【武術01】曹星如vs前川龍斗嘅幾個技術位

最後更新日期:

恭喜曹星如又贏一場,下場應該係下年三月

我估下次曹星如再打,會有好多人去睇

講幾個技術位等大家下次睇可以留意下

(資料圖片)

正所謂「術業有專攻」,拳擊我唔係最在行(其實無咩特別在行),所以講嘅都係比較淺層嘅技術位,各位玩拳擊嘅朋友唔好見怪。同時,一場比賽太多技術,我講唔晒,所以選咗比較明顯嘅同大家講。

正架 VS 反架

睇拳擊、kickboxing或者MMA,第一樣睇嘅就係兩位拳手嘅stance。因為大部份人都係右撇子,而拳擊手通常會將自己的慣用手,即係重手放後面,所以,左前右後會叫正架(右架);而左撇子就會放左手喺後面,叫反架(左架)。正架英文係orthodox stance,反架英文係southpaw stance。 (其實唔一定要將慣用手放後面,放前都有佢嘅好處,但因為後拳係重拳,慣用手放後可以最大化個力量)

因為大多數人係右撇子,所以通常兩個拳手都會用正架。不過如果一位拳手係右撇子,另一位係左撇子,就會出現正架對反架嘅情況,就好似曹星如對前川龍斗(睇最上嘅圖)。

點解要抽出嚟講呢,係因為反架拳手通常係會有優勢嘅。正架對正架嘅場合,左手刺拳會十分常見,兩位拳手都會用左手刺拳度距離、試探、誘敵、攻擊,然後先用右手直拳;同時,如果你同你嘅對手都係右架,你要重點留意嘅會係對方的左手刺拳(來自右方)、右手直拳(來自左方)、左手勾拳(來自右方)同埋右手上勾拳(來自左方),慢慢就可以掌握呢D拳可以喺咩角度嚟,然後學識反擊。(唔係話唔會出現其他拳,只係講機率呢堆拳會多好多)

但係當正架對反架,情況就唔同晒。

首先刺拳會變得較唔常見,因為大家前手嘅距離會好接近,會neutralize左,刺拳嘅效用就低好多,所以會有好多「後手先發」嘅情況出現;另一方面,你要面對嘅拳都會掉轉晒,打過嚟嘅角度又會唔同晒,右架嘅選手要重新習慣同適應,呢樣唔係一朝一夕嘅事。

最大獲嘅係,正架嘅選手要適應,反架選手唔洗。因為喺拳館,左架嘅選手成日都同右架嘅選手練習,佢見慣右架。曹星如係左撇子,打右架拳手係有優勢。

(當然如果對方都係左架,好似曹星如第18場職業賽打嘅Bradley Hore,就大家都要適應)

向外移動、Pivot 與 T-position

正架對反架嘅時候,兩個拳手會更多向外(自己前手嘅方向)移動,即係右前左後嘅反架向右移,左前右後嘅正架向左移。因為向外移,即自己嘅前腳喺對手外邊嘅時候,後手會拉到條靚直線去對手個頭。

通常等正架拳手出刺拳,反架選手就會喺呢個時候出左手後直拳。呢個時候再向外踏,再Pivot(自轉?轉體?軸轉?我唔係好知個中文),就可以去到一個同對手成直角嘅T-position。我知好難明,不如睇圖啦:

(Youtube片段)

曹星如等對手出刺拳,左手離開左防守姿勢,就打出左直拳,擊中後向右踏,Pivot,就同對手形成直角,令對手就面向一個打唔到曹星如嘅方向,反之曹星如已經可以再次攻擊;對手反應都好快,跳步閃開,不過都要時間再reset,曹星如keep住個優勢可以繼續攻。

連續後拳

因為前手刺拳受阻,後手先出拳嘅情況會較多,亦會比平時更多出現連續後拳。例如第七回合,曹星如嘅呢一下。

(Youtube片段)

後話

其實想講埋點解前川龍斗好似較被動,再講下佢Block counter嘅技術。但篇幅所限,搵機會再講。

場比賽真係好好睇(Youtube有得睇)。好多時都聽到人話拳擊打兩打就攬好悶,但呢一場兩位拳手好少攬,好多exchange好好睇,有幾下我見到咁密咁快嘅埋身勾拳都以為會有KO,兩位拳手嘅狀態同鬥志真係好好。

希望以後有更多人支持拳擊,以及其他香港嘅搏擊運動!今日係咁多!

(本文純屬作者意見,不代表香港01立場。)


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。