有鋒?無鋒?It is not a question

撰文:
最後更新日期:

阿古路失寵了,我哋先知道原來哥迪奧拿真係好鍾意無鋒陣。

如果搞次公投:現代足球入面前鋒係咪已經唔再重要或者唯獨佢是不可取替?相信結果都仲係五五波,起碼,應該,或許,比下年特首選舉緊湊啲(Well,我哋都冇份投……)

現代足球的前鋒是否已不再重要?(《足球小將》動畫擷圖)

文:洛迪高@世界波

前鋒都要全能

大家心目中嘅前鋒有啲咩﹖9號半(假9)、柱躉、禁區之狐、墮後前鋒、防守型前鋒。每一個類型都有佢嘅代表性人物,亦都有唔同作用。但可惜現今足球大勢,似乎將某啲前鋒工種淘汰。

畀着你係老細,你想你班馬仔點?梗係想佢哋又要攻又要守九項全能咩都做到,仲要夠勤力,幫到其他人!球壇中場已經要求全能,前鋒都唔例外。因此柱躉(例子:東尼)同禁區之狐(例子:恩沙基)呢兩種被視為要企定定嘅前鋒就買少見少,就算仲有都要負責返好多嘢,唔可以等波到。所以適應唔到嘅,就唯有自求多福。

恩沙基這類「禁區之狐」已買少見少。(Getty Images)

陣式講究中場控制

高質前鋒買少見少?如果要講而家最受歡迎最常見嘅陣式,就一定係4-2-3-1!先唔好提質量(Quality),先講數量(Quality),以前見開4-4-2,兩位前鋒都希望有對方幫手(無論兩位前鋒係咩類型)。

不過隨住現今中場講究控制中場,唔少領隊都選擇用最直接嘅方法——加多一位中場,咁後防唔可以犧牲,所以讓返出一個位嘅位置就係前鋒,反正只要控制到中場,後上中場都可以入波!既然常規只用一位前鋒,咁球隊亦唔需要於陣中蓄太多鋒將。

講完數量就到質量,既然頂喺最前嘅淨返一個前鋒,先唔談論落場作用,但少咗一個幫手,無人幫手拉扯走位真係獨力難支,考慮到對手可能有四個後衛,一個前鋒真係隨時要對人哋兩個中堅,目標咁大入波自然難,咁唯有犧牲入球數字為球隊服務啦。

4-2-3-1已成當今最常見陣式。(lineupbuilder.com)

偶像球星非前鋒

大家不妨講下鍾意嘅球星?C朗、美斯、基沙文、列奧斯、夏薩特?同皮耶等等……入面有幾多位係正前鋒?

而家C朗同美斯等等球星以翼鋒或進攻中場之名,行前鋒之實,其實某程度上都係靠前鋒犧牲自己入球能力與對手肉搏及拉開空間為後上球員服務,正如前利物浦名宿加歷查(Jamie Carragher)話過,冇人踢波想做「加利仔」(Gary Neville),而家睇開C朗美斯馬高列奧斯嘅後生仔同小朋友,有邊個想做新迪亞高哥斯達(Diego Costa)﹖結果就係球壇湧現唔少進攻中場及翼鋒新星,偏偏前鋒卻鮮有潛力球員。

當今最受歡迎球星如C朗、美斯等等,有多少是正前鋒?(Getty Images)

我老土我認:前鋒必不可少!

咁係咪代表前鋒已經可以唔使存在或者束之高閣等到輸緊波用嚟打「燒味」先有用?非也。足球史上邊有一個穩勝陣式?話唔定邊一日單箭頭用到爛時,雙箭頭又可以重現江湖大殺四方,正如三後衛都曾經被話Out,結果喺意甲同車路士都重現球壇,仲以奇兵姿態製造唔少驚喜。李斯特城上年都用雙箭頭奪冠,足以同世人講,「陣係死,人係生。」

正所謂一條紙巾同一條底褲都有佢嘅作用,洛迪高都係鍾意前場有個前鋒企喺度頂波。C朗美斯冇其他前鋒為佢哋服務,仲入到咁多波?其實係戰術犧牲前鋒啫。

到最後,無鋒陣係咪可取?未到洛迪高去定論,作為球迷自己隊波贏到咪得囉!不過洛迪高只係唔想球壇咁單調,覺得有一個必勝陣式就個個蜂擁去學,就好似德國隊路維咁,明明國內冒起唔少新晉中鋒,都寧願繼續用馬里奧葛斯(Mario Gotze)打前鋒……

(文章純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。