德甲護級爭櫈仔 漢堡有無關愛座?

撰文:
最後更新日期:

開季以嚟11戰,僅得3和、輸8場,聯賽難求1勝,加上入6球失25球敬陪末席。講緊嘅唔係一隊升降機式升班馬,而家已經有129年歷史嘅德甲褪色勁旅──漢堡。

德甲開始以嚟52年從未降班嘅漢堡,嚟到今季,要挑戰53年不降,似乎、或者、也許來到了盡頭……

相片由作者提供

最近香港「興起」關愛熱潮,人人驚畀人批鬥,有空位都唔敢坐,但德甲席位爭櫈仔,邊理得你幾多年歷史?今年,漢堡仲有冇位坐?

先將時鐘撥回前年德甲護級附加賽,再對上一年已經要踢附加賽嘅漢堡(當時僅憑作客入球優惠留級),作客卡爾斯魯厄去到下半場補時先射入追和入球方得以加時取勝。當時已被睇死嘅佢哋上季排名大反彈排第10,點知今季又再沉淪,似乎只係迴光反照。究竟漢堡發生咩事?

今年巨人漢堡會唔會倒下要降班?(GettyImages)

星散+青黃不接

漢堡作為德國第二大城市加最大港口,加上悠久歷史同球迷基礎,吸引球星其實唔難(要知道漢堡近年成績未有起色,但喺福布斯球會價值榜仲排緊18位)。要講漢堡當家球星,唔講遠嘅,近嘅有亞洲球迷好熟悉嘅日本前鋒高原直泰、南韓前鋒孫興民、荷蘭中場尼祖迪莊(Nigel De Jong)同雲達華治(Rafael Van Der Vaart)、比利時新老中堅代表高柏尼(Vincent Kompany)及雲拜頓(Daniel Van Buyten)、德國中場杜查奧斯基(Piotr Trochowski),甚至南美代表秘魯前鋒古里路(Jose Paolo Guerrero Gonzales)……佢哋唔係將黃金歲月畀咗漢堡,就係由漢堡打起,喺球壇聲明鵲起。

而家嘅漢堡,唔係話無名氣,但有幾多係名副其實?前德國國腳門將艾達(Rene Adler)受傷造就紐亞(Manuel Neuer)上位後,表現已不及效力利華古遜時驚艷,更曾因被拜仁單場攻入9球已被戲稱「九粒達」。中堅佐羅(Johan Djourou)係阿仙奴棄將、中場賀治比(Lewis Holtby)雖然曾被德國寄予厚望,結果敗走英超熱刺後已泯然眾人。德國前鋒拉蘇加(Pierre-Michel Lasogga)都屬曇花一現之輩,就算雲達華治當年二進官都難以挽回球隊頹勢,想護級?唔通靠冬季轉會窗?定係想靠由巴塞隆拿外借嘅克羅地亞天材中場夏利洛域(Alen Halilovic)打救?

頻換教練

成績唔好,阿頭唔似香港可輕鬆卸膊,要問責當然係教練當災。不過漢堡真係有好多教練當災……

由07年計起,截至2017年11月22日(唔知下輪會唔會又唔同咗人),漢堡已經用咗17個教練。2011/12,14/15年呢兩個球季最勁,漢堡喺呢兩季計埋過渡教練,教練席各坐過4個人。咁多人幫手,等漢堡救得返唔使降班係唔錯,但打護級賽已經危危乎,仲講咩球會發展重拾昔日榮光?最多只係東補西補咋!

唔知你仲可以坐幾耐呢?(Gettyimages)

管理層混亂

一隊球隊成績差,換教練又無咩分別,咁話唔定係阿爺,即係管理層問題。而漢堡除咗教練換得快,高層都好似走馬燈咁。近兩年洗咗9,000萬歐元,炒咗4個教練同2個體育總監。最誇張一次發生喺14/15球季,足球部總監卡拿堡(Peter Knäbel) 親自出馬中途教埋球隊。

以球會身份歷史及目標,連年排前列並出席歐洲賽似乎而家只係空談。想回到過去?上一次奪得德甲係1983年,得到歐洲賽榮譽都係83年(唔計圖圖盃)嘅漢堡始終要面對現實,上輪由日本國腳酒井高德出任新隊長並賽和前列份子賀芬咸也許會被視為有起色,但今週鬥同樣落難嘅北方球隊雲達不來梅,如果未能全取三分(截稿前未知賽果),漢堡護級路將會更難行。

(文章純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。