【皮耶罷工風波】足球員扭計,點止為轉會

撰文:
最後更新日期:

歐洲國度各行各業周不時都出現罷工情況,好似上年年尾英國鐵路工人就試過發起48小時罷工行動。

通常呢類罷工行動都係希望為工人階層謀福祉,就連足球界都不時出現罷工事件,不過就以個人罷工為多,原因同其他行業大同小異,但更多時候發起罷工嘅個別球員都係為自己利益多過集體利益……

等洛迪高精選下唔同個案,話畀最近鬧罷工嘅韋斯咸球星皮耶(Dimitri Payet)聽,You’ll never walk alone!

皮耶這類罷工行動,在足球界不過是冰山一角。(Getty Images)

文:洛迪高@世界波

 罷工理由一:我要跳槽!

史達寧成功令利記放人,轉會曼城。(Getty Images)

皮耶扭計轉會其實仲有個「驚喜」位,就係呢位上季叫做征服咗英超嘅皮耶搞場大龍鳳據報原來只係想轉會返馬賽,而唔係「更上一層樓」(截至22/1/2017)。相比起嚟,曼城翼鋒史達寧(Raheem Sterling)就有「大志」。本身效力利物浦嘅佢為咗轉會曼城,喺2015/2016賽季開季前拒絕跟利記去踢表演賽,最後成功令利記放佢走。

泰維斯唔止罷工,仲返埋阿根廷打Golf。(Getty Images)

不過剃人頭者,人亦剃其頭,曼城以前都中過招!當時陣中皇牌泰維斯(Carlos Tevez)為咗轉會,就一早講明唔會歸隊,但反口嘅佢去到9月歐聯對戰拜仁慕尼黑時,居然拒絕後備上陣,之後就返咗阿根廷打Golf,結果到最後佢都喺2013年6月轉會祖雲達斯,而轉會前球季,佢拎咗英超冠軍

當年盧祖(左)不惜罷操,也要轉會曼聯。(Getty Images)

效力曼聯唔知係唔係好多球員嘅夢想,但至少現曼聯守衛盧祖(Marcos Rojo)就係其中一個。本來效力葡超士砵亭嘅佢,為咗喺2014年轉會曼聯,就決定唔返球會練波,搞到畀球會罰。不過佢嘅招數成功咗,士砵亭好快就將佢賣咗畀曼聯。

球員扭計不一定能達到目的,比拿軒奴便是一例。(Getty Images)

不過玩罷操都可以搞出大頭佛,好似西布朗前鋒比拿軒奴(Saido Berahino)喺2015/2016賽季前,就想轉會到熱刺,結果西布朗死都唔放,搞到比拿軒奴喺Twitter話唔會再為西布朗上陣,但之後轉會唔成好快就練返波同上陣,然後去到第二年2月先肯為自己罷工道歉。而家周不時都有球會想買佢,而佢亦喺最近順利轉會史篤城。

 罷工理由二:我要做正選!

杜奧巴曾試過因無得做正選而罷踢。(Getty Images)

騙徒手法層出不窮,罷工原因當然唔止想轉會(雖然因為想轉會而罷工嘅個案相對較多)。足球員除咗講錢,就係想要正選!其中一個就有「巴哥」杜奧巴(Didier Drogba)份!上年10月當佢效力美職聯球隊蒙特利爾衝擊時,就因為得知自己無正選後,就即場罷踢,搞到最後連後備都無份,令對手無法「捕捉」他。

 罷工理由三:我唔妥你!

2010年世盃分組賽,法國隊包尾出局。(Getty Images)

除咗利益外,有時球員都要為啖氣!喺2010年南非世界盃分組賽首兩戰得一分時,隊中鋒將安歷卡(Nicolas Anelka)被爆用粗言穢語辱罵當時教練杜明尼治(Raymond Domenech)而被逐出隊,結果第二日練波先有體能教練同杜明尼治炒大鑊,然後一眾球員就拒絕操練,並坐車走人。雖然隨後日子有練波,但士氣大跌嘅法國隊最後一場輸埋畀東道主南非包尾出局,而當時罷訓球員都要受到唔同程度處分,包括停賽。

 罷工理由四:我來自非洲 

2014年世界盃,加納球員在最後一場分組賽前夕仍未收到工資。(Getty Images)

由於非洲足壇經常出現貪污及管治混亂,令球員喺獎金方面都得唔到保障。喺2014年世界盃就有一件戲劇事件發生喺加納國家隊身上。喺最後一場分組賽對葡萄牙前夕,由於當時仲未收到錢,加納球員就決定罷練仲準備罷賽,最後加納政府用飛機直接送180萬鎊(約1,700萬港元)現金去巴西,球員收到錢後就停止罷工。

 罷工理由五:為大義 

美國女子足球國家隊前鋒Abby Wambach。(Getty Images)

唔係次次足球界罷工都關利益事,至少美國女足有次係為咗權利。話說2015年時美國有次到夏威夷踢友賽,但場地極差,唔只係人造草,仲要係日久失修嘅場地,甚至有大披口,極容易令球員受傷。

美國女足就決定罷踢,希望令外界注視女足同男足場地待遇唔公平嘅情況(男足多以真草作比賽場地,甚或試過喺人造草上臨時鋪上真草)。

為咗爭取權益同福利,無論係個人或集體也好,可能有唔少人覺得自私,就好似美國女足件事咁,放喺香港可能會有人話咁任性罷賽隨時搞到人無得睇,不過要欣賞嘅係,佢哋唔會啞忍,會為自己企出嚟。早前有僱主組織表明反對立法標準工時,仲有僱主講明想有OT補水就減人工。如果咁樣都要啞忍,我寧願學加納國家隊喇!

(文章純屬作者意見,不代表香港01立場。)


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。