式就有五分。推人出去個大圈外面,有一分;摔跌人哋,佢又唔係瞓喺地,兩分;攞到對方背脊(即係轉去人哋後面攬實人),兩分;大投(如果你見到有人飛起就九成係大投)之類無五分都有四分。

仲有個我自己覺得怪嘅攞分方式,就係如果你打自由式比賽,你同對手都喺地,你鎖實佢肩或者腳,之後你好似鱷魚咁轉,因為你鎖實佢嘅關係,佢都會跟埋你轉,每轉一次佢背脊掂地一次,你就有兩分。情況就好似以下比賽,由兩分鐘開始睇:

我個人唔太明白呢一吓嘅意義。摔跌人有分我明,攞人背脊喺武術上都好有意義,所以有分我都明,咁轉人呢?呢一招有咩意義我就真係睇唔出。不過運動規則本身就有好多意義不明嘅動作,多一個都唔太有問題。

今次係咁多!

P.S.好多人同我講已經捉到比華拉同沙古拉,我遇都未遇到,想喊

(本文純屬作者意見,不代表香港01立場。)